ខេត្តព្រះសីហនុ៖ វិទ្យាស្ថានពហុបច្ចេកទេសខេត្តព្រះសីហនុ សហការជាមួយខាងពន្ធនាគារខេត្ត ព្រះសីហនុ បានបើកវគ្គបណ្តុះបណ្តាលដល់អ្នកកំពុងជាប់ឃុំក្នុងពន្ធនាគារ អំពីជំនាញផ្សារដែក, ជួសជុលម៉ូតូ,ជាងកំបោរ,កាត់ដេរសម្លៀកបំពាក់នារី, សំអាងកាយ និងផ្នែកកសិកម្មមួយចំនួនទៀត ដែលមានសិក្ខាកាមចូលរួមចំនួនជាង១០០នាក់។
នាឱកាសនោះ លោកស្រី នាក់ ណារិទ្ធ នាយិការវិទ្យាស្ថានពហុបច្ចេកទេសខេត្តព្រះសីហនុ មានប្រសាសន៍ថា ការបង្កើតឲ្យមានវគ្គបណ្តុះបណ្តាលនេះ ដើម្បីផ្តល់ចំណេះដឹង ជូនដល់បងប្អូនអ្នកកំពុងជាប់ឃុំឲ្យមានជំនាញផ្ទាល់ខ្លួន ទុកសម្រាប់យកទៅប្រកបរបរចិញ្ចឹមជីវិត ក្រោយពួកគាត់បានបញ្ចប់ទោសទណ្ឌ ហើយវិលត្រឡប់ទៅសមាហរណកម្ម ក្នុងសហគមន៍ និងក្រុមគ្រួសារវិញ។
ពិធីបើកវគ្គបណ្តុះបណ្តាលនេះ បានរៀបចំឡើង កាលពីព្រឹកថ្ងៃទី៨ ខែឧសភា ឆ្នាំ២០១៩ នុងចូលរួមជាអធិបតីដោយ លោកស្រី នាក់ ណារិទ្ធ នាយិការវិទ្យាស្ថានពហុបច្ចេកទេសខេត្តព្រះសីហនុ និងលោក ម៉ី ឌឿន នាយកពន្ធនាគារខេត្តព្រះសីហនុ។
លោកឧត្តមអគ្គានុរក្សថ្នាក់លេខ២ ម៉ី ឌឿន ប្រធានពន្ធនាគារខេត្តព្រះសីហនុ បានឲ្យដឹងថា គិតត្រឹមចុងខែមេសា ឆ្នាំ២០១៩នេះ ចំនួនអ្នកជាប់ឃុំក្នុងពន្ធនាគារខេត្តព្រះសីហនុទាំងបុរស ទាំងស្ត្រីមានចំនួនសរុប១,៤៦១នាក់។ ក្នុងនោះមានទាំងជនជាតិខ្មែរ, ជនជាតិចិន និងជនបរទេសជាតិសាសន៍ផ្សេងៗមួយចំនួនទៀត។ ហើយថា ភាគច្រើននៃអ្នកជាប់ឃុំ គឺពាក់ពន្ធ័បទល្មើសគ្រឿងញៀន៕ ដោយ ៖ ដែន សីមា
