ភ្នំពេញ ៖ អ្នកតំណាងស្ថាប័នអប់រំ និងសាកលវិទ្យាល័យ មកពីសហរដ្ឋអាមេរិកបានធ្វើដំណើរ ការមកកាន់ទីក្រុងភ្នំពេញ ដើម្បីចូលរួមកម្មវិធីពិព័រណ៍ពីការសិក្សា និងអាហារូបករណ៍នៅសហរដ្ឋអាមេរិក ដែលបានធ្វើឡើងនៅថ្ងៃ ៨ ឧសភា ឆ្នាំ ២០១៩ នៅសាលា ACE សាខាទួលទំពូង ចាប់ពីម៉ោង ១ រសៀល ដល់ម៉ោង ៦ល្ងាច។ ជារៀងរាល់ឆ្នាំ កម្មវិធីពិព័រណ៍នេះ ត្រូវបានរៀបចំឡើងដោយស្ថាប័នអប់រំ IDP កម្ពុជា និងបើកអោយសាធារណជនអាចចូលរួមដោយសេរី មិនតម្រូវអោយបង់ប្រាក់ទេ។
កម្មវិធីនេះបានផ្តល់ជាជំនួយដល់សិស្ស និស្សិតដែលមានបំណងចង់ស្វែងយល់បន្ថែមទៅនឹងឱកាសទៅបន្តការសិក្សានៅសហរដ្ឋអាមេរិក និងធ្វើយ៉ាងណា ដើម្បីធ្វើអោយឱកាសនោះក្លាយជាការពិត។
កម្មវិធីពិព័រណ៍នេះបានផ្តល់ឱកាសអោយសិស្សនិស្សិត និងអាណាព្យាបាលទាំងអស់ បានជួបពិភាក្សាផ្ទាល់ ជាមួយស្ថាប័នអប់រំសហរដ្ឋអាមេរិក ដើម្បីស្វែងយល់ព័ត៌មាន អំពីជម្រើសសិក្សា គ្រប់កម្រិតចាប់ពីថ្នាក់វិទ្យាល័យ ថា្នក់អប់រំវិជ្ជាជីវៈវគ្គខ្លី និងកម្មវិធីសិក្សាថ្នាក់សាកលវិទ្យាល័យ ទទួលបានការពិគ្រោះ និងណែនាំទៅលើជម្រើសសិក្សា កម្មវិធីសិក្សាផ្សេងៗ និងរួមទាំងឱកាសការងារ ក៏ដូចជាព័ត៌មាន អំពីអាហារូបករណ៍ដែលពាក់ព័ន្ធ។ ពត៌មានទាក់ទង នឹងកម្មវិធីសិក្សាផ្សេងៗទៀត និងព័ត៌មានពីតម្រូវទិដ្ឋាការនានា ក៏បានផ្តល់ជូននៅក្នុងកម្មវិធីពិព័រណ៍ផងដែរ។
«ការចូលរួមកម្មវិធីពិព័រណ៍ដ៏ច្រើនកុះករ ពីសំណាក់សាធារណជន នៅក្នុងឆ្នាំនេះ បានបង្ហាញយ៉ាងច្បាស់ថា សហរដ្ឋអាមេរិកនៅតែបន្តជាទិសដៅសិក្សា ដ៏ពេញនិយមមួយសម្រាប់សិស្ស និស្សិតក្នុងទៅ សិក្សានៅបរទេស» យោងទៅតាមប្រសាសន៍លោក ម៉ៅ ស្រេង នាយកស្ថាប័នអប់រំIDP ប្រចាំប្រទេសកម្ពុជា។
ដោយឡែក មន្ត្រីមណ្ឌលប្រឡង IELTS ប្រចាំប្រទេសកម្ពុជា បានចូលរួម ផ្តល់ប្រឹក្សាពី ការចុះឈ្មោះប្រលង និងការត្រៀមប្រលង IELTS អ្នកតំណាងមកពី មជ្ឈមណ្ឌលអូស្រា្តលី សម្រាប់ការបណ្តុះបណ្តាល (ACE) ក៏មានវត្តមានក្នុងកម្មវិធីនេះដែរ និងបានផ្តល់នូវព័ត៌មាន ទាក់ទងនឹងការសិក្សាភាសាអង់គ្លេស ដើម្បីត្រៀមខ្លួនបំពេញលក្ខខណ្ឌ របស់ស្ថាប័នអប់រំសហរដ្ឋអាមេរិក។ ស្របគ្នានេះដែរ មជ្ឈមណ្ឌលតេស្តIELTS ប្រចាំកម្ពុជា បានដាក់ឲ្យប្រើប្រាស់ សាកល្បងនូវការប្រឡងតេស្ត IELTS តាមរយៈកុំព្យូទ័រ ដែលហៅកាត់ថា IELTS CDI សម្រាប់សាធារណជន ដែលចាប់ អារម្មណ៍ទៅលើតេស្តនេះ។
«អ្នកតំណាងដែលមក ចូលរួមកម្មវិធីពិព័រណ៍ការសិក្សា និងអាហារូបករណ៍ នៅសហរដ្ឋអាមរិក បានជួបពិភាក្សាជាមួយសិស្ស និស្សិតជាង ៤០០ នាក់ដើម្បីជជែក និងពិគ្រោះដោយផ្ទាល់ និងបានផ្តល់នូវចម្លើយ ទៅកាន់ចម្ងល់ជាច្រើនរបស់សិស្ស ដែលបានចូលរួមទៀតផង។ លើសពីនេះ អ្នកជំនាញប្រឹក្សាការសិក្សានៅបរទេសរបស់ស្ថាប័ន IDP ក៏មានវត្តមានផ្ទាល់នៅក្នុងកម្មវិធី ដែលជាគុណសម្បត្តិមួយទៀត សម្រាប់សិស្ស និស្សិតដែលបានអញ្ជើញមកចូលរួម» លោក ឈាង វ៉ាន់តាក់ ប្រធានផ្នែកទំនាក់ទំនងសិស្ស និស្សិតទៅសិក្សានៅក្រៅប្រទេស ប្រចាំស្ថាប័នអប់រំ IDP កម្ពុជា។
IDP Education គឺជាស្ថាប័នធំជាងគេបង្អស់ លើពិភពលោក ដែលបានដើរតួនាទី ក្នុងការបញ្ជូនសិស្សនិស្សិត ទៅសិក្សានៅប្រទេសអូស្ត្រាលី អង់គ្លេស ណូវែលហ្សេឡង់ កាណាដា អាមេរិក និង អៀរឡង់ ជាមួយនឹងការិយាល័យជាង ១០០ នៅច្រើនជាង ៣២ប្រទេសជុំវិញពិភពលោក។ ការប្រឹក្សា និងការបំពេញទម្រង់បែបបទសិក្សា ដែលផ្តល់ជូនដោយស្ថាប័ន IDP ធ្វើឡើងដោយឥតគិតថ្លៃ។
នៅប្រទេសកម្ពុជា សិស្ស និស្សិតនិង អាណាព្យាបាល អាចធ្វើការអញ្ជើញ មកសាកសួរពត៌មានបន្ថែម ទាក់ទងការសិក្សានៅបរទេស នៅគ្រប់ការិយាល័យសិក្សា នៅបរទេសរបស់ស្ថាប័ន IDP ផ្ទាល់ដែលមានទីតាំងនៅគ្រប់សាខា នៃសាលា ACE ភ្នំពេញ និងសៀមរាប៕ ដោយ៖កូឡាប