ភ្នំពេញ ៖ ប្រទេសកម្ពុជា បានទទួលការអនុញ្ញាតជាផ្លូវការ នាំចេញចេកអំបូងលឿង ទៅកាន់ប្រទេសចិនដោយផ្ទាល់ហើយ ដោយក្នុងនោះមានក្រុមហ៊ុនចំនួន០៥ ដែលគោរពបាន តាមលក្ខខណ្ឌច្បាប់ និងបច្ចេកទេស ហើយអាចធ្វើការនាំចេញ ចេកស្រស់ទៅកាន់ទីផ្សារចិនលើកទី១ បានចំនួន ជាង១០០តោននាថ្ងៃនេះ។
ពិធីប្រកាសជាផ្លូវការ នាំចេញចេកអំបូងលឿង ទៅកាន់ប្រទេសចិន នៅថ្ងៃនេះ ត្រូវបានធ្វើឡើង ក្រោមអធិបតីភាពលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងលោក លី អាន ទីប្រឹក្សាសេដ្ឋកិច្ច ប្រចាំស្ថានទូត សាធារណរដ្ឋប្រជាមានិតចិន។
នាព្រឹកថ្ងៃព្រហស្បតិ៍ ៦កើត ខែពិសាខ ឆ្នាំកុរ ឯកស័ក ព.ស. ២៥៦២ ត្រូវនឹងថ្ងៃទី៩ ខែ ឧសភា ឆ្នាំ២០១៩ នៅទីស្នាក់ការរបស់ក្រុមហ៊ុន ហ៊ុន ទី ស្ថិតនៅខណ្ឌសែនសុខ មានរៀបចំពិធីសម្ភោធការនាំចេញផ្លែចេកអំបូងលឿងស្រស់កម្ពុជាទៅកាន់ទីផ្សារប្រទេសចិន ក្រោមអធិបតីភាពលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងលោក លី អានទីប្រឹក្សាសេដ្ឋកិច្ចប្រចាំស្ថានទូតសាធារណរដ្ឋប្រជាមានិតចិន ។ មានក្រុមហ៊ុនទាំង០៥ ដែលទទួលបានគោលការណ៍ អនុញ្ញាតនាំផ្លែចេក ទៅប្រទេសចិន។
លោក ងិន ឆាយ ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយក នៃអគ្គនាយកដ្ឋានកសិកម្ម បានរាយការណ៍អំពីផលិតកម្មចេកអំបូងលឿង ដែលកំពុងមានទីផ្សារខ្ពស់នៅអន្តរជាតិ ហើយកំពុងត្រៀមរៀបចំ ធ្វើការនាំចេញជាបន្តបន្ទាប់ នាចាប់ពីពេលនេះតទៅ។ ក្រៅពីនេះ លោកក៏បានបញ្ជាក់ដោយសង្ខេប ពីដំណើរការនៃការចរចារជា មួយភាគីចិនអំពីនីតិវិធី បែបបទ ឯកសារចាំបាច់សំខាន់ៗទាំងច្បាប់ និងបច្ចេកទេស ជាពិសេសឯកសារអនាម័យ និងភូតគាមអនាម័យមុនឈាន ទៅចុះហត្ថលេខាលើអនុស្សរណ:នៃការយោគ យល់គ្នាកាលពីថ្ងៃទី០២ ខែសីហា ឆ្នាំ២០១៨ ស្តីពីការនាំចេកស្រស់ចេញទៅកាន់ទីផ្សារចិន។
បន្ទាប់ពីលោក លី អាន បានថ្លែងសាទរ និងវាយតម្លៃ ចំពោះពិធីសម្ពោធ ការនាំចេញផ្លែចេកស្រស់កម្ពុជា ទៅកាន់ទីផ្សារប្រទេសចិន ដែលរៀប ចំដោយ កិច្ចសហការរវាងក្រសួង ជាមួយស្ថានទូតចិននាពេលនេះ។
លោករដ្ឋមន្ត្រីបានមានប្រសាសន៍ថា ដោយអនុវត្តតាមផែនការ យុទ្ធសាស្ត្រអភិវឌ្ឍវិស័យកសិកម្ម២០១៩-២០២៣ និងយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាល ជាពិសេសអនុសាសន៍ដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រ ក្រសួងដែលមានអគ្គនាយកដ្ឋានកសិកម្ម ជាសេនាធិការ បានខិតខំពុះពារគ្រប់បែបយ៉ាង ក្នុងឆន្ទ:ច្បាស់លាស់ គឺធ្វើយ៉ាងណានាំកសិផលកម្ពុជា ឲ្យបានចូលក្នុងទីផ្សារអន្តរជាតិ ហើយការខិតខំប្រឹងប្រែងរបស់ថ្នាក់ដឹកនាំក្រសួង អគ្គនាយកដ្ឋានកសិកម្ម និងគ្រប់ភាគីពាក់ព័ន្ធបាន ទទួលលទ្ធផលគួរជាទីមោទនៈ ជាក់ស្តែងគឺថ្ងៃនេះ។ ពិតណាស់លទ្ធផលនេះ មិនអាចកាត់ផ្តាច់បាន ពីកិច្ចសហប្រតិបត្តិការ យ៉ាងល្អប្រសើររវាងភាគីទាំងពីរ ក្នុងការចរចា ការឧបត្ថម្ភ គាំទ្រទាំងច្បាប់ និងបច្ចេកទេសពីភាគីចិន ធ្វើយ៉ាងណាដើម្បីនាំផ្លែចេកស្រស់កម្ពុជាចូលទៅក្នុងទីផ្សារចិន ហើយទីបំផុតក្រសួងកសិកម្ម រុក្ខាប្រមាញ់ និងនេសាទ និងឯកឧត្តមអគ្គរដ្ឋទូត សាធារណរដ្ឋប្រជាមានិតចិន ប្រចាំនៅព្រះរាជាណាចក្រកម្ពុជា បានឈានដល់ការចុះ ពិធីសារស្តីពីការអនុញ្ញាត ឲ្យកម្ពុជាអាចនាំចេកអំបូងលឿន ទៅកាន់ប្រទេសចិន។ ក្នុងចំណោម១០ ក្រុមហ៊ុន ដែលបានដាក់ពាក្យស្នើសុំគោការណ៍ អនុញ្ញាតនាំចេញផ្លែចេកអំបូងលឿងស្រស់ មានតែក្រុមហ៊ុនចំនួន០៥ មានក្រុមហ៊ុនសុវណ្ណរាជសី ឡុងស្រេងហ៊ុយជៀន ហ្គែនឡែន ហ្គ្រីនអាយឡែន និងក្រុមហ៊ុនឡងមេត ដែលគោរពបានតាមលក្ខខណ្ឌច្បាប់ និងបច្ចេកទេស ហើយអាចធ្វើការនាំចេញ ចេកស្រស់ទៅកាន់ទីផ្សារចិនលើកទី១ បានចំនួនជាង១០០តោននាថ្ងៃនេះ។
លោករដ្ឋមន្ត្រីបានរំឭកជូនអង្គពិធីជ្រាបផងដែរថា ពិធីនាថ្ងៃនេះស្របពេលដែលប្រទេសទាំងពីរត្រៀមរៀបចំពិធីរំលឹកខួបលើទី៦១ឆ្នាំ នៃថ្ងៃបង្កើតទំនាក់ទំនងការទូត ដែលភាគីទាំងពីរបានកំណត់ថា “ឆ្នាំមិត្តភាពកម្ពុជា-ចិន” ព្រមទាំងកិច្ចសហប្រតិបត្តិការភាពជាដៃគូយុទ្ធសាស្ត្រគ្រប់ជ្រុង ជ្រោយកម្ពុជា-ចិន ដែលភាគីទាំងពីរបាន ចុះហត្ថលេខាតាំងពីនៅថ្ងៃទី០៨ ខែមេសា ឆ្នាំ២០១៣ នៅទីក្រុងប៉េកាំង។ ជាការពិត ចំណងមិត្តភាពនិងកិច្ចសហប្រតិបត្តិការនេះ បានផ្តល់នូវផល ប្រយោជន៍ជាច្រើនដល់ប្រជាជនកម្ពុជា តាមរយ:ការអភិវឌ្ឍហេដ្ឋារចនាសម្ព័ន្ធ ធនធានមនុស្ស សេដ្ឋកិច្ច ទេសចរណ៍ កសិកម្ម ឧស្សាហកម្ម និងការវិនិយោគ។ល។ សមិទ្ធផលទាំងអស់នេះបាន និងកំពុងរួមចំណែកដ៏សំខាន់ក្នុងការកាត់បន្ថយភាពក្រីក្រ លើកកម្ពស់កំណើនសេដ្ឋកិច្ចជាតិឲ្យមាននិរន្តរភាព។
លោករដ្ឋមន្ត្រីស្នើឲ្យភាគីពាក់ព័ន្ធទាំងអស់ត្រូវបន្តពង្រឹង និងពង្រីកកិច្ចសហប្រតិបត្តិការ ឲ្យមានលក្ខណៈប្រទាក់ក្រឡាគ្នា ទូលំទូលាយ និងស៊ីជម្រៅ ដោយយកស្មារតីទទួលខុសត្រូវខ្ពស់ តាមអភិក្រម “រដ្ឋ-ឯកជន-ដៃគូអភិវឌ្ឍន៍ និងសហគមន៍” ដើម្បីអនាគតដ៏ភ្លឺស្វាងរបស់ប្រទេសជាតិ និងប្រជាជនកម្ពុជា៕ ដោយ ៖ កូឡាប