ភ្នំពេញ ៖ ជនសង្ស័យ៣នាក់ ត្រូវបានកម្លាំងនគរបាលខេត្តបាត់ដំបង ធ្វើការឃាត់ខ្លួន បញ្ជូនទៅតុលាការ ពាក់ព័ន្ធនឹងករណី ឆបោកលក់ដីចំការ និងថែទាំដំណាំដូងក្រអូប ឲ្យប្រជាពលរដ្ឋ ។
ពាក់ព័ន្ធនឹងករណីខាងលើនេះលោកវីល្លាម ប្រធានគណបក្សខ្មែរក្រោម និងជាសមាជិកឧត្តមក្រុមប្រឹក្សាពិគ្រោះ និងផ្ដល់យោបល់ កាលពីថ្ងៃទី 18 ខែឧសភា ឆ្នាំ 2019 បានសរសេរលើហ្វេសប៊ុកថា មនុស្សធុនអញ្ចឹង ក៏អាចក្លាយជាអ្នកជំនាញសេដ្ឋកិច្ច ដាក់នាមលើសេដ្ឋកិច្ចរបស់ជាតិកើតដែរ ?
លោកវីល្លាម បានលើកឡើងថា “ក្រសួងពាក់ព័ន្ធ ត្រូវពិនិត្យមើលករណីបែបនេះ និងដាក់វិធានការតឹងរ៉ឹង ព្រោះពលរដ្ឋក្រីក្រ ងាយរងគ្រោះណាស់ ដោយសារជនខិលខូចខ្លះ បង្កេីតតែក្រុមហ៊ុន លក់តែគម្រោងខ្យល់ រកស៊ីភូតភកុហក ដោយគ្មានសុច្ចរឹតភាព ធ្វេីអោយពលរដ្ឋកាន់តែក្របន្ថែមទៀត ។ ខ្ញុំសូមអំពាវនាវឲ្យពលរដ្ឋទាំងអស់កុំជឿពេក លើពាក្យថា ជោគជ័យ , ចំណេញណាស់ , សូមពិនិត្យមើលឲ្យបានខ្ពស់មុន ដាក់ប្រាក់វិនិយោគ “។
សូមបញ្ជាក់ថា អធិការនគរបាលក្រុងបាត់ដំបង បានឲ្យដឹងថា កាលពីថ្ងៃទី៦ ខែឧសភា ឆ្នាំ២០១៩ វេលាម៉ោង ២ និង៣០នាទី រសៀល ដោយកម្លាំងនគរបាលទទួលបានព័ត៌មានពីប្រជាពលរដ្ឋថា មានករណីឆបោកលក់ដីចំការ កម្លាំងនគរបាលបាន ចុះស្រាវជ្រាវ រហូតឈានដល់ ឃាត់ខ្លួនជនសង្ស័យ ៣នាក់ រួមមាន ៖ ១-ឈ្មោះ ឈី ចរិយា «ហង្សព្រីនយ៉ា» ភេទប្រុស អាយុ៣២ឆ្នាំ មានទីលំនៅ ឃុំទន្លេបាសាក់ ខណ្ឌចំការមន រាជធានីភ្នំពេញ។ ២-ឈ្មោះ ឈិត រតនា ភេទប្រុស អាយុ ៣៧ឆ្នាំ មានទីលំនៅ ភូមិបោះពោធិ៍ ឃុំអូរដំបង ស្រុកសង្កែ ខេត្តបាត់ដំបង ។ ៣-ឈ្មោះ ជឺ ចិន្ដា ភេទប្រុស អាយុ ៤៧ឆ្នាំ ទីលំនៅភូមិកំពង់ក្របី សង្កាត់ស្វាយប៉ោ ក្រុងបាត់ដំបង ខេត្តបាត់ដំបង ។
ក្រោយការឃាត់ខ្លួន ជនសង្ស័យ ត្រូវបានសមត្ថកិច្ចជំនាញ កសាងសំណុំរឿង បញ្ជូនទៅតុលាការ ដើម្បីចាត់ការតាមនីតិវិធីច្បាប់ ។
បច្ចុប្បន្ននេះដីធ្លីមានការឡើងគ្រប់ ទីកន្លែង តំបន់ ហើយជាឱកាស សម្រាប់ជនខិលខូចមួយចំនួន ដោយបាន ប្រើប្រាស់ឈ្មោះក្រុមហ៊ុនផ្សេងៗ ដែលមិនដឹងថាមានច្បាប់ ឬអត់ ធ្វេីការវិនិយោគ ជាមួយប្រជាពលរដ្ឋ តាមរយៈ លក់ដីហិចតាហើយ ដាំដុះ និងថែដំណាំ ឬពុះជាងដីល្វែងលក់ ដើម្បីប្រាក់ចំណេញជាដើម ដែលសកម្មភាពទាំងនេះ ធ្វើឲ្យប្រជាពលរដ្ឋខ្លះ ទៅខ្ចីបុលធនាគារ ដើម្បីយកលុយទៅវិនិយោគ ជាមួយក្រុមហ៊ុននោះ លុះទិញហើយក្រុមហ៊ុន ទាំងនោះរំលាយចោលអស់ យកតែលុយកក់ ៕ ដោយ ៖ កូឡាប
