ស្ទឹងត្រែង ៖ ទោះជាមានការចាប់ឧបករណ៍នេសាទ និងហៅមកអប់រំក៏ដោយ ក៏បងប្អូនប្រជានេសាទ ជាងពាក់កណ្តាល នៅតែបន្តការនេសាទខុសច្បាប់ក្នុងទន្លេអភិរក្សសត្វផ្សោតដោយមិនញញើតកម្លាំងសមត្ថកិច្ចឡើយ ព្រមទាំងគំរាមតដៃជាមួយសមត្ថកិច្ចបើសិនជាបន្តចាប់មងគាត់ទៀត។
ខណ្ឌរដ្ឋបាលជលផលស្ទឹងត្រែង បានឲ្យដឹងថា ចាប់ពីថ្ងៃទី១០-១៦ ខែឧសភា ឆ្នាំ២០១៩ ខណ្ឌរដ្ឋបាលជលផលស្ទឹងត្រែង សហការជាមួយនគរបាលក្រុងស្ទឹងត្រែង នគរបាលប៉ុស្តិ៍ថាឡាបរិវ៉ាត់ ឆ្មាំទន្លេអភិរក្សសត្វផ្សោត និងគណៈកម្មការសហគមន៍នេសាទ បានបន្តការចុះបង្ក្រាបបទល្មើសនេសាទ ដោយប្រើឧបករណ៍មងបណ្តែតគ្រប់ប្រភេទ ដើម្បីការពារត្រីមេពូជក្នុងរដូវបិទនេសាទនៅខេត្តស្ទឹងត្រែង ដោយបានដកហូតមងបណ្តែតចំនួន ១៥០ ត្បូង ស្មើនឹងប្រវែងប្រមាណ ៣០០០០ម៉ែត្រ។
ខណ្ឌរដ្ឋបាលជលផលស្ទឹងត្រែង បានបន្ថែមទៀតថា ក្រៅពីបង្ក្រាបឧបករណ៍នេសាទខុសច្បាប់ហើយនោះ កម្លាំងសមត្ថកិច្ច បានកោះហៅអ្នកនេសាទ មកធ្វើការអបរំណែនាំ និងធ្វើកិច្ចសន្យាប្រជានេសាទឲ្យបញ្ឈប់ធ្វើនេសាទចំនួន ៥៣០ នាក់។
ខណ្ឌរដ្ឋបាលជលផលស្ទឹងត្រែង បានបញ្ជាក់ថា “ទោះបីជាក្រុមការងារយើងខ្ញុំខិតខំ យ៉ាងណាក៏ដោយក៏បងប្អូនប្រជានេសាទ ជាងពាក់កណ្តាល នៅតែបន្តការនេសាទខុសច្បាប់ដោយមិនញញើតកម្លាំងសមត្ថកិច្ចឡើយ ព្រមទាំងគំរាមតដៃជាមួយសមត្ថកិច្ចបើសិនជាបន្តចាប់មងគាត់ទៀត។ ម្យ៉ាងទៀត ពួកគាត់នៅតែទាមទារឲ្យលើកថ្ងៃបិទនេសាទទៅថ្ងៃទី០១ ខែមិថុនា ដូចកាលពីមុន ដែលពួកគាត់ធ្លាប់ដឹង ធ្លាប់ឮ និងអនុវត្ត។ ក្រុមការងារនឹងនៅតែបន្ត ក្នុងបេសកកម្មការពារត្រីមេពូជក្នងរដូវបង្កកំណើតខ្ពស់នេះ ដោយប្រើយុទ្ធវិធីទាំងទន់ ទាំងរឹង ដើម្បីនិរន្តរភាពនៃ ធនធានមច្ឆាជាតិនៅតំបន់មេគង្គលើ”៕ ដោយ៖កូឡាប
