ខេត្តព្រះសីហនុ៖ អ្នកឃ្លាំមើលផែនការអភិវឌ្ឍសង្គម និង ប្រជាពលរដ្ឋមួយចំនួន រស់នៅតំបន់ទំនប់រលក ខេត្តព្រះសីហនុ បានអំពាវនាវដល់ លោក ឱម យ៉ិនទៀង ប្រធានអង្គភាពប្រឆាំងអំពើពុករលួយ ជួយបញ្ជូនមន្ត្រីចុះស៊ើបអង្កេត អំពីសកម្មភាព របស់លោក ឡឹង សុភាព ប្រធានការិយាល័យគយ និងរដ្ឋាករ ច្រកកំពង់ផែទំនប់រលក ដែលសង្ស័យបានបើកដៃឲ្យឈ្មួញ នាំចូលទំនិញគេចពន្ធខុសច្បាប់ ជាថ្នូរទទួលបានសំណូកពុករលួយ។
មន្ត្រីសង្គមស៊ីវិល និងប្រជាពលរដ្ឋ មានលំនៅឋានក្បែរកំពង់ផែទំនប់រលក ស្ថិតក្នុងសង្កាត់លេខ១ ក្រុងព្រះសីហនុ បានឲ្យអ្នកយកព័ត៌មាន CEN.COM.KH ប្រចាំខេត្តព្រះសីហនុដឹងថា ទំនិញគេចពន្ធជាច្រើនប្រភេទ រួមមាន៖ សម្ភារៈប្រើប្រាស់នៅក្នុងការិយាល័យ ឬសាលារៀន ម៉ូតូសេរីទំនើបៗ សំភារៈសំណង់ ភេសជ្ជៈកំប៉ុង ឬដប ស្រាបៀ គ្រឿងសំអាងគ្រប់ប្រភេទ គ្រឿងអេឡិចត្រូនិច និងទូរស័ព្ទដៃសេរីទំនើបៗជាដើម សង្ស័យថា បានបន្តនាំចូលតាមកំពង់ផែទំនប់រលក ឬ ផែ លោក សូ ជុងហ៊ួរ។
បុគ្គលិកកម្មករបំរើការនៅកំពង់ផែ សូ ជុងហ៊ួរ បានអះអាងថា មន្ត្រីការិយាល័យគយ និងរដ្ឋាករប្រចាំការនៅកំពង់ផែទំនប់រលក ឬ ផែលោក សូ ជុងហ៊ួរ ទំនងជា អាចមានឃុបឃិតគ្នាជាមួយឈ្មួញ ហើយអនុញ្ញាត ឲ្យឈ្មួញនាំចូលទំនិញចូលតាមច្រកកំពង់ផែនេះ ដោយមិនមានការត្រួតពិនិត្យទំនិញនាំចូលទាំងនោះ ឲ្យបានត្រឹមត្រូវទេ។ កម្មករកំពង់ផែទំនប់រលក អះអាងថា សកម្មភាពរថយន្តដឹកនាំទំនិញ នាំចេញតាមច្រកកំពង់ផែទំនប់រលក ទំនិញមួយចំនួន អាចជាទំនិញគេចពន្ធ នាំចូលខុសច្បាប់។ ហើយទំនិញគេចពន្ធទាំងនោះ ទំនងជា អាចមានបុគ្គលមានតួនាទីជាមន្ត្រីការិយាល័យគយ និងបុគ្គលជាថ្នាក់ដឹកនាំនៅតាមស្ថាប័នកងកម្លាំងប្រដាប់អាវុធខ្លះនាខេត្តព្រះសីហនុ បានឃុបឃិតជាមួយឈ្មួញ ជាថ្នូរទទួលបានសំណូកពុករលួយ ទើបអាចអនុញ្ញាតិឲ្យនាំចេញ ដោយមិនមានការត្រួតពិនិត្យឲ្យបានត្រឹមត្រូវជាមុននោះ។
កន្លងមកផែទំនប់រលកនេះ មន្ត្រីគយចល័ត បានសហការជាមួយសមត្ថកិច្ចស្ថាប័នជំនាញពាក់ព័ន្ធមានកងរាជអាវុធហត្ថជាដើម បានឆ្មក់ចាប់បានទំនិញនាំចូលគេចពន្ធជាច្រើនប្រភេទ រួមមាន៖ គ្រឿងអេឡិចត្រូនិច មានទូរស័ព្ទៃដៃសេរីទំនើបៗ អាចផេត និងសម្ភារៈប្រើប្រាស់ជាច្រើនប្រភេទទៀត ត្រូវបានឈ្មួញនាំចូលតាមច្រកកំពង់ផែទំនប់រលកនេះ ។
ផ្តើមពីបញ្ហានេះ ប្រជាពលរដ្ឋ និងកម្មករផែទំបន់រលក បានឲ្យដឹងថា ជាបន្តបន្ទាប់មកនេះ ទំនិញនាំចូលតាមច្រកកំពង់ផែនេះភាគច្រើន មិនត្រូវបានមន្ត្រីការិយាល័យគយ និងរដ្ឋាករ ព្រមទាំងសមត្ថកិច្ចស្ថាប័នពាក់ព័ន្ធ ប្រចាំការកំពង់ផែនេះ ធ្វើការត្រួតពិនិត្យ ទំនិញនាំចេញទាំងនោះឲ្យបានត្រឹមត្រូវទេ ឬគ្មានការត្រួតពិនិត្យតែម្តង។
ពលរដ្ឋកត់សម្គាល់ថា ជារៀងរាល់ថ្ងៃទំនិញ ដែលដឹកតាមរថយន្តសណ្តោងធំៗ និងមានបិទបាំងជិត មិនត្រូវបានមន្ត្រីការិយាល័យគយទំនប់រលក និងសមត្ថកិច្ចប្រចាំការ នៅច្រកកំពង់ផែនេះ ត្រួតពិនិត្យឲ្យបានដិតដល់នោះទេ។ ករណីនេះ ទំនងជាទាំងឈ្មួញនាំចូលទំនិញ និង លោក ឡឹង សុភាព ប្រធានការិយាល័យគយ និងរដ្ឋាករផែទំនប់រលក ត្រូវដងត្រូវផ្លែ ហើយចែកផលប្រយោជន៍ឲ្យគ្នាទៅវិញទៅមក ទើបរថយន្តសណ្តោងដឹកទំនិញមួយចំនួន ដែលដឹកនាំទំនិញចេញតាមច្រកផែទំនប់រលកគ្មានការត្រួតពិនិត្យបែបនេះ។
បញ្ហានេះដែរ មន្ត្រីអង្គការក្រៅរដ្ឋាភិបាល ប្រជាពលរដ្ឋ និងមន្ត្រីរាជការថ្នាក់ទាប មួយចំនួន រស់នៅខេត្តព្រះសីហនុ បានស្នើដល់ លោក ឱម យ៉ិនទៀង ប្រធានអង្គភាពប្រឆាំងអំពើពុករលួយ ជួយបញ្ជូនមន្ត្រីចុះស៊ើបអង្កេត សកម្មភាព របស់ លោក ឡឹង សុភាព ប្រធានការិយាល័យគយ និងរដ្ឋាករផែទំនប់រលក លើករណីពីបទសង្ស័យថា បានឃុបឃិតជាមួយឈ្មួញ លួចនាំចូលទំនិញគេចពន្ធ តាមច្រកកំពង់ផែទំនប់រលក ឲ្យបានឆាប់ ដើម្បីទប់ស្កាត់អំពើពុករលួយ ដែលនាំឲ្យបាត់បងប្រាក់ចំណូលថវិកាជាតិនាថ្ងៃអនាគត។
ទាក់ទិនបញ្ហានេះ ក្រុមអង្គការសង្គមស៊ីវិលមួយចំនួន នាខេត្តព្រះសីហនុ រួមមាន៖ គមអាដហុក និងអង្គការលីកាដូជាដើម ក៏ស្នើដល់ លោក ឱម យ៉ិនទៀង ប្រធានអង្គភាពប្រឆាំងអំពើពុករលួយ និង លោក គុណ ញឹម អគ្គនាយក នៃអគ្គនាយកដ្ឋានគយ និងរដ្ឋាករកម្ពុជា ឲ្យជួយបញ្ជូនមន្ត្រីចុះស្រាវជ្រាវ លើករណីចោទប្រកាន់ ជុំវិញបទល្មើសនាំចូលទំនិញគេចពន្ធតាមច្រកកំពង់ផែទំនប់រលក ឲ្យបានឆាប់។
អ្នកសម្របសម្រួលសមាគមអាដហុក (Adhoc) ប្រចាំខេត្តព្រះសីហនុ លោកស្រី ជៀប សុធារី ផ្តល់សម្ភាសឲ្យអ្នកយកព័ត៌មាន CEN.COM.KH ប្រចាំខេត្តព្រះសីហនុដឹងថា លោកស្រីធ្លាប់បានទទួលព័ត៌មាន ជុំវិញបទល្មើសនាំចូលទំនិញគេចពន្ធ ត្រូវឈ្មួញបានឃុបឃិតជាមួយមន្ត្រីគយ និងមន្ត្រីសមត្ថកិច្ចជំនាញស្ថាប័នខ្លះទៀត ប្រចាំការនៅច្រកកំពង់ផែទំនប់រលក ឬផែសូ ជុងហ៊ួរ និងកំពង់ផែឯកជនមួយចំនួនទៀតនៅស្រុកស្ទឹងហាវជាដើមនេះដែរ។
បទសង្ស័យនេះ លោកស្រី សុធារី បានស្នើដល់ លោក ឱម យ៉ិនទៀង ប្រធានអង្គភាពប្រឆាំងអំពើពុករលួយ ជួយបញ្ជូនមន្ត្រីចុះស្រាវជ្រាវ និងឈានទៅនាំខ្លួន បុគ្គលជា មន្ត្រីគយ ឬមន្ត្រីស្ថាប័នពាក់ព័ន្ធប្រចាំការនៅច្រកកំពង់ទំនប់រលក បញ្ជូនទៅកាន់តុលាការផ្តន្ទាទោសឲ្យបានឆាប់។
អ្នកឃ្លាំមើលសង្គមរូបនេះ សំណូមពរថា បើអង្គភាពប្រឆាំងអំពើពុករលួយ រកឃើញកំហុសឆ្គង ថាពិតជាមានមន្ត្រីគយ និងសមត្ថកិច្ចពាក់ព័ន្ធខ្លះ ពិតជាបានឃុបឃិតជាមួយឈ្មួញអនុញ្ញាត ឲ្យនាំចូលទំនិញគេចពន្ធខុសច្បាប់ តាមច្រកកំពង់ផែទំនប់រលក ជាថ្នូរទទួលបានសំណូកពុករលួយ គឺត្រូវកសាងសំណុំរឿងបញ្ជូន បុគ្គលទាំងនោះទៅកាន់តុលាការផ្តន្ទាទោសឲ្យបានធ្ងន់ធ្ងរ ដើម្បីជាការព្រមាន។
យ៉ាងនេះក្តី លោកស្រី ជៀប សុធារី បានទទួលស្គាល់ថា កន្លងមកបានឃើញសកម្មភាពមន្ត្រីសាខាគយ និងរដ្ឋាករខេត្តព្រះសីហនុ បានសហការជាមួយកម្លាំងនគរបាល និងកងរាជអាវុធហត្ថខេត្តនេះ ចុះត្រួតពិនិត្យរកឃើញម៉ូតូសេរីទំនើបៗ គ្រឿងអេឡិចត្រូនិច មានទូរស័ព្ទដៃទំនើប អាយផេត និងសម្ភារៈប្រើប្រាស់មួយចំនួន ត្រូវឈ្មួញបាននាំចូល និងដាក់លក់នៅតាមហាងមួយចំនួន នាខេត្តព្រះសីហនុ ដោយមិនបានបង់ពន្ធនាំចូល ហើយត្រូវមន្ត្រីគយចល័ត ចាប់ផាកពិន័យឲ្យបង់ពន្ធជូនរដ្ឋ បានជាច្រើនករណីជាបន្តបន្ទាប់មកនេះ។
អ្នកយកព័ត៌មាន CEN.COM.KH ប្រចាំខេត្តព្រះសីហនុ មិនទាន់អាចទាក់ទង លោក ទុំ ណូ ប្រធានសាខាគយ និងរដ្ឋាករខេត្តព្រះសីហនុ ពិសេស លោក ឡឹង សុភាព ប្រធានការិយាល័យគយ និងរដ្ឋាករផែទំនប់រលក ឬហៅថា ផែសូ ជុងហ៊ួរ ដើម្បីបំភ្លឺបានទេតាមទូរស័ព្ទ ទៅលើករណីចោទប្រកាន់ដែលថា មានបទល្មើសនាំចូលទំនិញគេចពន្ធអនាធិបតេយ្យ ត្រូវឈ្មួញឃិបឃិតនាំចូលតាមច្រកកំពង់ទំនប់រលកនេះបានទេ នៅថ្ងៃអង្គារ ទី២៦ ខែធ្នូ ឆ្នាំ២០១៧។
ទោះជាបែបនេះក្តី មន្ត្រីសង្គស៊ីវិល និងប្រជាពលរដ្ឋ រស់នៅម្តុំផ្សារទំនប់រលក មានទីតាំងនៅជាប់កំពង់ផែឯកជនទំនប់រលក ឬផែ សូ ជុងហ៊ួរ នៅតែទទូចស្នើដល់ លោក ឱ យ៉ិនទៀង ប្រធានអង្គភាពប្រឆាំងអំពើពុករលួយ ឲ្យជួយបញ្ជូនមន្ត្រីចុះស៊ើបអង្កេត សកម្មភាព របស់ លោក ឡឹង សុភាព ប្រធានការិយាល័យគយ និងរដ្ឋាករទំនប់រលក ដែលសង្ស័យថា បានឃុបឃិតបើកដៃឲ្យឈ្មួញនាំចូលទំនិញគេចពន្ធ តាមច្រកកំពង់ផែទំនប់រលក ជាថ្នូរទទួលបានសំណូកពុករលួយ ឲ្យបានឆាប់ ដើម្បីទប់ស្កាត់បទល្មើសនាំចូលទំនិញគេចពន្ធឲ្យថយចុះនាថ្ងៃអនាគត និងជួយបង្កើនចំណូលថិវកាជាតិ៕ ដែន សីមា