ប៉េកាំង ៖ ព្រះបាទសម្តេចព្រះបរមនាថ នរោត្តម សីហមុនី ទ្រង់មានព្រះរាជបន្ទូលថា ប្រទេសកម្ពុជាមានឆន្ទៈខ្ពស់ក្នុងការពង្រឹងការផ្លាស់ប្តូរ និងបន្តកិច្ចសហប្រតិបត្តិការលើគ្រប់វិស័យជាមួយប្រទេសចិន ដើម្បីជំរុញទំនាក់ទំនងទ្វេភាគីរវាងប្រទេសទាំងពីរ (កម្ពុជា_ចិន) ។
នាវេលារសៀលថ្ងៃទី១៥ ខែឧសភា ឆ្នាំ២០១៩ ព្រះករុណាជាអម្ចាស់ជីវិតលើត្បូង ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃ ព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត សព្វព្រះរាជហឫទ័យទទួលចូលជួបសវនាការជាមួយ លោក វ៉ាង ឈឺសាន អនុប្រធានាធិបតី នៃសាធារណរដ្ឋប្រជាមានិតចិន នារដ្ឋធានីប៉េកាំង ។ បើតាមការផ្សាយរបស់ផេកហ្វេសប៊ុកព្រះបរមរាជវាំង (Royal du Cambodge)។
លោក វ៉ាង ឈឺសាន បានទូលថ្វាយថា មិត្តភាពរវាងប្រទេសចិន និងកម្ពុជា មានប្រវត្តិសាស្ត្រយ៉ាងយូរអង្វែង ហើយចំណងមិត្តភាពរវាងចិន និងព្រះរាជវង្សានុវង្ស នៃព្រះរាជាណាចក្រកម្ពុជា ពិតជាមានតម្លៃណាស់សម្រាប់ប្រទសចិន។ ស្ថិតក្រោមការដឹកនាំរបស់មេដឹកនាំនៃប្រទេសទាំងពីរ ទំនាក់ទំនងចិន-កម្ពុជា ស្ថិតនៅក្នុងស្ថានភាពដ៏ល្អបំផុតនៅក្នុងប្រវត្តិសាស្ត្រ។ នៅក្នុងអំឡុងពេលសម័យប្រជុំលើកទីពីរនៃគោលនយោបាយ “ខ្សែក្រវ៉ាត់មួយផ្លូវមួយ” ចំពោះកិច្ចសហប្រតិបត្តិការអន្ដរជាតិប្រទេសទាំងពីរបានចុះហត្ថលេខាលើផែនការសកម្មភាពមួយចំនួន ដើម្បីជួយជម្រុញដល់ការអភិវឌ្ឍន៍ នៃទំនាក់ទំនងទ្វេភាគីរវាងប្រទេសទាំងពីរឲ្យបានកាន់តែល្អប្រសើរ។ លោក បានបន្តលើកឡើងថា បណ្តាប្រទេសទាំងអស់នៅលើពិភពលោកគួរតែមានការគោរពគ្នាទៅវិញទៅមក, ការអត់ឱនគ្នាទៅវិញទៅមក, ការរៀនសូត្រពីគ្នាទៅវិញទៅមក, រួមជាមួយនិងការអភិវឌ្ឍរួម។ ប្រទេសនៅអាស៊ី គួរតែសិក្សារៀនសូត្រពីភាពរុងរឿងស៊ីវិល័យនៃអរិយធម៏បុរាណរបស់ខ្លួន នឹងបង្កើនជំនឿចិត្តលើខ្លួនឯង ធ្វើការរួមគ្នាដើម្បីសម្រេចបាននូវការអភិវឌ្ឍថ្មីៗផ្សេងទៀត នៅក្នុងតំបន់អាស៊ីទាំងមូល ព្រមទាំងធ្វើការរួមគ្នាដើម្បីកសាងសហគមន៍មួយ នៃវាសនាមនុស្ស។
ព្រះករុណាជាអម្ចាស់ជីវិតលើត្បូង ជាទីគោរពសក្ការៈដ៏ខ្ពង់ខ្ពស់បំផុត សព្វព្រះរាជហឫទ័យមានព្រះរាជបន្ទូលថា ព្រះអង្គមានសេចក្តីរីករាយជាពន់ពេកណាស់ ដែលបានអញ្ជើញចូលរួមក្នុង វេទិកាអរិយធម៌អាស៊ីលើកទី១ ដែលបានស្នើឡើងដោយ លោកប្រធានាធិបតី សុី ជីនភីង ក្នុងឱកាសនេះ។ ព្រះអង្គ បានវាយតម្លៃខ្ពស់ចំពោះគំនិតផ្ដួចផ្ដើមដ៏ល្អប្រពៃនេះ ហើយប្រទេសកម្ពុជាមានឆន្ទៈខ្ពស់ក្នុងការពង្រឹងការផ្លាស់ប្តូរ និងបន្តកិច្ចសហប្រតិបត្តិការលើគ្រប់វិស័យជាមួយប្រទេសចិន ដើម្បីជំរុញទំនាក់ទំនងទ្វេភាគីរវាងប្រទេសទាំងពីរ ក៏ដូចជាសម្រាប់ការអភិវឌ្ឍកាន់តែច្រើនផ្សេងទៀត៕ ដោយ ៖ កូឡាប
