ខេត្តព្រះសីហនុ៖ នៅរសៀលថ្ងៃទី១០ ខែឧសភា ឆ្នាំ២០១៩នេះ នៅមូលដ្ឋានកងរាជអាវុធហត្ថក្រុងព្រះសីហនុ បានរៀបចំពិធីបើកវគ្គបណ្តុះបណ្តាលជំនាញបច្ចេកទេសដល់យុវជនមួយចំនួន ដែលកំពុងទទួលការអប់រំបន្សាបគ្រឿងញៀន នៅមជ្ឈមណ្ឌលបន្សាបគ្រឿងញៀន នាមូលដ្ឋានកងរាជអាវុធហត្ថក្រុងព្រះសីហនុ។
ទាក់ទិនបញ្ហានេះ លោកវរសេនីយ៍ទោ ហ៊ត សីហា មេបញ្ជាការកងរាជអាវុធហត្ថក្រុងព្រះសីហនុ បានឲ្យដឹងថា បច្ចុប្បន្នមជ្ឈមណ្ឌលបន្សាបគ្រឿងញៀន របស់លោក មានយុវជនរងគ្រោះ ដោយគ្រឿងញៀនកំពុងទទួលការអប់រំ និងបន្សាបមានចំនួន ៩៧នាក់។
លោកថា យុវជនទាំងអស់គ្នានោះក្រោមការជួយទំនុកបំរុងពីលោកឧត្តមសេនីយ៍ត្រី ហេង ប៊ុនទី មេបញ្ជាការកងរាជអាវុធហត្ថខេត្តព្រះសីហនុ សហការជាមួយមូលដ្ឋានរាជអាវុធហត្ថក្រុងព្រះសីហនុ។
លោក ហ៊ត សីហា បន្តថា ចំពោះវគ្គបណ្តុះបណ្តាលជំនាញបច្ចេកទេសខាងលើនេះ បានរៀបចំដោយវិទ្យាស្ថានពហុបច្ចេកទេសមិត្តភាពកម្ពុជា-ចិន សហការជាមួយមូលដ្ឋានកងរាជអាវុធហត្ថក្រុងព្រះសីហនុ ដើម្បីផ្តល់ឱកាសដល់យុវជន ដែលរងគ្រោះពីគ្រឿងញៀន ឲ្យពួកគេមានជំនាញបច្ចេកទេសវិជ្ជាជីវៈ សម្រាប់ប្រកបរបរចិញ្ចឹមជីវិត ក្រោយពេលពួកគេ ធ្វើសមាហរណកម្មវិលត្រឡប់ទៅរួមរស់ជាមួយក្រុមគ្រួសារវិញ។
ចំណែក លោក ប៊ូ សំអាត ប្រធានវិទ្យាស្ថានពហុបច្ចេកទេសកម្ពុជា -ចិន បានឲ្យដឹងថា វគ្គបណ្តុះបណ្តាលនេះមានដូចជា៖ ជំនាញតបណ្តាញអគ្គីសនី, ជួសជុលរថយន្ត, ជួសជុលកំព្យួទ័រ, ផ្សារដែក និងជួសជុលម៉ាស៊ីនត្រជាក់ជាដើម។ វគ្គបណ្តុះបណ្តាលនេះ មានរយៈពេល៤ខែ ដោយចាប់សិក្សារៀនសូត្រ ចាប់ពីថ្ងៃទី១០ ខែឧសភា ឆ្នាំ២០១៩នេះតទៅ។
លោក ហ៊ត សីហា មេបញ្ជាការកងេជអាវុធហត្ថក្រុងព្រះសីហនុ បានឲ្យដឹងថា យុវជនបន្សាបគ្រឿងញៀន ដែលជាសិក្ខាកាម ហើយត្រូវមកចូលរួមវគ្គបណ្តុះបណ្តាលលើកនេះមានចំនួន ៤៥នាក់ ដោយជ្រើសរើសពីក្នុងចំណោមយុវជនបន្សាបគ្រឿងញៀន ទាំង៩៧នាក់ ដែលកំពុងអប់រំបន្សាបគ្រឿងញៀន នៅមូលដ្ឋានកងរាជអាវុធហត្ថក្រុងព្រះសីហនុ។ ហើយថា ពិធីបើកវគ្គបណ្តុះបណ្តាលនេះ ក៏មានវត្តមានអាណាព្យាបាលយុវជនទាំងអស់នោះបានមកចូលរួមផងដែរ៕ ដែន សីមា
