បាត់ដំបង ៖ នៅវេលាម៉ោង ៣និង៣០ នាទី ទៀបភ្លឺ ថ្ងៃទី១៣ ខែឧសភា ឆ្នាំ២០១៩ នៅចំណុចមុខផ្សារពោធិ៍វង្ស ស្ថិតក្នុងភូមិចំការសំរោង១ សង្កាត់ចំការសំរោង ក្រុង/ខេត្តបាត់ដំបង កម្លាំងមូលដ្ឋានកងរាជអាវុធហត្ថក្រុងបាត់ដំបង បានការបង្ក្រាបករណីដឹកជញ្ជូនឈើដោយគ្មានលិខិតអនុញ្ញាត ដោយឃាត់ខ្លួនជនសង្ស័យចំនួន ០២ នាក់។
ជនសង្ស័យចំនួន ០២ នាក់ ដែលជាអ្នកដឹកជញ្ជូនឈើដោយខុសច្បាប់នោះ ១. ឈ្មោះ ខៀវ ពន្លឺ ហៅ ម៉ាប់ ភេទប្រុស អាយុ ៣៣ ឆ្នាំ មុខរបរបើកបរ មានទីលំនៅភូមិស្វាយរលំ ឃុំស្វាយរលំ ស្រុកស្អាង ខេត្តកណ្តាល ។ ២. ឈ្មោះ ហៀប ង៉ា ភេទប្រុស អាយុ ៣៥ ឆ្នាំ មុខរបរធ្វើស្រែ មានទីលំនៅភូមិដា ឃុំចម្រើន ស្រុកសង្គមថ្មី ខេត្តព្រះវិហារ ។ វត្ថុតាងដកហូតមានឈើ ចំនួន ២១ សន្លឹក និងរថយន្តចំនួន ០១ គ្រឿង។
ជនសង្ស័យ និងវត្ថុតាងត្រូវបានមន្ត្រីជំនាញ ប្រគល់ឱ្យផ្នែករដ្ឋបាលព្រៃឈើបាត់ដំបង ដើម្បីបន្តនីតិវិធី ៕ ដោយ ៖ បញ្ញាស័ក្តិ