ខេត្តព្រះសីហនុ ៖ ប្រធានមន្ទីរពេទ្យបង្អែកខេត្តព្រះសីហនុ គឺលោក វេជ្ជបណ្ឌិត សេង ណុង បានឲ្យ ដឹងនៅព្រឹកថ្ងៃទី១៤ ខែឧសភានេះថា រយៈពេល ៤ខែ ដើមឆ្នាំ២០១៩ មន្ទីរពេទ្យនេះ បើកទទួលសេវា បានលទ្ធផលដូចជា ៖ ពិគ្រោះព្យាបាលជំងឺក្រៅ ៩,៦១៦ករណី។ ឆ្នាំ២០១៨ មានចំនួន ៧,៥៩៤ករណី គឺបានកើនឡើង ២,០២២ករណី។
លោកវេជ្ជបណ្ឌិត សេង ណុង បន្តថា ចំពោះអ្នកជំងឺ ដែលបានមកសម្រាកព្យាបាល នៅមន្ទីរពេទ្យបង្អែកខេត្តព្រះសីហនុ សរុបមានចំនួន ៥,០៦៧ករណី។ បើប្រៀបឆ្នាំ២០១៨ សរុបមានចំនួន ៣,៣៥៣ករណី គឺបានកើនឡើង ១,៧១៤ករណី។
លោកវេជ្ជបណ្ឌិតបន្តថា ៖ កុមារមានអាយុក្រោម ៥ឆ្នាំ ដែលបានមកសម្រាកព្យាបាលមានចំនួន ៥៦៥ករណី។ ឆ្នាំ២០១៨ មានចំនួនសរុប ៤០៧ករណី គឺបានកើនឡើង ១៥៨ករណី។
លោក សេង ណុង ប្រធានមន្ទីរពេទ្យបង្អែកខេត្តព្រះសីហនុ បានបញ្ជាក់ថា ចំពោះស្ត្រីមកសម្រាលកូនសរុបមានចំនួន ១,០៧៥ ករណី។ បើគិតតាមពេលវេលា ៤ខែដូចគ្នាដើមឆ្នាំ២០១៨ សរុបមានចំនួន ៨៣៦ករណី គឺបានកើនឡើង ២៣៩ករណី។
ចំណែក អត្រាប្រើប្រាស់គ្រែ មានចំនួន ១៤១.៥៧%។ ឆ្នាំ២០១៨ សរុបមានចំនួន ១០៤.៦៨% គឺ កើនឡើង ៣៦.៨៩%។
ដោយឡែក ចំពោះអត្រាស្លាប់វិញ លោកវេជ្ជបណ្ឌិត សេង ណុង បញ្ជាក់ថា បានកើតមានចំនួន ១.១៨%។ ឆ្នាំ២០១៨ សរុបមានចំនួន ១.៧១% បានថយចុះ ០.៥៣%៕ ដោយ ៖ ដែន សីមា