ភ្នំពេញ៖ ក្នុងការបំពេញយុទ្ធនារួមគ្នាជួយដោះស្រាយបញ្ហារបស់ប្រជាជនខ្មែរនៅកូរ៉េ និងដើម្បីជាការចូលរួមលើកស្ទួយ អភិរក្សមរតកវប្បធម៌ ប្រពៃណីទំនៀមទម្លាប់ជាតិខ្មែរ ក្នុងរយៈពេលពេញមួយឆ្នាំកន្លងមកនេះស្ថានទូតកម្ពុជាប្រចាំនៅប្រទេសកូរ៉េបានអញ្ជើញ ថ្នាក់ដឹកនាំ សមាគម សហគមន៍ មូលនិធិ ក្រុមសិល្បៈ នានា និងបណ្ដាញស្ត្រីខ្មែរនៅសាធារណរដ្ឋកូរ៉េសរុបជាង ៣០ ដើម្បីជួបពិភាក្សាដកពិសោធន៍ សិក្សាពីចំនុចខ្លាំង និងចំនុចខ្សោយ ដើម្បីជម្រះនូវមន្ទិលសង្ស័យ និងកែលម្អនូវចំនុចខ្វះខាតដែលមានកន្លងមក។
នេះជាកិច្ចប្រជុំលើកទី៤ ហើយកិច្ចប្រជុំពិភាក្សានេះបានប្រព្រឹត្តិឡើងកាលពីល្ងាចថ្ងៃអាទិត្យទី២៤ ខែធ្នូ ឆ្នាំ២០១៧ នាទីក្រុងស៊ូវ៉ុន ក្រោមវត្តមានដឹកនាំដោយ លោក ឡុង ឌីម៉ង់ ឯកអគ្គរាជទូតកម្ពុជា និងសហការី ជាមួយនឹងថ្នាក់ដឹកនាំ សមាគម សហគមន៍ មូលនិធិ ក្រុមសិល្បៈ នានា និងបណ្ដាញស្ត្រីខ្មែរនៅសាធារណរដ្ឋកូរ៉េប្រមាណ ៥០នាក់។
ជាការឆ្លើយតបនឹងសំណូមពររបស់ថ្នាក់ដឹកនាំសមាគម លោកឯកអគ្គរាជទូតកម្ពុជា បានសម្រេច៖ បន្ដយុទ្ធនាការចុះផ្ដល់សេវាបន្ដលិខិតឆ្លងដែន ប្រឹក្សាយោបល់ និងបើកវេទិកាសាធារណៈនៅមូលដ្ឋានឲ្យបានច្រើន និងទៅឲ្យដល់សហគមន៍មូលដ្ឋានដែលនៅឆ្ងាយ។
បន្ដយុទ្ធនាការជាមួយសមាគមគ្រូពេទ្យស្ម័គ្រចិត្តចុះផ្ដល់សេវាពិនិត្យព្យាបាល សុខភាពទូទៅ ពិនិត្យបេះដូង ចាក់វ៉ាក់សាំងការពារផ្ដាសាយ និងថតX-Ray ជូនដោយឥតគិតថ្លៃជូនប្រជាពលរដ្ឋឲ្យបានច្រើនឡើងបន្ថែមទៀត។ រៀបចំកម្មវិធីអប់រំសីលធម៌ អប់រំផ្លូវចិត្ត តាមបែបព្រះពុទ្ធសាសនា ដើម្បីបំពេញតម្រូវការរបស់សហគមន៍ខ្មែរនៅកូរ៉េ ឲ្យបាន២ដងក្នុងមួយឆ្នាំ ដោយនិមន្ដព្រះសង្ឈដែលប៉ិនប្រសព្វមកពីប្រទេសកម្ពុជា។
បន្ដយុទ្ធនាការជួយដោះស្រាយបញ្ហារបស់ប្រជាពលរដ្ឋខ្មែរ ដែលកំបុងរស់នៅ ធ្វើការ និងសិក្សានៅសាធារណរដ្ឋកូរ៉េឲ្យបានកាន់តែទូលំទូលាយ និងប្រសើរឡើងបន្ថែមទៀត។ល។
ទន្ទឹមនេះតំណាងស្ថានទូត លោក ឡុង ឌីម៉ង់ ក៏បានស្នើត្រឡប់ទៅថ្នាក់ដឹកនាំសមាគម សហគមន៍ មូលនិធិ ឲ្យរៀបចំបង្កើតកម្មវិធីជួបជុំធំ-តូច តាមលទ្ធភាព ដើម្បីអប់រំផ្សព្វផ្សាយពីច្បាប់ការងារ ការថែទាំសុខភាព ការវិនិយោគខុសច្បាប់ ឬការស្វែងរកសេវារត់ការខុសច្បាប់ផ្សេងៗ និងការជម្រុញលើកទឹកចិត្តដល់ពលករខ្មែរឲ្យត្រឡប់ទៅកម្ពុជាវិញដោយស្របច្បាប់ពេលចប់អាណត្តិការងារដើម្បីចូលរួមរក្សាកូតាជ្រើសរើសពលករកម្ពុជាថ្មីបន្ថែមទៀត ហើយក្រុមការងារស្ថានទូតសន្យានឹងចូលរួមតាមគ្រប់រូបភាព។
អង្គប្រជុំទាំងអស់ក៏បានចូលរួមយ៉ាងសស្រាក់សស្រាំពិភាក្សាលើការងាររៀបចំមហាសង្ក្រាន្ដខ្មែរនៅកូរ៉េលើកទីពីរ ដែលជាព្រឹត្តិការណ៍វប្បធម៌ ប្រពៃណីធំជាងគេប្រចាំឆ្នាំ ដើម្បីអបអរសាទរពិធិបុណ្យចូលឆ្នាំប្រពៃណីជាតិខ្មែរ៕ ដោយ៖បញ្ញាស័ក្តិ