ភ្នំពេញ ៖ នៅល្ងាចថ្ងៃទី១៧ ខែឧសភានេះ ពិធីគ្រវីទង់ចាប់ផ្តើមបើកព្រឹត្តិការណ៍ប្រណាំងយានយន្តឆ្លងកាត់ឧបសគ្គក្នុងតំបន់ដែនជម្រកសត្វព្រៃព្រៃឡង់ ត្រូវបានចាប់ផ្តើមដំណើរការជាផ្លូវការ ។ ព្រឹត្តិការណ៍ឆ្នាំ ២០១៩ នេះមានកីឡាករចូលរួមច្រើនជាងឆ្នាំ ២០១៨។ កីឡាករចំនួន ៧២ នាក់មកពី ៨ ប្រទេស ហើយក្នុងការប្រកួតរយៈចម្ងាយ ៦២៤គីឡូម៉ែត្រឆ្លងកាត់បីខេត្ត កំពង់ធំ ព្រះវិហារ និងបញ្ចប់នៅខេត្តសៀមរាប មានរថយន្តជិត ៣០ គ្រឿង និងម៉ូតូជាង ២០ គ្រឿង។ ព្រឹត្តិការណ៍នេះប្រព្រឹត្តទៅបានដោយមានកិច្ចសហការរៀបចំពីក្រសួងបរិស្ថាន សហព័ន្ធកីឡាយានយន្តកម្ពុជា ក្រុមហ៊ុនខារ៉ា និងគាំទ្រដោយក្រុមហ៊ុនប្រេងឥន្ធនៈតូតាល់កម្ពុជា ក្រោមប្រធានបទកីឡាយានយន្តចូលរួមអភិរក្សព្រៃឡង់ និងមានទិសស្លោក រួមគ្នាថែរក្សាបរិស្ថាន និងធនធានធម្មជាតិយើង។
ព្រឹត្តិការណ៍ប្រណាំងយានយន្តឆ្លងកាត់ឧបសគ្គនៅក្នុងតំបន់ដែនជម្រកសត្វព្រៃឡង់ ខ្មែររ៉ាលីរ៉េដឆ្នាំ ២០១៩ ក្រោមប្រធានបទ «រួមគ្នាដើម្បីថែរក្សាបរិស្ថាន និងធនធានធម្មជាតិ»ដែលនឹងចាប់ផ្តើមពីថ្ងៃទី១៧ ដល់ថ្ងៃទី២០ ខែឧសភា នឹងចូលរួមផ្សព្វផ្សាយពីសក្តានុពលនៃដែនជម្រកសត្វព្រៃព្រៃឡង់ដែលសម្បូរដោយព្រៃឈើ និងជីវៈចម្រុះដល់សាធារណៈជន ក៏ដូចជាបណ្តុះស្មារតីស្រឡាញ់បរិស្ថាន និងធនធានធម្មជាតិ ក្នុងចំណោមប្រជាពលរដ្ឋហើយទាំអស់គ្នាចូលរួមថែរក្សាបរិស្ថាន និងអភិរក្សធនធានធម្មជាតិ។ នេះគឺជាការលើកឡើងរបស់លោក នេត្រ ភក្ត្រា រដ្ឋលេខាធិការ និងជាមន្ត្រី នាំពាក្យក្រសួងបរិស្ថាន។
លោកជឿជាក់ថារូបភាពស្តីពីនៃភាពសម្បូរបែបនៃធនធានធម្មជាតិ និងជីវភាពបងប្អូនប្រជាសហគមន៍នឹងត្រូវផ្សព្វផ្សាយតាមរយៈការផ្តិតរូបភាពនៃការប្រណាំងយានយន្តឆ្លងកាត់តំបន់ដែនជម្រកសត្វព្រៃឡង់មកផ្សព្វផ្សាយនៅលើប្រព័ន្ធផ្សព្វផ្សាយជាតិនិងអន្តរជាតិ ៕ ដោយ៖កូឡាប