រដ្ឋាភិបាលឥណ្ឌូនេស៊ីគ្រោងនឹងចំណាយថវិការចំនួន ២,១ពាន់លានដុល្លារ លើគម្រោងរើរដ្ឋធានីទៅកាន់ទីតាំងថ្មី។ រដ្ឋភិបាលគ្រោងស្វែងរកដៃគូជាមួយនឹងក្រុមហ៊ុនរដ្ឋ និងឯកជនដើម្បីធ្វើការអភិវឌ្ឍន៍គម្រោង។ នេះបើតាមការបញ្ជាក់របស់រដ្ឋមន្ត្រីគម្រោងអភិវឌ្ឍន៍ឈ្មោះ Bambang Brodjonegoro បញ្ជាក់កាលពីថ្ងៃព្រហស្បតិ៍ម្សិលមិញនេះ។
ថវិការចំណាយទាំងអស់ជារបស់រដ្ឋ ហើយសម្រាប់ដំណើរការសាងសង់រដ្ឋធានីថ្មីនឹងត្រូវបញ្ចប់ក្នុងរយៈពេល ៥ឆ្នាំ។ លោករដ្ឋមន្ត្រីបញ្ជាក់ថា ថវិការរដ្ឋប្រមាណ ៤១៥,២លានដុល្លារនឹងត្រូវចំណាយរៀងរាល់ឆ្នាំ ដើម្បីទ្រទ្រង់ដល់គម្រោងរដ្ឋធានីថ្មីនោះ។
សូមបញ្ជាក់ថា មូលហេតុដែលឥណ្ឌូនេស៊ីចង់ដូររដ្ឋធានីទៅកន្លែងផ្សេងគឺដោយសារតែរដ្ឋធានីចាកាតាបច្ចុប្បន្ន ជួបបញ្ហាស្ទះចរាចរណ៍ខ្លាំង និងបញ្ហាទឹកលិច។
ទីតាំងនៃរដ្ឋធានីថ្មីរបស់ប្រទេសនេះមិនទាន់ត្រូវបានគេដឹងនៅឡើយទេ ប៉ុន្តែបើតាមសេចក្តីរាយការណ៍របស់សារពត៌មានបានឲ្យដឹងថា រដ្ឋធានីថ្មី អាចនឹងរើទៅកាន់ ទីក្រុង Palangkaraya។
ទីក្រុងចាកាតា ដែលមានប្រជាជនរស់នៅច្រើនជាង ១០លាននាក់ជួបបញ្ហាលិចក្នុងអត្រាលឿនបំផុត ក្នុងពិភពលោក។
ការប្រកាសពីគំរោងតាំងរដ្ឋធានីថ្មីនេះ កើតឡើងក្រោយពេល លោក Joko Widodo បានធ្វើការប្រកាសពីជ័យជំនះក្នុងការបោះឆ្នោតកាលពីដើមខែនេះ ទោះបី លទ្ធផលបោះឆ្នោតផ្លូវការ នឹងត្រូវគេប្រកាសនៅថ្ងៃទី ២២ ខែឧសភាខាងមុខក្តី។
គំរោងចង់ផ្លាស់រដ្ឋធានីទៅកន្លែងថ្មី បានកើតឡើងជាច្រើនលើក ច្រើនសារមកហើយ ចាប់តាំងពីប្រទេសនេះទទួលបានឯករាជ្យពេញលេញពីប្រទេសហូឡង់ក្នុងឆ្នាំ ១៩៤៥។
កាលពីឆ្នាំ ២០១៦ ការស្ទង់មតិបានបង្ហាញថា ទីក្រុងចាកាតា មានបញ្ហាស្ទះចរាចរណ៍ខ្លាំងបំផុតក្នុងលោក។ ដើម្បីទៅចូលរួមកិច្ចប្រជុំអោយទាន់ពេលម្តងៗ រដ្ឋមន្ត្រីនៃប្រទេសនេះ ត្រូវមានការហែរហមដោយក្បួនប៉ូលីស។
រដ្ឋមន្ត្រីផែនការ បានថ្លែងថា ការកកស្ទះចរាចរណ៍ក្នុងរដ្ឋធានីចាកាតា បានធ្វើឲ្យប្រទេសខាតបង់ប្រាក់ ៦,៨ពាន់លានដុល្លារក្នុងមួយឆ្នាំ។
រដ្ឋធានីចាកាតា ក៏ជាទីក្រុងដែលជួយបញ្ហាទឹកលិចលឿនបំផុតផងដែរក្នុងលោក។
អ្នកស្រាវជ្រាវបាននិយាយថា ផ្នែកដ៏ធំមួយរបស់រដ្ឋធានីនេះ នឹងត្រូវលិចទឹកទាំងស្រុងក្នុងឆ្នាំ ២០៥០។ ភាគខាងជើងរដ្ឋធានីចាកាតា បានទទួលការលិចកំពស់ ២,៥ម៉ែត្រក្នុងរយៈពេល ១០ឆ្នាំ ហើយវាបន្តលិចជាមធ្យមប្រមាណ ១,១៥ម៉ែត្រក្នុងមួយឆ្នាំ៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC
