ប្រទេសចិនបានធ្វើការព្រមានសងសឹកប្រឆាំងនឹងអាមេរិចវិញ ក្រោយពេលអាមេរិចបានដាក់បញ្ជាដល់ក្រុមហ៊ុនអាមេរិចទាំងអស់មិនឲ្យប្រើប្រាស់បច្ចេកវិទ្យារបស់ក្រុមហ៊ុនចិន Huawei ព្រមទាំងបានដាក់សម្ពាធដល់សម្ព័ន្ធមិនឲ្យទទួលយកបច្ចេកវិទ្យារបស់ចិនផងដែរ។
អ្នកនាំពាក្យក្រសួងការបរទេសចិន លោក Lu Kang បានថ្លែងថា ទីក្រុងប៉េកាំងសូមប្រឆាំងទៅនឹងប្រទេសទាំងឡាយណាដែលបានដាក់ទណ្ឌកម្មឯកតោភាគីលើក្រុមហ៊ុនចិន ហើយខ្លួននឹងចាត់វិធានការតបតវិញ។
នៅថ្ងៃពុធកន្លងទៅនេះ រដ្ឋបាលដូណាល់ ត្រាំ បានបញ្ជាឲ្យមានការឹតបណ្តឹងការប្រើប្រាស់ផលិតផលរបស់ក្រុមហ៊ុន Huawei នៅក្នុងបណ្តាញរបស់អាមេរិច ដោយសម្តែងការព្រួយបារម្ភពីបញ្ហាសន្តិសុខជាតិ។
ទោះយ៉ាងណា ក្រុមហ៊ុន Huawei បានបដិសេធថា ផលិតផលរបស់ខ្លួនមិនបានគំរាមកំហែងដល់សន្តិសុខ និងបានបញ្ជាក់ថាខ្លួនត្រៀមខ្លួនរួចរាល់ក្នុងធ្វើកិច្ចការជាមួយអាមេរិច ៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC