ភ្នំពេញ ៖ អ្នកនាំពាក្យអគ្គនាយកដ្ឋានពន្ធនាគារ បានចេញសារប្រតិកម្មយ៉ាងខ្លាំង ទៅលើក្រុមជនជតិចិនមួយក្រុម ដែលចេញវីដេអូបង្ហាញធ្វើចរិកចង់ត្រួតត្រា គ្រប់គ្រង ក្អេងក្អាង ក្នុងខត្តព្រះសីហនុ ដោយលោកបញ្ជាក់ថា ក្រុមអន្ធពលក្រុមនេះ រកតែគ្រែដេកមិនបានផង ចង់មកអុកឡុកខេត្តព្រះសីហនុផង។
លោក នុត សវនា អ្នកនាំពាក្យអគ្គនាយកដ្ឋានពន្ធនាគារ នៅថ្ងៃទី 13 ខែឧសភាឆ្នាំ 2019 បានសរសេរលើផេកហ្វេសប៊ុកផ្លូវការរបស់លោកថា “រកគ្រែដេកមិនទាន់បានស្រួលបួលផង កុមារមួយក្រុមមកពីខេត្តឆុងឈីងចង់មកគ្រប់គ្រងខេត្តព្រះស៊ីហនុ ។ តែបើអាជ្ញាធរដែនដីចាត់ការក្មេងអន្ធពាលប្រភេទនេះ ក្នុងទឹកដីខ្លួនមិនបានទេ វាក៏មិនសក្តិសមឲ្យពលរដ្ឋគោរពឲ្យតម្លៃយើងទៀតដែរ”។
សូមបញ្ជាក់ថា បើតាមមើលពីទិដ្ឋភាពតាមរយៈវីដេអូនេះ គឺក្រុមជនជាតិចិនប្រមាណជាង 10 នាក់នេះ គេបានស្នាក់នៅក្នុងបន្ទប់តូចមួយ និងមានគ្រែពីរបីដែលដេកលើគ្នា តែប៉ុណ្ណោះ។
កាលពីថ្ងៃទី 12 ខែឧសភា ស្ថានទូតចិនប្រចាំកម្ពុជា បានសរសេរលើផេកហ្វេសប៊ុកផ្លូវការរបស់ខ្លួន ដែលបានលើកឡើងថា
ស្ថានទូតសាធារណរដ្ឋប្រជាមានិតចិនប្រចាំកម្ពុជា បង្ហាញការយកចិត្តទុកដាក់ខ្ពស់ ចំពោះវីដេអូជនជាតិចិន សង្ស័យពាក់ព័ន្ធនឹងសង្គមងងឹត ដែលត្រូវបានផ្សព្វផ្សាយតាមបណ្ដាញសង្គម។
ស្ថានទូតចិនបានបញ្ជាក់ថា ក្នុងពេលថ្មីៗនេះ បុរសជាងដប់នាក់ ដែលហៅខ្លួនឯងជាជនជាតិចិន មកពីទីក្រុង chongqing បានបង្ហោះវីដេអូខ្លីមួយ ពាក់ព័ន្ធនឹងសកម្មភាពសង្គមងងឹត និយាយយ៉ាងក្អេងក្អាងថា នឹងបំពុលដល់សន្តិសុខ នៅខេត្តព្រះសីហនុ។
ស្ថានទូតចិនប្រចាំកម្ពុជា មានការយកចិត្តទុកដាក់ខ្ពស់ ចំពោះបញ្ហានេះ និងបានជួយសម្របសម្រួល ដល់សមត្ថកិច្ច នៃប្រទេសចិន និងកម្ពុជា ដើម្បីបេីកការស៊េីបអង្កេត ឲ្យបានគ្រប់ជ្រុងជ្រោយ លេីបញ្ហាមួយនេះ។ ជឿជាក់ថាការពិតនៃបញ្ហានេះ នឹងត្រូវបានលាតត្រដាង ក្នុងពេលឆាប់ៗ ករណីមានការវិវត្តន៍អ្វីថ្មី យេីងខ្ញុំនឹងធ្វេីការប្រកាសជូនដំណឹងបន្តទៀត ឲ្យបានទាន់ពេល។
សូមបញ្ជាក់ថា ជនជាតិចិនមួយក្រុម ដែលបានបង្ហោះវីដេអូ ស្រែកគំរាមថា ពួកគេមកពីខេត្តឆុងឆីង ចង់បង្កអសន្ដិសុខ នៅខេត្តព្រះសីហនុ ។ មួយឡើងការគំរាមរបស់ជនជាតិចិន តាមរយៈវីដេអូនេះ កម្លាំងនគរបាលខេត្តព្រះសីហនុ សហការជាមួយ នាយកដ្ឋានជំនាញដែលពាក់ព័ន្ធ កំពុងបើកប្រតិបត្តិការ ដើម្បីតាមស្វែងរកចាប់ខ្លួនពួកគេទាំងនោះ យកមកផ្តន្ទាទោសតាមច្បាប់ ព្រោះថាកម្ពុជា មិនអាចឲ្យមានជនណា ឬក្រុមណាមួយ មកគំរាមកំហែងលើដីរបស់ខ្លួនឡើយ ៕ ដោយ៖កូឡាប
