ប្រទេសចិន ៖ ស្នងការនគរបាលរាជធានីភ្នំពេញ លោក ស ថេត បានបញ្ជាក់ថា ៖ លោកចង់បានកាមេរ៉ាសុវត្ថិភាព ដែលអាចថតបានចម្ងាយ ១០គីឡូម៉ែត មកបំពាក់នៅរាជធានីភ្នំពេញ វានឹងមានប្រយោជន៍ សម្រាប់ដឹងហេតុការណ៍ បានទាន់ហេតុការណ៍ នៅពេលមានគ្រោះថ្នាក់ចរាចរ កាមេរ៉ាសុវត្ថិភាពអាចវិភាគជនបង្កថា តើពាក់អាវពណ៌អី ឡានពណ៌អី ស្លាកលេខ សក់ពណ៌អីជាដើម ។
លោក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ បានដឹកនាំប្រតិភូ មកសិក្សាស្វែងយល់បច្ចេកវិទ្យាទំនេីប ដេីម្បីជួយដោះស្រាយបញ្ហាគ្រោះថ្នាក់ចរាចរណ៍ និងបង្ក្រាបបទល្មេីសនៅក្នុងរាជធានីភ្នំពេញ នៅខេត្តស៊ិនជិន នៃសាធារណរដ្ឋប្រជាមានិតចិន កាលពីថ្ងៃទី១៣ ខែឧសភា ឆ្នាំ២០១៩។
បើតាមការផ្សព្វផ្សាយនៅលើ facebook លោក ស ថេត បានថ្លែងថា ៖ ព្រឹកនេះ ខ្ញុំនិងប្រតិភូ បានមកដល់ក្រុមហ៊ុនបំពាក់កាមេរ៉ាសុវត្ថិភាពតាមដងផ្លូវ ហើយបន្ទាប់ពីធ្វេីបទបង្ហាញយ៉ាងក្បោះក្បាយ ឃើញថាកាមេរ៉ាសុវត្ថិបច្ចេកវិទ្យាចុងក្រោយៗ មានប្រយោជន៍យ៉ាងច្រេីនសម្រាប់សមត្ថកិច្ច ដូចជា នៅពេលមានគ្រោះថ្នាក់ចរាចរណ៍ កាមេរ៉ាសុវត្ថិភាពអាចវិភាគជនបង្កថាតើពាក់អាវពណ៌អី ឡានពណ៌អី ស្លាកលេខ សក់ពណ៌អីជាដើម ហើយនៅពេលបំពាក់កាមេរ៉ាច្រេីន យើងនឹងកាត់បន្ថយមនុស្សធ្វេីការតាមដងផ្លូវ។
លោកបានបន្តថា “ខ្ញុំបានចាប់អារម្មណ៍កាមេរ៉ាសុវត្ថិភាព ដែលអាចថតបានចម្ងាយ១០គីឡូម៉ែត ហើយបើយើងបំពាក់នៅរាជធានីភ្នំពេញ វានឹងមានប្រយោជន៍សម្រាប់ដឹងហេតុការណ៍បានទាន់ហេតុការណ៍”។
គ្រាន់តែខេត្តស៊ិនជិនមួយ បានបំពាក់កាមារ៉ាសុវត្ថិភាពជាង១លានគ្រឿង ហើយប្រជាជននៅខេត្តនេះ មានជាង ២០លាននាក់ ៕ ដោយ ៖ បញ្ញាស័ក្តិ
