សហរដ្ឋអាមេរិចកំពុងធ្វើការបញ្ជូនប្រព័ន្ធការពារមីស៊ីលដែនអាកាសរបស់ខ្លួន និងនាវាចំបាំងមួយគ្រឿងទៅកាន់មជ្ឈិមបូព៌ា ក្រោយពេលមានភាពតានតឹងជាមួយអ៊ីរ៉ងកាន់តែខ្លាំង។
នាវាចំបាំង USS Arlington ដែលបានដឹកយន្តហោះចំបាំងជាច្រើនគ្រឿង នឹងចូលរួមជាមួយក្រុមនាវាដឹកយន្តហោះ USS Abraham នៅឈូងសមុទ្រ។ នេះបើតាមការបញ្ជាក់របស់មន្ត្រីអាមេរិច។
យន្តហោះទម្លាក់គ្រាប់បែកប្រភេទ B-52 បានធ្វើដំណើរទៅដល់មូលដ្ឋានទ័ពអាមេរិចក្នុងប្រទេសកាតាហើយ។ មន្ទីរបញ្ចាកោណអាមេរិចថ្លែងថា ការបញ្ជុនសព្វាវុធរបស់ខ្លួនគឺដើម្បីឆ្លើយតបទៅនឹងប្រតិបត្តិការគំរាមកំហែងរបស់អ៊ីរ៉ងប្រឆាំងនឹងអាមេរិច នៅក្នុងតំបន់។
នៅពេលជាមួយគ្នានេះដែរ ទីភ្នាក់ងារសារព័ត៌មានអ៊ីរ៉ងបានធ្វើការដកស្រង់សម្តីរបស់មន្ត្រីជាន់ខ្ពស់អ៊ីរ៉ង ដោយបានលើកឡើងថា កងនាវាយោធារបស់អាមេរិច អាចនឹងត្រូវបំផ្លាញចោល ដោយប្រើមីស៊ីលមួយគ្រាប់ប៉ុណ្ណោះ។
សូមបញ្ជាក់ថា ភាពតានតឹងរវាងអាមេរិច និងអ៊ីរ៉ងកំពុងកើនឡើងយ៉ាងខ្លាំងក្នុងរយៈពេលប៉ុន្មានថ្ងៃនេះ ក្រោយពេលអាមេរិចធ្វើការព្រមានអ៊ីរ៉ងថា វានឹងត្រូវរងការវាយបកវិញ ប្រសិនជាហ៊ានធ្វើការវាយប្រហារលើផលប្រយោជន៍អាមេរិច ឬសម្ព័ន្ធមិត្ត។
នៅថ្ងៃសុក្រម្សិលមិញនេះ មន្ទីរបញ្ចាកោណអាមេរិចបញ្ជាក់ថា អាមេរិចមិនចង់មានសង្គ្រាមជាមួយនឹងអ៊ីរ៉ងទេ ប៉ុន្តែ ទីក្រុងវ៉ាស៊ីនតោនបានត្រៀមខ្លួនរួចរាល់ក្នុងការការពារផលប្រយោជន៍អាមេរិចនៅក្នុងតំបន់៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC