ស្រុកខ្សាច់កណ្តាល ៖ ករណីអំពើហិង្សាក្នុងគ្រួសារ នគរបាលស្រុកខ្សាច់កណ្ដាលបានចាប់ខ្លួនបុរសជាប្ដីដែលស្រវឹងស្រាជោកជាំ វាយប្រពន្ធដោយសារខឹងរឿងពាក់លុយគេ ដែលកើតហេតុថ្ងៃចន្ទ័១០កើត ខែពិសាខ ឆ្នាំកុរ ឯកស័ក ពស២៥៦២ ត្រូវនឹងថ្ងៃទី១៣ឧសភា២០១៩ វេលាម៉ោង ១៩និង៤៥ នាទី ចំណុចភូមិព្រែកតាមាក់ ឃុំព្រែកតាមាក់ ស្រុកខ្សាច់កណ្តាល ខេត្តកណ្តាល។
ជនរងគ្រោះ ឈ្មោះ ភុន ចាន់ណា ភេទស្រី អាយុ ៣០ឆ្នាំ ជនជាតិខ្មែរ មុខរបរ អ៊ុតសក់ ទីលំនៅភូមិព្រែកតាសោម ឃុំឫស្សីជ្រោយ ស្រុកមុខកំពូល ខេត្តកណ្ដាល (ប្រពន្ធ) ។ ជនសង្ស័យឈ្មោះ លុក ភណ័ ហៅ គុណ ភេទ ប្រុស មុខរបរបើករថយន្តដឹកឥដ្ឋ មានទីលំនៅភូមិព្រែកតាសោម ឃុំឫស្សីជ្រោយ ស្រុកមុខកំពូល ខេត្តកណ្ដាល (ឃាត់ខ្លួន) ជាប្តី ។
នគរបាលបានបញ្ជាក់ប្រាប់ពីសភាពរឿងហេតុនៃករណីអំពើហិង្សានេះថា ៖ រយៈពេល១០ខែមកហើយដែលជនរងគ្រោះនិងជនសង្ស័យមកជួលផ្ទះស្នាក់នៅឯភូមិឃុំកើតហេតុ ហើយសព្វថ្ងៃជនរងគ្រោះមានផ្ទៃពោះ៦ខែ (កូនភ្លោះ) ។
នៅថ្ងៃទី១៣ ខែឧសភា ឆ្នាំ២០១៩ វេលាម៉ោង ១៩និង៤៥ នាទី ជនសង្ស័យបានហូបស្រាស្រវឹងមាត់ឡូឡារករឿងជេរប្រមាថជនរងគ្រោះ ដែលជំពាក់លុយគេ តែជនរងគ្រោះមិនតបតទេ ស្រាប់តែជនសង្ស័យវាយជនរងគ្រោះជាច្រើនដៃត្រូវចំក្បាល មុខ ថ្ងាស និងពោះ ពេលនោះជនរងគ្រោះបានសំពះអង្វរ តែជនសង្ស័យមិនស្តាប់ហើយវាយជនរងគ្រោះប្រហែល២០ដៃទៀត បណ្តាលឱ្យជនរងគ្រោះរងរបួសហើមពកថ្ងាស ហើមមុខខាងឆ្វេង ហើមភ្នែកខាងឆ្វេង ពកក្បាល និងមានឈាមហូរតាមទ្វារមាស បន្ទាប់មកជនរងគ្រោះបានមកដាក់ពាក្យបណ្តឹងនៅប៉ុស្តិ៍នគរបាលព្រែកតាមាក់ កម្លាំងនគរបាលប៉ុស្តិ៍ចុះអន្តរាគមន៍ឃាត់ខ្លួនជនសង្ស័យបញ្ជូនមក អធិការដ្ឋាននគរបាលស្រុក ដើម្បីចាត់ការតាមនិតិវិធី ៕ ដោយ ៖ កូឡាប