រដ្ឋមន្ត្រីការបរទេសអាមេរិចលោក Mike Pompeo បានថ្លែងថា រដ្ឋបាលរបស់លោកដូណាល់ ត្រាំ មិនចង់មានសង្គ្រាមជាមួយប្រទេសអ៊ីរ៉ងនោះទេ ប៉ុន្តែគាត់បានព្រមានថានឹងធ្វើការវាយបកវិញ ប្រសិនជាអ៊ីរ៉ងធ្វើការវាយប្រហារ។
លោកថ្លែងនៅក្នុងសេចក្តីប្រកាថា “អ៊ីរ៉ងបានចូលរួមក្នុងសកម្មភាពគំរាមកំហែងជាច្រើនក្នុងរយៈពេលប៉ុន្មានសប្តាហ៍នេះ។ របបនៅក្នុងរដ្ឋធានីតេហេរ៉ង (Tehran) គួរយល់ថា រាល់ការវាយប្រហារទាំងឡាយរបស់ពួកគេប្រឆាំងនឹងផលប្រយោជន៍ ឬប្រជាជនអាមេរិច ពួកគេនឹងទទួលរងការវាយប្រហារបកវិញ”។
លោកថ្លែងបន្ថែមទៀតថា “ដូចដែលប្រធានាធិបតីត្រាំថ្លែងបញ្ជាក់កាលពីថ្ងៃម្សិលមិញថា គាត់កំពុងរងការថ្ងៃមួយដើម្បីជួបពិភាក្សាជាមួយនឹងមេដឹកនាំអ៊ីរ៉ងដើម្បីបង្កើតកិច្ចព្រមព្រៀង និងបោះជំហ៊ានទៅដើម្បីផ្តល់អនាគតល្អដែលខ្លួនសមនឹងទទួលបាន”។
សូមបញ្ជាក់ថា ការព្រមានរបស់រដ្ឋមន្ត្រីការបរទេសអាមេរិចនេះកើតឡើង ក្រោយពេលអាមេរិចបានបញ្ជូលនាវាដឹកយន្តហោះ និងយន្តហោះទម្លាក់គ្រាប់បែកដ៏មានឥទ្ធិពលទៅកាន់ឈូងសមុទ្រក្បែរអ៊ីរ៉ង៕
អត្ថបទប្រែសម្រួលដោយ៖ សុភ័ក្រ
ប្រភព៖ CNN