ខេត្តព្រះសីហនុ ៖ នៅព្រឹកថ្ងៃសៅរ៍ ទី១១ ខែឧសភា ឆ្នាំ២០១៩នេះ សមាជិកសមាជិកា របស់សម្ព័ន្ធសមាគមសហគ្រាសធុនតូច និងមធ្យម ខេត្តព្រះសីហនុ បានធ្វើពិធីបរិច្ចាគឈាម ជូនមន្ទីរពេទ្យបង្អែកខេត្តព្រះសីហនុ ដែលខ្វះឈាមចាំបាច់ សម្រាប់ផ្តល់ជូនអ្នកជំងឺ ដែលមកសម្រាកព្យាបាលនៅមន្ទីរពេទ្យនេះ។
លោកឧកញ៉ា វណ្ណ សុខហេង ប្រធានសម្ព័ន្ឋសមាគមសហគ្រាសធុនតូច និងមធ្យមខេត្តព្រះសីហនុ ដែលបានដឹកនាំសមាជិកសមាជិកា ទៅបរិច្ចាគឈាមជូនមន្ទីរពេទ្យបង្អែកខេត្តព្រះសីហនុ។ លោកបញ្ជាក់ថា ដោយសារតែទទួលបានព័ត៌មានមកថា មន្ទីរពេទ្យបង្អែកខេត្តព្រះសីហនុ កំពុងខ្វះខាតឈាម និងត្រូវការឈាម ដើម្បីសង្គ្រោះជីវិតមនុស្សចាំបាច់នោះ ទើបរូបលោក បានអំពាវនាវដល់សមាជិកសមាជិកា របស់សម្ព័ន្ធសមាគមសហគ្រាសធុនតូចនិងមធ្យម ខេត្តព្រះសីហនុ ដើម្បីបរិច្ចាគឈាមឲ្យបានប្រភេទឈាមមួយចំនួន សម្រាប់ផ្តល់ជូនអ្នកជំងឺ ដែលត្រូវការឈាមជាចាំបាច់។
ផ្តើមពីបញ្ហានេះ លោកឧកញ៉ា វណ្ណ សុខហេង ដែលជាប្រធានសភាពាណិជ្ជកម្មខេត្តព្រះសីហនុផងនោះ ក៏បានអំពាវនាវដល់មន្ត្រីរាជការ, ប្រជាពលរដ្ឋ និងស្ថាប័នពាក់ពន្ធនានា ជាពិសេស លោក-លោកស្រី ដែលជាប្រធាន-អនុប្រធានសហគ្រាសធុនតូច និងមធ្យមទាំងអស់ នាខេត្តព្រះសីហនុ សូមមេត្តាជួយកៀងគរសមាជិកស្ម័គ្រចិត្ត របស់ខ្លួន ឲ្យមកចូលរួមបរិច្ចាគឈាមដោយស្ម័គ្រចិត្ត នៅថ្ងៃខាងមុខទៀត ជូនមន្ទីរពេទ្យបង្អែកខេត្តព្រះសីហនុ ឲ្យបានច្រើនថែមទៀត។
ឆ្លើយតបចំពោះកាយវិការមនុស្សធម៌នេះ លោកវេជ្ជបណ្ឌិត សេង ណុង ប្រធានមន្ទីរពេទ្យបង្អែកខេត្តព្រះសីហនុ មានប្រសាសន៍សាទរ ចំពោះសកម្មភាពមនុស្សធម៌ របស់សមាជិក-សមាជិកា សម្ព័ន្ធសមាគមសហគ្រាសធុនតូច និងមធ្យមខេត្តព្រះសីហនុ ដែលតែងចូលរួមបរិច្ចាគឈាម ជូនមន្ទីរពេទ្យបង្អែកជាបន្តបន្ទាប់មកនេះ។ លោកវេជ្ជបណ្ឌិតថា គិតមកដល់ពេលនេះ គឺជាលើកទី៤ ហើយដែល លោកឧកញ៉ា វណ្ណ សុខហេង ប្រធានសម្ព័ន្ធសមាគមសហគ្រាសធុនតូច និងមធ្យមខេត្តព្រះសីហនុ បានដឹកនាំសមាជិកមកបរិច្ចាគឈាម ដើម្បីសង្គ្រោះអាយុជីវិតមនុស្ស ស្របពេលមន្ទីរពេទ្យខេត្តព្រះសីហនុ កំពុងត្រូវការឈាមប្រើប្រាស់ប្រចាំថ្ងៃ ជាចាំបាច់ ដើម្បីជួយសង្គ្រោះអាយុជីវិតមនុស្ស ដែលមករកសេវាព្យាបាលជូនមន្ទីរពេទ្យបង្អែកខេត្តព្រះសីហនុ៕ ដែន សីមា
