កំពង់ស្ពឺ ៖ អ្នកការសែតរស្មីនាគមាស ទាំង២នាក់ ដែលជាសាច់ញាតិនឹងគ្នាផងនោះ ត្រូវបានបញ្ជូនបន្តមកកាន់ស្នងការនគរបាលខេត្តកំពង់ស្ពឺ នៅព្រឹកថ្ងៃទី៨ ខែឧសភា ឆ្នាំ២០១៩នេះ ដើម្បីចាត់ការតាមនិតិវិធីច្បាប់។
សូមបញ្ជាក់ថា កម្លាំងកងរាជអាវុធហត្ថស្រុកថ្គង បានសហការជាមួយកម្លាំងនគបាលស្រុកថ្ពង នៅថ្ងៃទី៧ ខែឧសភា ឆ្នាំ២០១៩ បានឃាត់ខ្លួនអ្នកការសែតរស្មីនាគមាស ២នាក់ ក្រោយធ្វើសកម្មភាពជំរិតទារប្រាក់ពីគោយន្ត ប្រជាពលរដ្ឋនៅភូមិថ្លលទទឹង ឃុំប្រាំបីមុំ ស្រុកថ្ពង ខេត្តកំពង់ស្ពឺ ដោយក្នុងមួយគោយន្តទារប្រាក់ពី៤ម៉ឺន ទៅ៥ម៉ឺនរៀល នៅលើដងផ្លូវ។
សមត្ថកិច្ចបានឲ្យដឹងថា មនុស្សដែលត្រូវឃាត់ ក្នុងករណីជំរិតទារប្រាក់នេះមានទី១៖ ឈ្មោះ កុក គីមថុង តួនាទីចាងហ្វងការផ្សាយ និងជាអ្នកប្រព្រឹត្តផ្ទាល់ និងទី២៖ ឈ្មោះ កាន់ ស៊ីម ជំនួយការ ក្នុងនោះសមត្ថកិច្ចបាឃាត់រថយន្ត ០១គ្រឿងម៉ាកតូយូតា តាកុម៉ាពណ៌ ស មានបិតឡូហ្គោសារព័ត៌មាន រស្មីនាគមាស។ បន្ទាប់ពីបានសាកសួររួច ជនសង្ស័យ និងវត្ថុតាងត្រូវបាននគបាលស្រុកបញ្ជូនទៅស្នងការដ្ឋាននគបាលខេត្តកំពង់ស្ពឺ ដើម្បីចាត់ការតាមនិតិវិធី។ រចនាសម្ព័ន្ធរបស់កាសែតនេះ គឺមានប្តីជាចាងហ្វាង ហើយប្រពន្ធ និងប្អូនថ្លៃជាសហការី ។ នៅខេត្តកំពង់ស្ពឺជាខេត្តដែលសំបូរទៅដោយព្រៃឈើ ហើយក៏សំបូរទៅដោយបទល្មើសផងដែរ ជាហេតុធ្វើឲ្យអ្នកកាសែតជាច្រើនស្ថាប័នទៅប្រមូលផ្ដុំគ្នានៅទីនោះដើម្បីទារលុយពីបទល្មើសព្រៃឈើ ៕ ដោយ៖កូឡាប