ប្រទេសចិនបាននិយាយថា ខ្លួននឹងធ្វើការដំឡើងពន្ធលើទំនិញនាំចូលពីសហរដ្ឋអាមេរិចដែលមានតម្លៃជាទឹកប្រាក់ ៦០ពាន់លានដុល្លារ ហើយការសងសឹកនោះនឹងចាប់ផ្តើមអនុវត្តចាប់ពីថ្ងៃទី ១ ខែមិថុនាខាងមុខ។
វិធានការតបតរបស់ចិននេះកើតឡើងតែ ៣ថ្ងៃប៉ុណ្ណោះ ក្រោយពេលសហរដ្ឋអាមេរិចបានដំឡើងពន្ធលើសទ្វេដងលើទំនិញនាំចូលពីចិន ដែលមានទំហំទឹកប្រាក់ ២០០ពាន់លានដុល្លារ។
ប្រធានាធិបតីអាមេរិច ដូណាល់ ត្រាំបានធ្វើការព្រមានចិនកុំអោយដំឡើងពន្ធ ប៉ុន្តែទីក្រុងប៉េកាំងឆ្លើយបកវិញថា ខ្លួនមិនសុខចិត្តទ្រាំលេបផ្លែឈើល្វីងណា ដែលធ្វើឲ្យប៉ះពាល់ដល់ផលប្រយោជន៍របស់ខ្លួននោះទេ។
ទំនិញរបស់អាមេរិចដែលចិននឹងត្រូវធ្វើការដំឡើងពន្ធរួមមាន សាច់គោ សាច់ចៀម សាច់ជ្រូក និងផលិតផលជាច្រើនទៀតដូចជាបន្លែ ទឹកផ្លែឈើ ប្រេងឆា កាហ្វេ និងតែជាដើម។
អ្នកនាំពាក្យក្រសួងការបរទេសចិន លោក Geng Shuang បានថ្លែងប្រាប់សន្និសិទក្នុងទីក្រុងប៉េកាំងថា ចិននឹងមិនចុះញមជាមួយសម្ពាធខាងក្រៅឡើយ។
រហូតមកដល់ពេលនេះ ភាគហ៊ុននៅអឺរ៉ុប និងអាមេរិចមានការធ្លាក់ចុះយ៉ាងខ្លាំង៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC
