តារាងចំរៀងថៃដ៏ល្បីឈ្មោះម្នាក់ឈ្មោះ Athiwara Kongmalai បានបញ្ចប់ការរត់ម៉ារ៉ាតុងរយៈពេល ៥៥ថ្ងៃហើយនៅថ្ងៃច័ន្ទម្សិលមិញនេះ និងបានរៃអង្គាសប្រាក់ច្រើនជាង ៣៣,៦លានដុល្លាអាមេរិច ដើម្បីជួយដល់មន្ទីរពេទ្យរដ្ឋចំនួន ១១ក្នុងប្រទេសថៃ។ នេះបើតាមការចេញផ្សាយរបស់ការសែតថៃ Bangkok Post។
ទឹកប្រាក់ដែលរៃអង្គាសបាននេះលើសគោលដៅកំណត់របស់គាត់ ដែលគាត់គ្រោងរៃអង្គាសឲ្យបាន ២១លានដុល្លា។
អ្នកចំរៀងដ៏មានប្រជាប្រិយភាពនេះ ដែលត្រូវបានគេស្គាល់ច្រើនតាមរយៈឈ្មោះ Toon Bodyslam បានរត់មកដល់បន្ទាត់ទី នៅតំបន់ព្រំដែនស្ថិតក្នុងស្រុក មែ សៃ នៃខេត្តឈៀង រ៉ៃ កាលពីល្ងាចម៉ោង ៦ និង ២០នាទី (ម៉ោងក្នុងប្រទេសថៃ)។
គាត់បានចាប់ផ្តើមការរត់ម៉ារ៉ាតុងដ៏ឆ្ងាយនេះ កាលពីថ្ងៃទី ១ ខែវិច្ឆការ ពីស្រុក បេតុង នៃខេត្តយ៉ាឡា។ ក្នុងរយៈពេលធ្វើដំណើរដោយរត់អស់ ៥៥ថ្ងៃ គាត់បានរត់ឆ្លងខេត្តចំនួន ២០ ក្នុងចំងាយផ្លូវ ២.២១៥គីឡូម៉ែត្រ។
នេះមិនមែនជាលើកទី ១នេះទេដែលតារាចំរៀងមានចិត្តសម្បុរសរូបនេះ បានរៃអង្គាថវិការសំរាប់ជួយមន្ទីរពេទ្យ។ កាលពីខែធ្នូ ឆ្នាំមុន គាត់បានរត់ចំងាយ ៤០០គីឡូម៉ែត្រ និងបានរៃអង្គាសថវិការចំនួន ២,៤លានដុល្លាអាមេរិច៕ សុភ័ក្ត្រ
