ភ្នំពេញ ៖ លោកសុខ ទូច ប្រធានរាជបណ្ឌិត្យសភាកម្ពុជា កាលពីថ្ងៃទី១៦ឧសភា បានសរសេរលើហ្វេសប៊ុកថា ថ្មីៗនេះ លោកសម រង្ស៊ីអតីតប្រធានគណបក្សសង្គ្រោះជាតិបានលើកឡើងថា លោកនឹងវិលចូលមកកម្ពុជាវិញ ប៉ុន្តែបើតាមការវិភាគរបស់ខ្ញុំ ខ្ញុំយល់ថាលោក សម រង្ស៊ី ច្បាស់ជាមិនមកនោះទេ ។
លោកសុខ ទូច បានបញ្ជាក់ថា ដោយខ្ញុំឈរលើហេតុផល៥យ៉ាង៖
ទី១. លោកសម រង្ស៊ីធ្លាប់បានសន្យាថានឹងវិលមកកម្ពុជាវិញជាច្រើនលើកមកហើយ តែធាតុពិតគាត់បានត្រឹមសន្យាខ្យល់ដើម្បីប្រជាភិថុតិមហាជនប៉ុណ្ណោះ ជាក់ស្តែង នៅថ្ងៃ ១៦ វិច្ឆិកា ២០១៥ នៅថ្ងៃទី១៩ តុលា ២០១៦ នៅ ថ្ងៃទី ១២ ខែ វិច្ឆិកា ឆ្នាំ ២០១៧ នៅថ្ងៃទី២៦ ខែមករា ឆ្នាំ២០១៩។
ទី២. កាលពីរចនាសម្ព័ន្ធ CNRP នៅមានគាត់បានលាលែង ហើយដេករង់ចាំមើលសកម្មភាពរាជរដ្ឋាភិបាលកម្ពុជា។
ទី៣. ភរិយារបស់គាត់អាចនឹងមិនផ្តល់ឱកាសឱ្យគាត់បានវិលមកកម្ពុជានោះទេ ព្រោះអ្នកលេងនយោបាយនៅពីខាងក្រោយឆាកគឺប្រពន្ធគាត់ មិនមែនលោក សម រង្ស៊ី ឡើយ។
ទី៤.លោក សម រង្ស៊ី អាចធ្វើព្យុះ ធ្វើភ្លៀងបានពេលខ្លួននៅក្រៅស្រុក តែពេលខ្លួនចូលស្រុកខ្លួនបានលើកជើងពានជូនសម្តេចតេជោហ៊ុន សែន ទៅវិញ ដូចជាករណីវិសោធនកម្មរដ្ឋធម្មនុញ្ញពី២/៣ មក៥០+ ១ វិសោធនកម្មច្បាប់ក្រោយពេលបោះឆ្នោត លទ្ធផលនៃការបោះឆ្នោតឆ្នាំ២០១៨ គណបក្សប្រជាជនកម្ពុជាបានទទួលសំឡេងឆ្នោតគាំទ្ររហូតទៅដល់៨២,០៣% (ដេកផ្ទះឈ្នះឯង)។
ទី៥. លោកសម រង្ស៊ីគាត់នឹងមកកម្ពុជាដើម្បីផ្តួលរំលំរាជរដ្ឋាភិបាល និងមកចាប់សម្តេចតេជោហ៊ុន សែន តើគាត់ចាប់ដោយរបៀបណា? បើពេលខ្លួននៅមានសមត្ថភាពនិងលទ្ធភាព លោកធ្វើអ្វីមិនកើតផង ចុះទម្រាំពេលនេះ ខ្លួនជាទណ្ឌិត ហើយជាប់បណ្តឹងជាច្រើនករណីផ្សេងទៀតនោះ? ដូច្នេះ រដ្ឋាភិបាលមានសិទ្ធិគ្រប់គ្រាន់ដើម្បីការពាររដ្ឋធម្មនុញ្ញ និងរក្សានូវសណ្តាប់ធ្នាប់សង្គម។
ជារួមមក អ្វីដែលលោក សម រង្ស៊ី បំផុសចលនាវិលចូលស្រុកនេះ វាគ្រាន់តែជាសារមួយប្រាប់ទៅមហាជនថា សម រង្ស៊ី មិនដេកលក់ទេ ហើយខ្លួនអាចធ្វើអាជីវកម្មក្នុងការប្រមូលថវិកាពីការវិលចូលស្រុកនេះទៀតផង ។ ម្យ៉ាងវិញទៀត សកម្មភាពរបស់លោកដែលនៅកូរ៉េ កាលពីពេលថ្មីៗនេះថា ជាភាពជោគជ័យ ប៉ុន្តែបើយើងក្រឡេកមកមើលពីចំនួនអ្នកចូលរួមក្នុងមហាបាតុកម្មភ្លើងទៀនកាលពីចុងខែមេសានេះ គឺមិនដល់ ១ ម៉ឺននាក់ផង ខណៈពេលដែលពលករខ្មែរនៅកូរ៉េមានដល់ជាង ៦ ម៉ឺននាក់ឯណោះ។ ជាងនេះទៅទៀតក្រោយបាតុកម្មនោះចប់ ក្រុមយុវជននៅកូរ៉េបានបែកបាក់ផ្ទៃក្នុងទៀតផង។
បើតាមផេកហ្វេសប៊ុក កាលពីថ្ងៃទី១៥ ឧសភា ២០១៩ លោកសម រង្ស៊ី បានសរសេរថា សូមបងប្អូន កូនក្មួយ មកតាមខ្ញុំ។ យើងទៅស្រុកយើងវិញ ទៅផ្ទះយើងវិញ ទៅដណ្តើមយកប្រទេសយើងមកវិញ ពីជនក្បត់ជាតិ ហ៊ុន សែន។ យើងទៅរៀបចំស្រុកខ្មែរឡើងវិញ ទៅជួយអ្នកក្រីក្រនិងអ្នកទន់ខ្សោយ ធ្វើយ៉ាងណាឲ្យកូនខ្មែរគ្រប់រូប រស់បានយ៉ាងសុខសាន្ត សម្បូរសប្បាយ និងថ្លៃថ្នូរ លើទឹកដីកំណើតរបស់ខ្លួន ក្នុងសង្គមមួយ ប្រកបដោយសេរីភាព និងយុត្តិធម៌៕ ដោយ ៖ កូឡាប