មណ្ឌលគិរី ៖ គណៈកម្មការចម្រុះថ្នាក់ជាតិ និងខេត្តមណ្ឌលគិរី ដែលបានសម្រេចចុះបោះបង្គោលកំណត់ព្រំដី នៅមជ្ឈមណ្ឌលវប្បធម៌ភ្នំដោះក្រមុំដើម្បីអភិរក្សវប្បធម៌ជនជាតិដើមភាគតិច ចៀសវាងការទន្ទ្រានរំលោភ កាន់កាប់ដោយខុសច្បាប់ ពីសំណាក់ជនខិលខូច និងអ្នកមានអំណាចមួយចំនួន។
បើតាមការផ្សាយលើហ្វេសប៊ុកផ្លូវការលោកថៃនរៈសត្យា រដ្ឋលេខាធិការក្រសួងវប្បធម៌ និងវិចិត្រសិល្បៈ បានថ្លែងថា ភ្នំដោះក្រមុំ និង ការអនុវត្តន៍ ការងារជាក់ស្តែង។
លោកថៃនរៈសត្យា បានបញ្ជាក់បន្ថែមថា ៖ ព្រឹកថ្ងៃ 09 ខែឧសភា ឆ្នាំ 2019 ក្រុមការងារចម្រុះ មកពីក្រសួងដែនដី នគរូបនីយកម្មនិងសំណង់ ក្រសួងវប្បធម៌និងវិចិត្រសិល្បៈ អាជ្ញាធរខេត្តដែលចូលរួមផ្ទាល់ ដោយលោក ស្វាយ សំអ៊ាង អភិបាលខេត្ត អមដោយប្រធានមន្ទីរមួយចំនួន បានចុះអនុវត្តការងារ ពិនិត្យវាស់វែងជាក់ស្តែង លើវិសាលភាព ដែលត្រូវកំណត់ជាមជ្ឈមណ្ឌលវប្បធម៌ របស់បងប្អូនជនជាតិដើមភាគតិច ភូមិភាគឥសាន្ត “ភ្នំដោះក្រមុំ” តាមការសម្រេច របស់ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន ។
លោកបានបន្តថា ដើម្បីពន្លឿនការងារបោះបង្គោលកំណត់ព្រំ លោកអភិបាលខេត្តមណ្ឌលគិរី បានជួយភ្លាមៗ នូបង្គោលស៊ីម៉ង់ត៍ចំនួន ៥០០ មន្ទីរវប្បធម៌និងវិចិត្រសិល្បៈ ចំនួន ៣០០ អង្គភាពដែលជួយឧបត្ថម្ភបង្គោលចំនួន ១០០ មាន
មន្ទីរទេសចរណ៍ ធម្មការ រៀបចំដែនដី… សាលាក្រុងសែនមនោរម្យ មន្ទីរកសិកម្ម បរិស្ថាន ចំណែកមន្ទីរអភិវឌ្ឍន៍ជនបទ រួមចំណែក២០ម៉ឺនរៀល។
លោក អភិបាលខេត្តបានសន្យាថា នឹងធ្វើផ្លូវក្រវ៉ាត់ជុំវិញ មជ្ឈមណ្ឌលវប្បធម៌”ភ្នំដោះក្រមុំ”នេះ ជាបន្ទាន់ ក្រោយការសម្រេចជាផ្លូវការរបស់រាជរដ្ឋាភិបាល នៃព្រះរាជាណាចក្រកម្ពុជា។
លោក ថៃ នរៈសត្យា រដ្ឋលេខាធិការក្រសួងវប្បធម៏ និងវិចិត្រសិល្បៈ បានថ្លែងថា បេសកម្មរបស់គណៈកម្មធិការចម្រុះនាពេលនេះ គឺជាសញ្ញាវិជ្ជមានដ៏ប្រសើរ ព្រោះបញ្ហាដីនៅតំបន់ភ្នំដោះក្រមុំនេះ បានអូសបន្លាយជាច្រើនឆ្នាំមកហើយ។ ឯកឧត្តម បានបញ្ជាក់ថា ការសម្រេចរួមគ្នាក្នុងការចុះបោះបង្គោលកំណត់ព្រំដីនេះ នឹងពន្លឿនដល់ការងារជំនាញវប្បធម៌ ដើម្បីធ្វើរបាយការណ៍ជាក់ស្តែង ដាក់ជូនសម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលកន្លងមកសម្តេច បានជំរុញឲ្យស្ថាប័នជំនាញពាក់ព័ន្ធ ដោះស្រាយបញ្ហានៅទីនេះ ឲ្យបានចប់ឆាប់ៗ ជៀសវាងការទន្ទ្រានដោយខុសច្បាប់បន្តទៀត។
លោក ស្វាយ សំអ៊ាង អភិបាលខេត្ត បានឲ្យដឹងថា “ដីភ្នំដោះក្រមុំនេះ ត្រូវបានរាជរដ្ឋាភិបាលកម្ពុជា សម្រេចបង្កើតឡើងតាំងពីឆ្នាំ២០០៤ ដើម្បីទុកជាសម្បត្តិសាធារណៈ តែដោយកាលណោះ ដីនៅតំបន់នេះមិនទាន់មានការបោះកំណត់ព្រំឲ្យបានត្រឹមត្រូវ ដូច្នេះហើយក៏មានសកម្មភាពលួចទន្ទ្រានដីពីសំណាក់បងប្អូនប្រជាពលរដ្ឋដែលរស់នៅតាមចង្កេះភ្នំ ។ រយៈពេលពីរ-បីឆ្នាំចុងក្រោយនេះ ក្នុងនាមអាជ្ញាធរខេត្ត បានដាក់ចេញវិធានការតឹងរ៉ឹង ទប់ស្តាត់ការរំលោភបំពានពីជនខិលខូច នឹងចាត់វិធានការទៅតាមច្បាប់ ដើម្បីថែរក្សាដីនៅតំបន់នេះ ទុកទៅថ្ងៃក្រោយ” ។
លោកអភិបាលខេត្ត ជឿជាក់ថា អ្វីៗទាំងអស់ ការចុះពិនិត្យផ្ទៀងផ្ទាត់ ការដោះស្រាយនឹងអាចចប់សព្វគ្រប់ ព្រោះក្រុមការងារបានឯកភាពគ្នាឈរលើគោលការណ៍«ទប់ស្កាត់ ការពារ នឹងថែរក្សា»ដីនេះឲ្យគង់វង្សយូរអង្វែង មិនអនុញ្ញាតិឲ្យបុគ្គលណាម្នាក់ កាន់កាប់ជាកម្មសិទ្ធិឯកជនដាច់ខាត។
សូមបញ្ជាក់ថា កាលពីរសៀលថ្ងៃទី២៨ កុម្ភៈ ២០១៩ សម្តេចតេជោ ហ៊ុន សែន បានចេញបញ្ជាឲ្យអាជ្ញាធរខេត្តមណ្ឌលគិរី ត្រូវរឹបអូសដីភ្នំដោះក្រមុំទុកជាសម្បត្តិរដ្ឋវិញ ដែលរងការទន្ទ្រានពីមនុស្សមួយក្តាប់តូច ទុកជាកម្មសិទ្ធិបុគ្គល។ សម្តេចតេជោ ហ៊ុន សែន បញ្ជាឱ្យអភិបាលខេត្តមណ្ឌលគិរី ទប់ស្កាត់ជាបន្ទាន់ មិនអនុញ្ញាតឲ្យបុគ្គលណា ទន្ទ្រានយកដី នៅភ្នំដោះក្រមុំបានឡើយស្ថាប័នពាក់ព័ន្ធ ត្រូវទប់ស្កាត់ជាបន្ទាន់ មិនអនុញ្ញាតឱ្យបុគ្គលណា ទៅទន្ទ្រានយកដីនៅភ្នំដោះក្រមុំទេ ហើយសម្តេចនៅចងចាំអ្វី ដែលសម្តេចធ្លាប់ទៅកាលពីឆ្នាំ២០១២ នៅទីនោះ។
ដីតំបន់ភ្នំដោះក្រមុំ ឬមជ្ឈមណ្ឌលវប្បធម៌ជនជាតិដើមភាគតិច មានផ្ទៃដីប្រមាណជាង១០០ហិចតា ត្រូវបានបាត់បង់បន្តិចម្តងៗ តាំងពីឆ្នាំ២០០៥ ដោយដីមួយផ្នែក ត្រូវបានគេទិញលក់ពីម្នាក់ទៅម្នាក់ រហូតប្រែក្លាយកន្លែងខ្លះទៅជាទីតាំងខារ៉ាអូខេ នឹងផ្ទះសំណាក់ជាដើម ហើយដីដែលសេសសល់បច្ចុប្បន្ន ប្រហែល៨០ហិចតាប៉ុណ្ណោះ៕ ដោយ ៖ កូឡាប