ប្រធានាធិបតីអាមេរិចដូណាល់ ត្រាំ បានថ្លែងថា លោកនឹងធ្វើការជួបគ្នាផ្ទាល់ជាមួយនឹងមេដឹកនាំចិន ស៊ី ជីនពីងនៅកិច្ចប្រជុំកំពូល G20 ខែក្រោយ។ ការប្រកាសពីគំរោងជួបគ្នានេះកើតឡើង ក្រោយសង្គ្រាមពាណិជកម្មរវាងប្រទេសទាំងពីរស្ថិតដល់ចំណុចក្តៅខ្លាំង។
លោក ត្រាំបានធ្វើការព្យាករណ៍ថា កិច្ចប្រជុំជាមួយនឹងលោក ស៊ី ទំនងជាផល់ផ្លែការល្អ ដោយលោកជឿជាក់ថា ប្រទេសចិនចង់ឈានដល់កិច្ចព្រមព្រៀង។
សូមបញ្ជាក់ថា អាមេរិច និងចិនកំពុងដំឡើងធ្មុងដាក់គ្នាទៅវិញទៅមកតាមរយៈសង្គ្រាមពាណិជ្ជកម្ម ដែលធ្វើឲ្យទីផ្សារភាគហ៊ុនមានការធ្លាក់ចុះយ៉ាងខ្លាំង។
កាលពីថ្ងៃសុក្រកន្លងទៅ លោកដូណាល់ ត្រាំបានប្រកាសដំឡើងពន្ធនាំចូលទំនិញពីចិនដែលមានតម្លៃជាទឹកប្រាក់ ២០០ពាន់លានដុល្លា។ អាមេរិចបានដំឡើងពន្ធពី ១០ភាគរយទៅ ២៥ភាគរយ។
ប៉ុន្តែវិធានការនេះ មិនអាចធ្វើឲ្យចិនទ្រាំបាននោះទេ តែចិនបានធ្វើការវាយបកសងសឹកវិញ ដោយនៅថ្ងៃច័ន្ទម្សិលមិញនេះដែរ ចិនក៏បានប្រកាសការដំឡើងពន្ធដែរលើទំនិញនាំចូលអាមេរិចទំហំទឹកប្រាក់ ៦០ពាន់លានដុល្លា។ ការអនុវត្តពន្ធនឹងចាប់ផ្តើមធ្វើនៅខែដើមខែមិថុនាតែម្តង៕
អត្ថបទប្រែសម្រួលដោយ៖ សុភ័ក្រ
ប្រភព៖ CNN
