ភ្នំពេញ ៖ សហភាពអឺរ៉ុបបានបញ្ជាក់ថា ថ្ងៃនេះ (17 ឧសភា ) គឺជាទិវាអន្តរជាតិប្រឆាំងការរើសអើងអ្នកស្រឡាញ់ភេទដូចគ្នា អ្នកកែភេទ និងអ្នកស្រឡាញ់ទាំងពីរភេទ (IDAHOT) ដែលមានគោលបំណងលើកកម្ពស់ការយល់ដឹងស្ដីពីការរំលោភសិទ្ធិស្ត្រីស្រឡាញ់ស្ត្រី បុរសស្រឡាញ់បុរស អ្នកស្រឡាញ់បានទាំងពីរភេទ អ្នកប្តូរយេនឌ័រ និងមនុស្សអន្តរភេទ (ហៅកាត់ថា អ្នកស្រឡាញ់ភេទដូចគ្នា)។ ក្នុងឱកាសនេះ សហភាពអឺរ៉ុបបានរៀបចំកិច្ចប្រជុំជាមួយរដ្ឋជាសមាជិក និង អង្គការនានាដែលធ្វើការលើសិទ្ធិអ្នកស្រឡាញ់ភេទដូចគ្នា ដើម្បីផ្លាស់ប្ដូរជុំវិញបញ្ហាប្រឈមរបស់អ្នកស្រឡាញ់ភេទដូចគ្នា នៅក្នុងប្រទេសកម្ពុជា និងវិធីដែលសហភាពអឺរ៉ុប អាចគាំទ្រនូវការលើកកម្ពស់ និងការការពារសិទ្ធិរបស់ពួកគាត់។
សហភាពអឺរ៉ុបបានបន្ថែមថា ក្នុងសាមគ្គីភាពជាមួយមនុស្សទាំងអស់ ដែលទទួលរងការរើសអើង លើអត្តសញ្ញាណ និងនិន្នាការភេទរបស់ពួកគេ ទង់ឥន្ទធនូ ត្រូវបានបង្ហូតឡើង នៅក្នុងបរិវេណ នៃប្រតិភូសហភាពអឺរ៉ុបប្រចាំកម្ពុជា។
សេចក្តីប្រកាសរបស់តំណាងជាន់ខ្ពស់សហភាពអឺរ៉ុប លោកស្រី Federica Mogherini ក្នុងឱកាស នៃទិវាអន្តរជាតិប្រឆាំង ការរើសអើងអ្នកស្រឡាញ់ភេទដូចគ្នា បានបញ្ជាក់ថា នៅក្នុងទិវាអន្តរជាតិប្រឆាំងការរើសអើងអ្នកស្រឡាញ់ភេទដូចគ្នា អ្នកកែភេទនិងអ្នកស្រឡាញ់ទាំងពីរភេទ សហភាពអឺរ៉ុបសូមបញ្ជាក់ជាថ្មីអំពីការប្តេជ្ញាចិត្តដ៏រឹងមាំរបស់ខ្លួន ក្នុងការលើកកម្ពស់និងស្ត្រីស្រឡាញ់ស្ត្រី បុរសស្រឡាញ់បុរស អ្នកស្រឡាញ់បានទាំងពីរភេទ អ្នកប្ដូរយេនឌ័រ និងមនុស្សអន្តរភេទ ហៅកាត់រួមគ្នាថាអ្នកស្រឡាញ់ភេទដូចគ្នា។ នៅទូទាំងពិភពលោកទាំងមូល គុណតម្លៃនៃវប្បធម៌ប្រពៃណីឬសាសនា នៅតែត្រូវបានគេបន្តប្រើប្រាស់ជាហេតុផល ដើម្បីធ្វើទុកបុកម្នេញ រើសអើង បង្កឬរំខាន នឹងធ្វើបាបអ្នកស្រឡាញ់ភេទដូចគ្នាដែលជាឬមានដូចជា ការប្រព្រឹត្តបទល្មើស ដែលនាំឲ្យមានការស្អប់ខ្ពើមគ្នា និងការប្រពឹត្តអំពើហិង្សាក្នុងទម្រង់ធ្ងន់ធ្ងរផ្សេងៗ ដូចជាការធ្វើទារុណកម្ម ការធ្វើឃាតជាដើម។ ក្នុងប្រទេសចំនួន 72 ច្បាប់ស្តីពីនិន្នាការភេទ បន្តចាត់ទុកការរូបភេទដូចគ្នា ជាបទល្មើសព្រហ្មទណ្ឌដែលនៅក្នុងប្រទេសផ្សេងៗ ច្បាប់ពុំបានផ្ដល់ការការពារក្នុងកម្រិតមួយដែលចាំបាច់នោះឡើយ ដែលនេះបណ្ដោយឲ្យមានការកើតឡើងនូវការរើសអើង ក្នុងទម្រង់ជាច្រើនជារៀងរាល់ថ្ងៃ ក្នុងគ្រប់ទិដ្ឋភាពទាំងអស់នៃជីវិតរស់នៅរបស់អ្នកស្រឡាញ់ភេទដូចគ្នា។ សហភាពអឺរ៉ុប សូមធ្វើការគូសបញ្ជាក់យ៉ាងមុតមាំជាថ្មីម្ដងទៀតថា ការរើសអើងចំពោះអ្នកស្រឡាញ់ភេទដូចគ្នា ធ្វើឲ្យប៉ះពាល់ដល់គោលការណ៍សិទ្ធិមនុស្សជាមូលដ្ឋានសំខាន់ៗ ដែលមានចែងក្នុងសេចក្តីប្រកាសជាសកលស្ដីពីសិទ្ធិមនុស្ស។
សភាពអឺរ៉ុបនៅតែបន្តការប្រយុទ្ធប្រឆាំងនឹងនិទណ្ឌភាពចំពោះករណីរើសអើង និងការប្រព្រឹត្តអំពើហិង្សាចំពោះអ្នកស្រឡាញ់ភេទដូចគ្នា ទាំងនៅក្នុងទាំងក្រៅដែនដីរបស់ខ្លួន។ ក្នុងបរិបទនេះគណៈកម្មការអឺរ៉ុបបានចេញផ្សាយនូវ បញ្ជីវិធានការលើកកម្ពស់សមភាពសម្រាប់អ្នកស្រឡាញ់ភេទដូចគ្នា ដែលត្រូវអនុវត្តដោយគណៈកម្មការនេះពីឆ្នាំ 2016 ដល់ឆ្នាំ 2019 ដែលក្នុងនោះមានរៀបរាប់ពីសកម្មភាពក្នុងផ្នែកគោលនយោបាយពាក់ព័ន្ធ ចាប់ពីការមិនរើសអើងការអប់រំការងារសុខភាព ការដើរហើរដោយសេរីសិទ្ធិជ្រកកោន សម្ដីដែលនាំឲ្យមានការស្អប់ខ្ពើមគ្នា ការប្រព្រឹត្តបទល្មើសស្អប់ខ្ពើមគ្នា រហូតដល់គោលនយោបាយស្ដីពីការពង្រីកសមាជិកភាពនិងការប្រទេស។ អ្នកការពារអ្នកស្រឡាញ់ភេទដូចគ្នារាប់មិនអស់ កំពុងធ្វើការងារដើម្បីស្វែងរកយុត្តិធម៌និងផ្ដល់សំឡេងដល់អ្នកដែលទទួលរងការគៀបសង្កត់ និងការរើសអើងប៉ុន្តែពួកគេបែរជាប្រឈមនឹងការវាយប្រហារទាំងនៅក្នុងអឺរ៉ុប ទាំងនៅក្នុងប្រទេសជាច្រើនក្នុងពិភពលោក។
ដូច្នេះហើយទើបចាប់តាំងពីខែវិច្ឆិកាឆ្នាំ 2018 មក សហភាពអឺរ៉ុបតាមរយៈឧបករណ៍ (កម្មវិធី) លើកកម្ពស់លទ្ធិប្រជាធិបតេយ្យនិងសិទ្ធិមនុស្ស កំពុងផ្ដល់ការគាំទ្រដល់អ្នកការពារសិទ្ធិមនុស្សរបស់អ្នកស្រឡាញ់ភេទដូចគ្នា និងអង្គការស្ថាប័នរបស់ពួកគេ ដែលកំពុងធ្វើសកម្មភាពនៅតំបន់ ដែលអ្នកស្រលាញ់ភេទដូចគ្នាប្រឈមនឹងការរើសអើងខ្លាំងជាងគេ។ សហភាពអឺរ៉ុបតាមរយៈការសហការជាមួយនឹងរដ្ឋជាសមាជិករបស់ខ្លួន នឹងបន្តផ្ដល់ការគាំទ្រដល់ការងារសំខាន់របស់អ្នកតស៊ូមតិពីនេះ ហើយនិងមិនឈប់ធ្វើសកម្មភាពទាំងនេះឡើយ រហូតដល់ពេលដែលអ្នកស្រលាញ់ភេទដូចគ្នាទាំងអស់ អាចរស់នៅប្រកបដោយសេរីភាពនិងសុវត្ថិភាព៕ ដោយ៖កូឡាប