តាកែវ ៖ បន្ទាប់ពីមន្ត្រីកាំកុងត្រូលបានធ្វើការចុះត្រួតពិនិត្យស្ថានីយ៏ប្រេងសាំងនិងដេប៉ូចែកចាយប្រេងសាំងមួយចំនួននៅក្នុងខេត្តតាកែវកាលពីពេលថ្មីនេះៗ ដោយរកឃើញថាបានលក់មិនគ្រប់ចំណុះលីត្រអោយអតិថិជនអ្នកប្រើប្រាស់ នៅព្រឹកថ្ងៃអង្គារ័៏ទី ២៦ ខែ ធ្នូ ឆ្នាំ ២០១៧នេះ អាជ្ញាធខេត្តតាកែវបានធ្វើការកោះហៅក្រុមម្ចាស់ស្ថានីយ៏និងដេប៉ូសាំងនៅក្នុងខេត្តតាកែវទាំងអស់មកប្រជុំប្រាប់អោយកែតម្រូវឡើងវិញ ហើយបើមិនកែតម្រូវនៅតែបន្តលក់មិនគ្រប់លីត្រតទៅទៀតនោះ អាជ្ញាធរខេត្តនិងចាត់វិធានការណ៏តាមផ្លូវច្បាប់តែម្ដង។
ថ្លែងនៅចំពោះមុខក្រុមម្ចាស់ស្ថានីយ៏ប្រេងនិងដេប៉ូសាំងនៅក្នុងកិច្ចប្រជុំដោះស្រាយបញ្ហាមិនប្រក្រតីលើគុណភាព និងបរិមាណប្រេងយានយន្តនៅតាមស្ថានីយ៍របស់ក្រុមហ៊ុន និងដេប៉ូចែកចាយប្រេងឥន្ធនៈ ក្នុងខេត្តតាកែវ លោក ខាន់ សុខា អភិបាលរងខេត្តតាកែវបានជម្រុញអោយ ម្ចាស់ស្ថានីយ៏និងដេប៉ូសាំងទាំងអស់ត្រូវប្រកបអាជីវកម្មដោយភាពស្មោះត្រង់ ពោលគឺមិនត្រូវលក់កេងបន្លំអតិថិជននោះទេ។ កន្លងអាជ្ញាធខេត្តមានការយោគយល់ដោយធ្វើការផ្សព្វផ្សាយនិងអោយម្ចាស់ស្ថានីយ៏សាំងនិងដេប៉ូសាំងទាំងអស់ត្រូវតែកែប្រែចំណុះលីត្រឡើងវិញ នៅពេលដែលមន្ត្រីជំនាញកាំកុងត្រូលបានចុះត្រួតពិនិត្យដោយរកឃើញថាស្ថានីយ៏ប្រេងសាំងជាច្រើនលក់មិនគ្រប់ចំណុះលីត្រហួសពីច្បាប់បានកំណត់ ដែលក្នុងរង្វង់១រយលីត្រច្បាប់អោយបាត់តែ២សេះទៅកន្លះលីត្រ តែស្ថាននីយ៏និងដេប៉ូសាំងក្នុងខេត្តបាត់រហូតដល់៥ទៅ៨លីត្រ។
លោក ខាន់ សុខា បានមានប្រសាសន៏បន្តថា ការប្រកបអាជីវកម្មមិនស្មោះត្រង់បែបនេះវាខុសទៅនិងច្បាប់ហើយវាក៏និងធ្វើអោយបាត់បង់ជំនឿទុកចិត្តពីអតិថិជនរបស់ខ្លួនផងដែរ។ នៅពេលខាងមុខឆាប់ៗនេះអាជ្ញាធខេត្តនិងដឹកនាំមន្ត្រីជំនាញចុះទៅពិនិត្យនៅតាមស្ថានីយ៏សាំង ដេប៉ូសាំង នៅទូទាំងខេត្តតាកែវ ហើយបើយើងរកឃើញថាមានការលក់ក្នុងតម្លៃមួយខុសប្រក្រតីនិងលក់មិនគ្រប់ចំណុះលីត្រ អាជ្ញាធរនិងធ្វើទៅតាមច្បាប់ដោយមានការផាកពិន័យនិងជាប់ពន្ធនាគារថែមទៀតផង។
លោក ប៉ោ លាងគង់ ប្រធានសាខាកាំកុងត្រូលខេត្តតាកែវបានថ្លែងថា ស្ថានីយ៏និងដេប៉ូសាំងក្នុងខេត្តតាកែវមួយចំនួនធំដែលមន្ត្រីលោកចុះធ្វើការត្រួតពិនិត្យគឺរកឃើញថាលក់មិនគ្រប់ចំណុះលីត្រនិងបានបោកប្រាស់អតិថិជន ដោយបន្លំសាំងធម្មតាថាជាសាំងស៊ុបពែថែមទៀតផង។ នេះគឺជាការធ្វើពាណិជ្ជកម្មមិនស្មោះត្រង់និងខុសច្បាប់ត្រង់មាត្រាទី៦៣នៃច្បាប់មាត្រាសាស្ត្រកម្ពុជា ដែលតម្រូវអោយមានការផាកពិន័យជាប្រាក់ពីមួយលានរៀលទៅ៥លានរៀលនិងថែមទាំងជាប់ពន្ធនាគារពី១ខែដល់មួយឆ្នាំថែមទៀតផង។ ដូច្នោះប្រសិនបើម្ចាស់ស្ថានីយ៏និងដេប៉ូចែកចាយប្រេងឥន្ទនៈទាំងអស់មិនកែតម្រូវអោយត្រឹមត្រូវវិញទេ យើងមានតែអនុវត្តន៏ទៅតាមច្បាប់តែប៉ុណ្ណោះ៕ តាកែវ