គណបក្សប្រឆាំងថៃឈ្មោះភឿថៃ (Pheu Thai Party) បានឈ្នះកៅអីច្រើនជាងគេនៅក្នុងការបោះឆ្នោតកាលពីមីនាកន្លងទៅ ដែលវាគឺជាការបោះឆ្នោតលើកដំបូងចាប់តាំងពីមានរដ្ឋប្រហារយោធា ក្នុងឆ្នាំ ២០១៤ ។ នេះបើតាមការបញ្ជាក់របស់គណកម្មការជាតិរៀបចំការបោះឆ្នោតថៃ។
បើតាមលទ្ធផល គណបក្សភឿថៃ ដែលគាំទ្រដោយអតីតនាយករដ្ឋមន្ត្រីថាក់ស៊ី ឈ្នះបានកៅអីចំនួន ១៣៦ ខណៈដែលគណបក្សកាន់អំណាចគាំទ្រដោយរបបយោធា ឈ្នះបានត្រឹមតែ ១១៥ប៉ុណ្ណោះ។
ទោះយ៉ាងណាក៏ដោយ ព្រឹទ្ធសភាដែលមាន ២៥០កៅអី ដែលត្រូវគ្រប់គ្រងទាំងស្រុងដោយយោធា ត្រូវគេរំពឹងថានឹងគាំទ្រដល់គណបក្ស Palang Pracha Rath របស់លោកប្រាយុទ្ធ ចាន់អូចា។
សូមបញ្ជាក់ថា ការបោះឆ្នោតជ្រើសរើសនាយករដ្ឋមន្ត្រីថៃនឹងត្រូវធ្វើឡើងក្នុងរយៈពេលប៉ុន្មានសប្តាហ៍ ខាងមុខនេះ។ បើផ្អែកតាមលទ្ធផល មានន័យថា រដ្ឋាភិបាលយោធានឹងត្រូវគ្រប់គ្រងអំណាចដដែល ហើយមេដឹកនាំបច្ចុប្បន្ន លោប្រាយុទ្ធ ចាន់អូចា ដែលដឹកនាំគណបក្ស Palang Pracha Rath ទំនងនៅធ្វើជានាយករដ្ឋមន្ត្រីដដែល។
បើតាមច្បាប់បោះឆ្នោត ព្រឹទ្ធសភានឹងត្រូវធ្វើការបោះឆ្នោតជាមួយសភា ដើម្បីជ្រើសរើសនាយករដ្ឋមន្ត្រី។ របបយោធាជាអ្នកកាន់កាប់កៅអីទាំងអស់នៅក្នុងព្រឺទ្ធសភា ហើយវាមាន័យថា គណបក្សរបស់លោកប្រាយុទ្ធត្រូវការការគាំទ្រពីគណបក្សតូចៗបន្តិចប៉ុណ្ណោះ ដើម្បីមានសម្លេងគ្រប់គ្រាន់នៅក្នុងសភា និងព្រឹទ្ធសភា ក្នុងការជ្រើសរើសមេដឹកនាំថ្មី៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC