ព្រៃវែង ៖ ជនសង្ស័យដែលសម្លាប់គូស្នេហ៍នៅផ្ទះសំណាក់រំចង់ បានសារភាពប្រាប់សមត្ថកិច្ចថា មុនដំបូងពួកខ្លួនទាំង២នាក់ មានបំណងចូលផ្ទះសំណាក់ដើម្បីទៅរួមរ័ក្ស ប៉ុន្តែមិនទាន់រួមរ័ក្សផង ស្រាប់តែនាងបង្ខំឲ្យខ្លួនលែងលះប្រពន្ធ ចំណែកនាងលែងលះប្តី ហើយទៅរួមរស់នឹងគ្នាជាប្តីប្រពន្ធពេញសិទ្ធិ តែរូបគេមិនព្រម ទើបកើតទៅជាជម្លោះ វាយប្រវាយប្រតប់គ្នា រហូតដល់រូបគេត្រូវបង្ខំចិត្តរឹតក សម្លាប់នាងចោល។
នៅវេលាម៉ោង៣រសៀលថ្ងៃទី១០ ឧសភា នេះកម្លាំងសមត្ថកិច្ចបាននាំខ្លួនជនសង្ស័យ យកទៅធ្វើត្រាប់ បង្ហាញពីសកម្មភាពរបស់ខ្លួន ដែលរឹតកសម្លាប់នារីរងគ្រោះ។
ក្រោយពេលត្រូវចាប់ខ្លួន នៅចំពោះមុខសមត្ថកិច្ច ជនសង្ស័យបានឆ្លើយសារភាព រូបគេពិតជាបានធ្វើសកម្មភាពរឹតក សម្លាប់នារីរងគ្រោះឈ្មោះ ផែ ស្រីម៉ាក់ ពិតមែន ដោយសារតែមានទំនាស់ រហូតឈានដល់ប្រវាយប្រតប់គ្នា នៅក្នុងបន្ទប់កើតហេតុ។
ជនសង្ស័យ ជា ជាង បានបន្តទៀតថា ៖ រូបគេ និងនារីរងគ្រោះគឺជាសង្សារនឹងគ្នា មានប្តីប្រពន្ធ និងកូនរៀងៗខ្លួន ហើយនៅពេលកើតហេតុ ពួកគេមានបំណងចូលទៅរួមភេទធម្មតាទេ ប៉ុន្តែមិនទាន់បានអីផង ស្រាប់តែនារីរងគ្រោះ បង្ខំអោយរូបគេលែងលះប្រពន្ធ ចំណែករូបនាងលែងប្តី ហើយទៅរួមរស់នឹងគ្នាជាប្តីប្រពន្ធពេញសិទ្ធិ តែរូបគេមិនព្រម ទើបកើតទៅជាជម្លោះវាយប្រវាយប្រតប់គ្នា រហូតដល់រូបគេត្រូវបង្ខំចិត្តរឹតក សម្លាប់នាងតែម្តង។
សូមបញ្ជាក់ថា បន្ទាប់ពីពួកគេទាំង២នាក់ចូលទៅមិនដឹងពួកគេធ្វើអ្វីខ្លះក្នុងបន្ទប់ ខណៈសន្តិសុខផ្ទះសំណាក់ នឹកស្មានថា ផ្អែមល្ហែមហើយមើលទៅ មួយសន្ទុះក្រោយមក ខាងប្រុស បានចេញពីបន្ទប់មុន រួចជិះម៉ូតូខ្លួនទៅបាត់ ជាមួយមាសជិត២តម្លឹង ដោយបន្សល់ទុកម៉ូតូនារីរងគ្រោះនៅកន្លែងកើតហេតុ រីឯនារីនៅលើពូកក្នុងបន្ទប់ផ្ទះសំណាក់។ នារីរងគ្រោះឈ្មោះ ផែ ស្រីម៉ាក់ ភេទស្រីអាយុ២៥ឆ្នាំ មានទីលំនៅភូមិព្រែកបាក់ ឃុំព្រែកទន្លាប់ ស្រុកលើកដែក ខេត្តកណ្ដាល។ នាងមានកូនចំនួន២នាក់ និងមានប្ដីចំនួន ២ នាក់ដែរ ប៉ុន្តែមួយរយៈចុងក្រោយនេះ នាងបានលួចទាក់ទងមានសង្សារក្រោយ គឺជាជនសង្ស័យ។ ប្រភពបានឲ្យដឹងថា នាង មានប្តីដំបូងមានកូនមួយជាមួយគ្នា ហើយបានលែងលះគ្នា។ ក្រោយមកទៀត នាងបានយកប្ដីទី២ ជាមន្ត្រីកងរាជអាវុធហត្ថ ហើយបង្កើតកូនបានម្នាក់ទៀត ដោយរួមរស់ជាមួយគ្នារហូតដល់សព្វថ្ងៃ។ ប៉ុន្តែក្នុងពេលនាង រួមរស់ជាមួយប្ដីទី២នេះ នាងបានលួចទាក់ទង ជាមួយប្រុសសហាយម្នាក់ទៀត ដែលជាជនដៃដល់នោះ ជនសង្ស័យឈ្មោះ ជា ជាង ភេទប្រុសអាយុ៣០ឆ្នាំ មានទីលំនៅភូមិជ្រោយដងឃុំសំរោងធំ ស្រុកកៀនស្វាយ ខេត្តកណ្ដាល៕ ដោយ៖ញ្ញាស័ក្តិ