បន្ទាយមានជ័យ ៖ សម្ដេចក្រឡាហោម បានស្នើឲ្យអាជ្ញាធរមូលដ្ឋាន អប់រំណែនាំប្រជាពលរដ្ឋ នៅគ្រប់មជ្ឈដ្ឋាន ឲ្យចៀសវាង កុំឲ្យចូលរួមក្នុង សកម្មភាពទាំងឡាយណា ដែលខុសច្បាប់ និងប៉ះពាល់ដល់សន្តិភាព និង អំពីផលវិបាក នៃការផ្ដួលរំលំរដ្ឋាភិបាលស្របច្បាប់ តាមរយៈការធ្វើសកម្មភាពពណ៌។ សម្ដេចក្រឡាហោមសខេងបានថ្លែងបែបនេះ ក្នុងឱកាសតែងតាំង អភិបាលខេត្តបន្ទាយមានជ័យ កាលពីព្រឹកថ្ងៃទី ១០ ខែឧសភាឆ្នាំ ២០១៩ នេះគឺនៅសាលាខេត្តបន្ទាយមានជ័យ។
សម្ដេចក្រឡាហោម ស ខេង ឧបនាយករដ្ឋមន្ត្រីនិងជារដ្ឋមន្ត្រីក្រសួងមហាផ្ទៃ បានស្នើឲ្យពង្រឹងសន្តិភាព និងស្ថេរភាពនយោបាយ នៅក្នុងព្រះរាជាណាចក្រកម្ពុជាទាំងមូល។ សម្ដេចក្រឡាហោម ក៏បានស្នើឲ្យជនរួមជាតិ ត្រូវខិតខំរួមគ្នាបន្តរក្សាការពារសុខសន្តិភាព ស្ថេរភាព នយោបាយ រក្សាឲ្យបានគត់មត់នូវអធិបតេយ្យភាព បូរណភាពទឹកដីរបស់ជាតិ ដោយរួមគ្នាការពារ ប្រឆាំងដាច់ខាត និងទប់ស្កាត់ នៅរាល់សកម្មភាពពីខាងក្រៅក្នុងការប៉ុនប៉ងជ្រៀតជ្រែកចូលក្នុងកិច្ចការផ្ទៃក្នុងរបស់ជាតិយើងតាមគ្រប់រូបភាព។ ត្រូវបង្ការទប់ស្កាត់ និងបង្ក្រាបឱ្យថាខាងតែបាន នូវរាល់សកម្មភាពប៉ុនប៉ង គ្រប់រូបភាព ដែលធ្វើឲ្យកម្ពុជាយើង ធ្លាក់ចូលក្នុងស្ថានភាពសង្គ្រាម ភាពចលាចល និងភាពវឹកវរក្នុងសង្គម ដែលរៀបចំដោយ ក្រុមប្រឆាំងខុសច្បាប់មួយចំនួនតូច។
សម្ដេចក្រឡាហោម បានស្នើឲ្យអាជ្ញាធរមូលដ្ឋាន ត្រូវអប់រំណែនាំប្រជាពលរដ្ឋ នៅគ្រប់មជ្ឈដ្ឋាន ឲ្យចៀសវាង កុំឲ្យចូលរួមក្នុង សកម្មភាពទាំងឡាយណា ដែលខុសច្បាប់ និងប៉ះពាល់ដល់សន្តិភាព សណ្ដាប់ធ្នាប់សាធារណៈ និងសង្គមជាតិ ជាពិសេសត្រូវខិតខំផ្សព្វផ្សាយ អប់រំប្រជាពលរដ្ឋ គ្រប់មជ្ឈដ្ឋាន អំពីផលវិបាក នៃការផ្ដួលរំលំរដ្ឋាភិបាលស្របច្បាប់ តាមរយៈការធ្វើសកម្មភាពពណ៌ បដិវត្តន៍ពណ៌ ដែលជាសកម្មភាពខុសច្បាប់ និងការចូលរួមសកម្មភាពខុសច្បាប់ ផ្សេងៗទៀត។ សម្ដេចក្រឡាហោមសខេង ក៏បានណែនាំឲ្យប្រជាពលរដ្ឋរួមគ្នា ប្តេជ្ញាចិត្តថែរក្សាសុខសន្តិភាព នៅក្នុងព្រះរាជាណាចក្រកម្ពុជា៕ ដោយ៖កូឡាប