ភ្នំពេញ ៖ ក្រុមហ៊ុន ទ្រី ភាព អេនជីនារីង និងខនស្ត្រាក់សិន ដែលមានលោកឧកញ៉ាទ្រីភាព ជាប្រធានក្រុមហ៊ុន បានស្នើសុំគោលការណ៍ អនុញ្ញាតពីរាជរដ្ឋជរដ្ឋាភិបាល ដើម្បីពីចុះសិក្សា បូមស្តារ និងធ្វើច្រាំងទន្លេមេគង្គ ចាប់ពីចំណុចមាត់ច្រកព្រំដែនកម្ពុជា-វៀតណាម ( ក្អមសំណ ) រហូតដល់ចំណុចភូមិសាស្ត្រព្រំប្រទល់ខេត្តកំពង់ចាម ក្រចេះ និងទន្លេបាសាក់ តាមគោលការណ៍ “យុទ្ធសាស្ត្រទន្លេចិញ្ចឹមទន្លេ”។ ចំពោះការស្នើសុំនេះ ត្រូវបានរាជរដ្ឋាភិបាលសម្រេចជូនរដ្ឋមន្ត្រីក្រសួងធនធានទឹក និងឧតុនិយម ពិភាក្សាជាមួយស្ថាប័នពាក់ព័ន្ធ និងផ្តល់មតិ។
ជាមួយនឹងសំណើរបស់ក្រុមហ៊ុនទ្រីភាពនោះ ហើយត្រូវបានបណ្ដាញសារព័ត៌មាន ជាច្រើនចុះផ្សាយព្រោងព្រាត ក៏មានលោក ហ៊ុន ជា ដែលជាក្មួយរបស់ សម្ដេចតេជោនាយករដ្ឋមន្ត្រី ក៏បានចូលខ្លួនមកបញ្ចេញមតិយោបល់ពាក់ព័ន្ធនឹងករណីក្រុមហ៊ុនទ្រីភាពនេះផងដែរ។ ដោយនៅថ្ងៃទី 10 ខែឧសភានេះ លោកហ៊ុន ជា បានសរសេរលើហ្វេសប៊ុករបស់លោកថា ” ធានារ៉ាប់រងទន្លេ “។ លោកហ៊ុនជាបានបន្ថែមទៀតថា “អាចនិយាយថាវាជាប្រវត្តិសាស្ដ ហើយដែលជនជាតិខ្មែរពឹងពាក់ទៅនឹងទន្លេ ព្រោះប្រទេសកម្ពុជា ជាប្រទេសកសិកម្ម ដែលមានប្រព័ន្ធធារាសាស្ដ្រធម្មជាតិ និង ប្រព័ន្ធផ្លូវទឹកជាច្រើនដូចជា ទន្លេសាប ទន្លេមេគង្គ ទន្លេមេគង្គលើ
ទន្លេមេគង្គក្រោម ទន្លេបាសាក់ ហើយទន្លេទាំងនោះ រស់នៅបែបធម្មជាតិ និងបានផ្ដល់ផលជាច្រើនសំរាប់បងប្អូនខ្មែរ។
ហើយឥឡូវ គេប្រុងបង្កើតទន្លេ អោយចិញ្ចឹមទន្លេ វិញ!!!!!……។
លោកហ៊ុន ជា ក៏ជាមន្ត្រីជាន់ខ្ពស់នគរបាលជាតិផងដែរនោះ បានបញ្ជាក់ថា “បើទន្លេចេះចិញ្ចឹមទន្លេមែន ឲ្យខ្ញុំសុំលេខទាក់ទង បងទន្លេមួយផង ព្រោះពេលមានបញ្ហា ” បាក់ច្រាំងទន្លេ ” ស្រួលខលហៅមកនិយាយគ្នា បើមិនចឹងទេ ដឹងតែបកស្រាយថាការបាក់ច្រាំងអីនឹង មកពីធម្មជាតិ អ្នកធ្វើទៀតហើយ។ យុទ្ធសាស្ដ្រ ” កន្ទេលធំ បន្លំដេក “, ពេញនិយមណាស់……កុំព្រោះតែផលប្រយោជន៍ របស់មនុស្សមួយក្រុម ធ្វើឲ្យបាត់បង់ធនធានធម្មជាតិ និងធ្វើឲ្យប្រជាជនក្រីក្រដែលរស់នៅអាស្រ័យផល និងទន្លេរងទុក្ខ លោកព្រះ។ ចេះរកនឹកឃើញអាហូតម៉ងយាយទៅ!!!!!!។ ការព្រួយបារម្ភពីខ្ញុំ”។
ក្រុមហ៊ុនទ្រីភាព អេនជីនារីង និងខនស្ត្រាក់សិន ដែលគេស្គាល់ថាជាបុត្រសម្ព័ន្ធរបស់ក្រុមហ៊ុនទ្រី ភាព គ្រុប របស់ឧកញ៉ាទ្រី ភាព បានដាក់ពាក្យស្នើសុំទៅកាន់ រាជរដ្ឋាភិបាលដើម្បី បានសិទ្ធិធ្វើអាជីវកម្ម ដោយសន្យាស្ថាបនាច្រាំងទន្លេ។
តាមលិខិតរបស់ទីស្តីការគណៈរដ្ឋមន្ត្រី សូមជម្រាបជូន រដ្ឋមន្ត្រីក្រសួងធនធានទឹកនិងឧតុនិយម ក្នុងករណីសំណើសុំគោលការណ៍ អនុញ្ញាតចុះសិក្សា និងធ្វើច្រាំងទន្លេមេគង្គ ចាប់ពីចំណុចមាត់ច្រកព្រំដែន កម្ពុជាវៀតណាម (ក្អមសំណរ) រហូតដល់ចំណុច ភូមិសាស្ត្រព្រំប្រទល់ខេត្តកំពង់ចាម ក្រចេះ និងទន្លេបាសាក់ តាមគោលការណ៍យុទ្ធសាស្ត្រទន្លេចិញ្ចឹមទន្លេ។
បើតាមគណៈរដ្ឋមន្ត្រីសំណើនេះយោងតាមចំណារដ៏ខ្ពង់ខ្ពស់របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាចុះថ្ងៃទី 1 ខែឧសភា ឆ្នាំ 2019។
បើតាមទីស្តីការគណៈរដ្ឋមន្ត្រី រាជរដ្ឋាភិបាល ស្នើឲ្យលោករដ្ឋមន្ត្រី លឹម គានហោ ពិភាក្សាជាមួយស្ថាប័នពាក់ព័ន្ធ នឹងផ្ដល់មតិ៕ ដោយ៖កូឡាប