ភ្នំពេញ៖ បុរសម្នាក់ស្លាប់ ក្នុងករណីឃាតកម្ម ដែលកើតឡើងពីទំនាស់ពាក្យសំដី ដោយពួកក្មេងទំនើងមួយក្រុមព្រួតគ្នាវាយបុរសរូបនោះស្លាប់ក្នុងថ្លុកឈាម នៅម៉ោង២៤ ថ្ងៃអង្គារ៍ ទី២៥ ខែ ធ្នូ ឆ្នាំ២០១៧នៅផ្លូវលំ មុខផ្ទះលេខ១A ភូមិទួលពង្រ សង្កាត់ ចោមចៅទី១ ខណ្ឌ ពោធិ៍សែនជ័យ។ សពឈ្មោះ ឈឿងសូរិយាភេទប្រុស អាយុ ២៨ ឆ្នាំ មុខរបរលីសែង ទីលំនៅភូមិ ព្រៃគុយ ឃុំគោកខ្ចក ស្រុកកំពង់ត្របែក ខេត្តព្រៃវែង ស្នាក់នៅផ្ទះជួលភូមិទួលពង្រ សង្កាត់ ចោមចៅ១ខណ្ឌ ពោធិ៍សែនជ័យ។ អ្នករបួសឈ្មោះនួនសុវណ្ណៈភេទ ប្រុស អាយុ ២៥ ឆ្នាំ មុខរបរគ្រូបង្រៀននៅសំឡូតខេត្ត បាត់ដំបង។
នៅវេលាម៉ោង១៦ថ្ងៃទី២៥ ខែធ្នូ ឆ្នាំ២០១៧ឈ្មោះនួនសុវណ្ណៈ បាននាំគ្នាផឹកស៊ីជាមួយបងប្អូន នៅមុខផ្ទះរបស់ខ្លួន អស់ស្រាបៀរអង្គរចំនួន៦កំប៉ុង។ ឈ្មោះ នួនសុវណ្ណៈបានទូរស័ព្ទហៅមិត្តភក្តិឈ្មោះឈឿងសូរិយា (សព) បានមួយសន្ទុះ ឈ្មោះឈឿងសូរិយា ក៏មកដល់ ក៏ឡើងទៅផឹកស៊ីនៅលើបន្ទប់ផ្ទះជាន់ទី២ មានគ្នាចំនួន៨នាក់ អស់ស្រាថ្នាំប្រហែលជាង៦លីត្រ។
ពេលផឹកអស់ ឈ្មោះឈឿងសូរិយា បានឲ្យឈ្មោះ នួន វណ្ណៈ ជិះម៉ូតូម៉ាកឌុបជូនទៅបន្ទប់ជួលនៅខាងកើត ភូមិទួលពង្រ រួចក៏នាំគ្នាទិញស្រាបៀរកម្ពុជាចំនួន៤កំប៉ុង ផឹកអស់ម្នាក់ ២ កំប៉ុងទៀត។ រហូតដល់ម៉ោង២៣៖៣០នាទី ឈ្មោះនួនវណ្ណះ បានបបួលឈ្មោះឈឿងសូរិយា (សព) ឲ្យជូនទៅយកប្រពន្ធនៅហាងតាម៉ាប់ នៅផ្លូវវេងស្រេង ក្នុងសង្កាត់ស្ទឹងមានជ័យ៣។ រួចក៏ផឹកបន្តទៀតរង់ចាំប្រពន្ធចេញពីធ្វើការ។ លុះដល់ម៉ោង២៤ ប្រពន្ធរបស់ឈ្មោះនួនវណ្ណៈចេញ ក៏នាំគ្នាទៅហូបបបរនៅផ្សារដើមគរ ពេលហូបរួច ក៏នាំគ្នាជិះម៉ូតូត្រឡប់មកផ្ទះវិញ ពេលជិះមកដល់ម្តុំរោងចក្រកន្លែងផ្ទះជួល ផ្សារទួលពង្រ ស្រាប់តែមានមនុស្សគប់ដបទឹកសុទ្ធមកលើខ្លួន។ ពេលនោះឈ្មោះ នួនវណ្ណៈ ក៏បត់ម៉ូតូត្រឡប់ក្រោយ មកសួរថា ហេតុអីបានជាគប់ខ្ញុំ ក៏ទំនាស់ពាក្យសំដីគ្នា ហើយឈ្មោះនួនវណ្ណៈក៏នាំគ្នាជិះម៉ូតូត្រឡប់មកផ្ទះវិញ ឈរលេងនៅមុខផ្ទះ ពេលនោះស្រាប់តែមានជនសង្ស័យមានគ្នា៥នាក់ ជិះមូតូ៣គ្រឿង (មួយគ្រឿងម៉ាកPCXពណ៌ស មិនចាំស្លាកលេខ និង២គ្រឿងទៀត មិនស្គាល់) ប្រដាប់ដោយដំបង វាយមកលើជនរងគ្រោះ បណ្តាលឲ្យស្លាប់ និងរបួស។ ជនរងគ្រោះស្លាប់ ដោយវាយបែកក្បាល ហើយសាកសពប្រគល់ឲ្យក្រុមគ្រួសារយកទៅខេត្តព្រៃវែង៕ ដោយ៖កូឡាប
