ភ្នំពេញ ៖ ស្រីរកស៊ីម៉ាស្សាម្នាក់បាន ប្រកាច់កន្ត្រាក់ដៃកន្ត្រាក់ជើងស្លាប់ភ្លាមៗ ហើយបន្ទាប់ពីហេតុការណ៍នេះកើតឡើង ក៏បានប្ដឹងសមត្ថកិច្ចដើម្បីមកធ្វើកោសល្យវិច័យ ដោយសមត្ថកិច្ចបានបញ្ជាក់ថា នារីរងគ្រោះស្លាប់ដោយសារគាំងបេះដូង ព្រោះប្រើប្រាស់សារធាតុញៀនលើសកម្រិត។
តែទោះយ៉ាងណាមិត្តភក្កិក៏ដូចជាសាច់ញាតិនៅកន្លែងម៉ាស្សាបានបញ្ជាក់ថា នារីរងគ្រោះបានចេញទៅក្រៅដើរលេងជាមួយសង្សាររបស់នាង ក្រោយពីដើរលេងហើយ សង្សាររបស់នាងក៏ឌុបនាងត្រឡប់មកកន្លែងម៉ាស្សាវិញ បានមួយសន្ទុះនាងធ្វើទុក្ខអាការៈប្រកាច់រហូតដល់ស្លាប់។ មិត្តភក្កិក្នុងហាងម៉ាស្សាបាននិយាយថា ទំនងជាពេលនាងចេញទៅក្រៅជាមួយសង្សារ បានរួមភេទហើយទំនងជាប្រើប្រាស់ថ្នាំញៀន ទៅធ្វើឲ្យគាំងបេះដូង។ ហេតុការណ៍នេះបានកើតឡើង នៅម៉ោងប្រមាណ ១០និង៣០នាទី ថ្ងៃទី១៤ ខែឧសភា ឆ្នាំ២០១៩ នៅផ្ទះម៉ាស្សាមួយកន្លែង មានទីតាំងលេខ៦៧៨ ផ្លូវលេខ២៧១ ក្រុមទី៤០ ភូមិ៧ សង្កាត់ចាក់អង្រែលើ ខណ្ឌមានជ័យ។ នារីម៉ាស្សារូបនោះ ឈ្មោះលី អាយុ២៧ឆ្នាំ ដែលជាអ្នកធ្វើការនៅកន្លែងម៉ាស្សាខាងលើ បានស្លាប់បន្ទាប់ពីសង្សាររបស់នាងឌុបមកពីរួមរ័កវិញ។
បើតាមប្រភពពីអ្នកធ្វើការជាមួយនារីបានបញ្ជាក់ថា នៅថ្ងៃកើតហេតុខាងលើ នារីរងគ្រោះបានចេញទៅក្រៅជាបុរសម្នាក់ ដែលត្រូវជាសង្សារ ដើម្បីទៅរួមរ័ក ហើយក៏បានត្រឡប់មកកន្លែងធ្វើការ វិញដូចធម្មតា។ ប៉ុន្តែដល់មកន្លែង កើតហេតុស្រាប់ តែនារីរងគ្រោះ មានអាការៈប្រកាច់ កន្ត្រាក់ដៃជើង ឃើញដូច្នេះនាងនិងបុគ្គលិកម៉ាស្សាដទៃទៀត បាននាំគ្នាជួយធ្វើចលនា និងបានរត់ហៅគេឯងមកជួយ ប៉ុន្តែនារីរងគ្រោះស្លាប់បាត់ហើយ។
សមត្ថកិច្ចជំនាញដែលបានចុះត្រួតពិនិត្យ និងធ្វើកោសល្យវិច័យសាកសព បានសន្និដ្ឋានថា នារីរងគ្រោះស្លាប់ដោយសារគាំងបេះដូង ព្រោះប្រើប្រាស់សារធាតុញៀន៕ ដោយ៖ កូឡាប
