ភ្នំពេញ៖ នៅព្រឹកថ្ងៃទី២៦ ខែធ្នូ ឆ្នាំ២០១៧នេះ រដ្ឋសភាជាតិ បានប្រកាសសុពលភាពសមាជិកថ្មី១រូប គឺលោក យិន ប៊ុនណាង និង បោះឆ្នោតជ្រើសតាំង លោក លី ឆេង ដើម្បីជាសមាជិកគណៈកម្មការនីតិកម្ម និងយុត្តិធម៌ នៃរដ្ឋសភា។
អគ្គលេខាធិការដ្ឋានរដ្ឋសភា បានចេញសេចក្តីប្រកាសព័ត៌មានស្តីពីលទ្ធផលសម័យប្រជុំរដ្ឋសភាលើកទី៩ នីតិកាលទី៥ ថ្ងៃអង្គារ ទី២៦ ខែធ្នូ ឆ្នាំ២០១៧ ក្រោមអធិបតីភាព សម្តេចអគ្គមហាពញាចក្រី ហេង សំរិន ប្រធានរដ្ឋសភា នៃព្រះរាជាណាចក្រកម្ពុជា ដោយមានវត្តមានសមាជិករដ្ឋសភាចំនួន១១០រូប។
បន្ទាប់ពីបានពិភាក្សា និងអនុម័ត តាមរបៀបវារៈនៃសម័យប្រជុំ បានសម្រេច៖ ១.ប្រកាសសុពលភាពអាណត្តិសមាជិកថ្មីគឺលោកយិន ប៊ុនណាង ជាតំណាងរាស្ត្រថ្មីមណ្ឌលខេត្តកំពង់ចាម ជំនួសលោកអ៊ឹម សិទ្ធី ដែលទទួលមរណភាព។ ២.បោះឆ្នោតជ្រើសតាំង លោក លី ឆេង ជាសមាជិកគណៈកម្មការនីតិកម្ម និងយុត្តិធម៌ នៃរដ្ឋសភា ដោយទទួលបានសំឡេងព្រមចំនួន១១១សំឡេង៕ ដោយ ៖ កូឡាប
