ខេត្តព្រះសីហនុ៖ តំណាងប្រជាពលរដ្ឋចំនួន ៤២គ្រួសារ រស់នៅភូមិព្រែកស្វាយ សង្កាត់កោះរ៉ុង ក្រុង-ខេត្តព្រះសីហនុ បានប្រមូលផ្តុំគ្នាជាថ្មីទៀត នៅពីមុខសាលាសង្កាត់កោះរ៉ុង ដើម្បីស្នើសុំឲ្យលោក សេង ហួលាង ចៅសង្កាត់កោះរ៉ុង ឲ្យជួយដោះស្រាយវិវាទដីធ្លីជាថ្មីទៀត ដែលពួកគាត់អះអាង ត្រូវបានលោកឧកញ៉ា សុខ ប៊ុន ក្លែងឯកសាររំលោភយក។
ការប្រមូលផ្តុំដាក់ពាក្យបណ្តឹងជាថ្មីជូនចៅសង្កាត់កោះរ៉ុង របស់ប្រជាពលរដ្ឋទាំង៤២គ្រួសារ បានធ្វើដំណើរទៅដល់សង្កាត់កោះរ៉ុង កាលពីរសៀលថ្ងៃទី១៧ ខែឧសភា ឆ្នាំ២០១៩។
នាឱកាសនោះដែរ តំណាងប្រជាពលរដ្ឋអំពាវនាវដល់អាជ្ញាធរ ស្ថាប័នពាក់ព័ន្ធ និងលោក ជា សុផារ៉ា រដ្ឋមន្ត្រីក្រសួងរៀបចំដែនដី ជាពិសេសសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ហ៊ុន រ៉ានី ហ៊ុន សែន ឲ្យជួយអន្តរាគមន៍ និងបញ្ជូនមន្ត្រីឯករាជ្យចុះអង្កេតទៅលើសកម្មភាព របស់លោកឧកញ៉ា សុខ ប៊ុន និងបក្សពួកគេ ដែលបានក្លែងឯកសារ ប៉ុនប៉ងរំលោភយកដីចម្ការធ្លាប់អាស្រ័យផលជាយូរឆ្នាំមកហើយនោះ ឲ្យមានសុវត្ថិភាពដីធ្លីឡើងវិញ។
សូមបញ្ជាក់ថា ក្តីបារម្ភនេះ របស់ប្រជាពលរដ្ឋទាំង ៤២គ្រួសារ បានដល់ជាបន្តបន្ទាប់មកនេះ បានដាក់ពាក្យបណ្តឹងសុំអន្តរាគមន៍ទៅលោក សេង ហួលាង ចៅសង្កាត់កោះរ៉ុង និងលោក យន្ត មីន អភិបាលខេត្តព្រះសីហនុ កាលពីចុងខែមេសា ឆ្នាំ២០១៩ ពាពិសេសលោក ជា សុផារ៉ា រដ្ឋមន្ត្រីក្រសួងរៀបចំដែនដីនគរូបនីយកម្មនិងសំណង់ ដើម្បីស្នើសុំឲ្យជួយអន្តរាគមន៍ បញ្ឈប់សកម្មភាពរបស់លោក សុខ ប៊ុន ឲ្យបានឆាប់ ដោយអនុគ្រោះ។
ទាក់ទងបញ្ហានេះ តំណាងប្រជាពលរដ្ឋ ៤២គ្រួសារ រស់នៅសង្កាត់កោះរ៉ុង ក្រុងព្រះសីហនុ បានអះអាង កាលពីរសៀលថ្ងៃទី១៧ ខែឧសភា ឆ្នាំ២០១៩ថា បើមិនមានដំណោះស្រាយទេ ពួកគាត់មានគម្រោងប្រមូលផ្តុំគ្នាឡើងទៅដល់ខុទ្ទកាល័យសម្តេចនាយករដ្ឋមន្ត្រី ហ៊ុន សែន ដើម្បីស្នើសុំសម្តេច ឲ្យជួយអន្តរាគមន៍ដោះស្រាយវិវាទដីធ្លី ដែលលោកឧកញ៉ា សុខ ប៊ុន បន្លំឯកសារប៉ុនប៉ងរំលោភ។
បញ្ហាខាងលើនេះ ប្រជាពលរដ្ឋបានឲ្យដឹងថា កាលពីថ្ងៃទី២២ ខែមីនា ឆ្នាំ២០១៨ លោក សុខ ប៊ុន អគ្គនាយ ក្រុមហ៊ុន សុខប៊ុន គ្រុប និង ក្រុមការងារក្រសួងរៀបចំ ដែនដី នគរូបនីយកម្ម និង សំណង់ បាន នាំយកម៉ាស៊ីន ជីភីអេស (GPS) យកទៅចុច វាស់លើបរិវេណដីធ្លី របស់ប្រជាពលរដ្ឋទាំង ៤២គ្រួសារ ដែលកំពុងកាន់កាប់ នៅចំណុច ពយតាផេង ពយអាពត និង ថ្មជញ្ជាំង ស្ថិតនៅភូមិព្រែកស្វាយ សង្កាត់កោះរ៉ុង ក្រុងនិងខេត្តព្រះសីហនុម្តងរួចមកហើយ ប៉ុន្តែកាលណោះត្រូវបានប្រជាពលរដ្ឋផ្ទុះការតវ៉ា។
ងាកមកបណ្តឹង ឬលិខិតស្នើជួយអន្តរាគមន៍ របស់ប្រជាពលរដ្ឋទាំង ៤២គ្រួសារ ដាក់ជូនលោក សេង ហួលាង ចៅសង្កាត់កោះរ៉ុង កាលពីថ្ងៃទី១៧ ខែឧសភា ឆ្នាំ២០១៩ បង្ហាញថា ពួកគាត់មានកិច្ចសន្យាផ្ទេរសិទ្ធិកាន់កាប់ដីពីឆ្នាំ ២០១៣ និង ពាក្យស្នើសុំកាន់កាប់ដីប្រើប្រាស់ចុះថ្ងៃទី៦ ខែតុលា ឆ្នាំ២០០៨ ចុះហត្ថលេខា ដោយលោក អ៊ួង និត អតីតចៅសង្កាត់កោះរ៉ុង។ ហើយថាដីធ្លីខាងលើនេះ ពួកគាត់មានសាលាកប័ត្រព័ត៌មានចុះថ្ងៃទី ១២ ខែសីហា ឆ្នាំ ២០១៥ និងអត្តសញ្ញាណប័ណ្ណ សញ្ជាតិខ្មែរ ត្រឹមត្រូវស្របច្បាប់។
ប្រជាពលរដ្ឋខ្លះឲ្យដឹងទៀតថា ពួកគាត់បានមករស់នៅលើកោះរ៉ុង កាលពីឆ្នាំ១៩៩៣ និងអ្នកខ្លះទៀត បានមករស់នៅឆ្នាំ២០០០មកម្ល៉េះ ដោយបានប្រកបរបរធ្វើចម្ការ ដើម្បីចិញ្ចឹមជីវិត និងបានដាំដំណាំកសិកម្មមួយចំនួននៅលើដីនោះ រួមមានដំណាំ ដូង ខ្នុរ និង ស្វាយចន្ទីរជាដើម នៅលើដីនោះជាក់ស្តែង។
តំណាងប្រជាពលរដ្ឋ ៤២គ្រួសារ ឲ្យដឹងដូច្នេះ រួចបញ្ជាក់ថា ការរស់នៅ និងកាន់កាប់ដីចំការរៀងៗខ្លួនរបស់ពួកគាត់បានបន្តរហូតមកដល់បច្ចុប្បន្ននេះ ក៏មានការទទួល ស្គាល់ពីអាជ្ញាធរមូលដ្ឋានភូមិ-សង្កាត់ និងក្រុងព្រះសីហនុថែមទៀតផង។ ពិសេសជាងនេះដីលំនៅឋាននិងដីចម្ការរបស់ពួកគាត់ទាំង ៤២ គ្រួសារ ត្រូវបានស្ថាប័នជំនាញ នៃក្រុមការងារថ្នាក់ជាតិមានក្រសួងរៀបចំដែនដីនគរូបនីយកម្ម និងសំណង់ និងមន្ត្រីពាក់ព័ន្ធខេត្ត ព្រះសីហនុបានចុះវាស់វែង កំណត់ក្បាលដីត្រៀមចេញបណ្ណកម្មសិទ្ធិ និងបានប្រកាសបិទផ្សាយទិន្នន័យក្បាលដីជាសាធារណៈ នូវឯកសារសុរិយោដី ប្លង់សុរិយោដី និងបញ្ជីឈ្មោះអ្នកកាន់កាប់ដីដែលក្រុមការងារបច្ចេកទេសបានចុះបញ្ជីដីធ្លី និងបានចុះវាស់វែងប្រមូលទិន្នន័យក្បាលដីរួចរាល់ ស្របតាមនីតិវិធីច្បាប់។ ជាងនេះទៀតខាងមន្ត្រីជំនាញក្រសួងរៀបចំដែនដីក៏បានទុកពេល ១៥ ថ្ងៃ សម្រាប់ឲ្យអ្នកពាក់ព័ន្ធធ្វើការតវ៉ាគឺចាប់ពីថ្ងៃទី ១៤ ខែកក្កដា ឆ្នាំ២០១៧ ដល់ថ្ងៃទី ២៨ ខែកក្កដា ឆ្នាំ២០១៧។
ត្រង់ចំណុចនេះ ប្រជាពលរដ្ឋទាំង ៤២ គ្រួសារ បានសំណូមពរដល់លោក យន្ត មីន អភិបាលខេត្ត ព្រះសីហនុ, លោក ជា សុផារ៉ា រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់ ជាពិសេសសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ឲ្យជួយអន្តរាគមន៍ និង អង្កេតទៅលើសកម្មភាពរបស់លោកឧកញ៉ា សុខ ប៊ុន និងបក្សពួក ដែលបានឃុបឃិតក្លែងឯកសារប៉ុនប៉ងរំលោភយកដីធ្លី របស់ពួកគាត់នៅលើ កោះរ៉ុង ដោយឲ្យបានឆាប់អនុគ្រោះផង។
យ៉ាងនេះក្តី អ្នកយកព័ត៌មានគេហទំព័រ cen.com.kh ប្រចាំខេត្តព្រះសីហនុ មិនទាន់អាចទាក់ទង លោក យន្ត មីន អភិបាលខេត្តព្រះសីហនុ ដើម្បីបំភ្លឺជុំវិញវិវាទដីធ្លី រវាង ប្រជាពលរដ្ឋ ៤២ គ្រួសាររស់នៅភូមិព្រែកស្វាយ សង្កាត់កោះរ៉ុង មានទំនាស់ជាមួយលោកឧកញ៉ា សុខ ប៊ុន ដើម្បីបំភ្លឺបានទេ នៅព្រឹកថ្ងៃទី១៨ ខែឧសភា ឆ្នាំ២០១៩នេះ។
ចំណែក លោកឧកញ៉ា សុខ ប៊ុន ដែលមានលំនៅឋានជាអចិន្ត្រៃយ៍នៅរាជធានីភ្នំពេញ ក៏មិនទាន់ស្នើសុំការបំភ្លឺជុំវិញការចោទប្រកាន់របស់ប្រជាពលរដ្ឋទាំង ៤២ គ្រួសារ ដែលចោទរូបលោកថាបានក្លែងឯកសាររំលោភយកដីធ្លីរបស់ពួកគាត់បាននៅឡើយដែរ នៅថ្ងៃទី១៨ ខែឧសភា ឆ្នាំ២០១៩នេះ។
យ៉ាងនេះក្តីយោងតាមឯកសា ចុះថ្ងៃទី ២១ ខែមីនា ឆ្នាំ ២០១៨ របស់ក្រសួងរៀបចំដែនដីនគរូបនីយកម្ម និងសំណង់ផ្ញើជូនអភិបាលខេត្តព្រះសីហនុបានបញ្ជាក់ថា ក្រសួងរៀបចំដែនដី បានឯកភាពជាគោលការណ៍បង្កើតក្រុមការងារចុះពិនិត្យវាស់វែងក្បាលដីទំហំជាង ៥ លាន (៥.២៥០.០០០) ម៉ែត្រការ៉េ របស់ឈ្មោះ សុខ ប៊ុន ស្ថិត នៅភូមិព្រែកស្វាយ សង្កាត់កោះរ៉ុង ក្រុងនិងខេត្តព្រះសីហនុ។ លិខិតនេះបានស្នើសុំឲ្យរដ្ឋបាលខេត្តព្រះសីហនុចាត់មន្ត្រីជំនាញពាក់ព័ន្ធឲ្យចូលរួមអនុវត្តការងារខាងលើ នេះឲ្យបានជោគជ័យ។
សំណើខាងលើនេះ ក្រសួងរៀបចំដែនដីបានចាត់ឲ្យលោក សួន សូផា ដឹកនាំក្រុមការងារចុះសហការអនុវត្តការងារវាស់វែងទំហំផ្ទៃដីខាងលើជាមួយអាជ្ញាធរពាក់ព័ន្ធខេត្ត នៅថ្ងៃទី ២២ ខែមីនា ឆ្នាំ ២០១៨ ឲ្យមានប្រសិទ្ធភាពផងដែរ។
យ៉ាងនេះក្តី នៅក្នុងលិខិតសរសេរដៃ មានផ្តិតស្នាមមេដៃ ចុះថ្ងៃទី២៧ ខែមីនា ឆ្នាំ២០១៨ របស់ ក្រុមការងារចុះវាស់វែងចុះវាស់វែងដីជូន ឈ្មោះ សុខ ប៊ុន មានទីតាំងនៅភូមិព្រែកស្វាយ សង្កាត់កោះរ៉ុង ក្រុង-ខេត្តព្រះសីហនុ បានបដិសេធ និងមិនទទួលស្គាល់ទំហំដីលេខ ៦៩ ក.រ របស់លោក សុខ ប៊ុន ចុះថ្ងៃទី១៨ ខែធ្នូ ឆ្នាំ២០០២ទេ។
កាលណោះក្រុមការងារចុះវាស់វែងដីខាងលើ មានសមាសភាពចំនួន ៦នាក់ ដោយពួកគេបានអះអាងថា ការចុះវាស់វែងដី របស់លោក សុខ ប៊ុន ស្ថិតនៅភូមិព្រែកស្វាយ សង្កាត់កោះរ៉ុង ក្រុងព្រះសីហនុ ថា យោងតាមការចុះវាស់វែងដីជាក់ស្តែង គឺទីតាំងដីពិតប្រាកដ របស់លោក សុខ ប៊ុន ពេលនោះ គឺមានទទឹងប្រវែង ១០៥ម៉ែត្រ និងបណ្តោយ ៥០០ម៉ែត្រ មានទំហំសរុប ៥២៥០០ម៉ែត្រការ៉េគត់។
ត្រង់ចំណុចនេះ ក្រុមការងារចុះវាស់វែងដីខាងលើ បានបញ្ជាក់នៅក្នុងលិខិតដដែលថា ព្រំដីរបស់លោក សុខ ប៊ុន គឺមានព្រំ៖ ខាងជើងទល់នឹង ឆ្នេរថ្មសមុទ្រ ១០៥ម៉ែត្រ។ ខាងត្បូងទល់នឹងចង្កេះភ្នំថ្មជញ្ជាំង។ ខាងកើតទល់នឹង ដីលោក ទេព វុទ្ធី និងខាងលិចទល់នឹង ៥០០ម៉ែត្រ ពីដៃអូរទឹកសាបជាប់ដី ជី វិស័យ និងពីកូនកោះដូង។
ទាក់ទិនបញ្ហានេះ លោក កែវ ពៅ មេភូមិព្រែកស្វាយបច្ចុប្បន្ន និងលោក អ៊ួង និត អតីតចៅសង្កាត់កោះរ៉ុង បានបញ្ជាក់ថា ដី របស់លោក សុខ ប៊ុន មានទំហំត្រឹមតែទទឹង ១០៥ម៉ែត្រ និងបណ្តោយ ៥០០ម៉ែត្រ ឬមានទំហំស្មើ ៥ហិចតា និង២៥អាតែប៉ុណ្ណោះ។ ដីក្រៅពីនេះ គឺជាដី របស់ប្រជាពលរដ្ឋផ្សេង ដែលរស់នៅក្បែរនោះ។ ដូច្នេះលោកទាំងពីរនាក់ បានបដិសេធមិនទទួលស្គាល់ឯកសារទិញលក់ដី របស់លោក សុខ ប៊ុន ដែល មានទំហំលើពីទំហំដីខាងលើនេះ។
ផ្តើមពីបញ្ហានេះ លោក អ៊ួង និត អតីតចៅសង្កាត់កោះរ៉ុង ក៏បានបដិសេធមិនទទួលស្គាល់លិខិតលេខ ៦៩ ក.រ ចុះថ្ងៃទី១៨ ខែធ្នូ ឆ្នាំ២០០២ ដែលជាការទិញ និងលក់ របស់ លោក សុខ ប៊ុន និងលោក ម៉ា ទី ដែលមានទំហំខុសពីការពិតនោះជាដាច់ខាត។ ប៉ុន្តែលោក អ៊ួង និត បានទទួលស្គាល់ទំហំដី ទិញលក់ របស់ លោក សុខ ប៊ុន មានទំហំ ១០៥ម៉ែត្រ គុណ ៥០០ម៉ែត្រ ឬស្មើ៥២៥០០ម៉ែត្រការ៉េតែប៉ុណ្ណោះ។
ចំណែកលោក កែវ ពៅ មេភូមិព្រែកស្វាយ សង្កាត់កោះរ៉ុង កាលពីថ្ងៃទី២៩ ខែមេសា ឆ្នាំ២០១៩ ក៏បានសរសេរលិខិតបដិសេធមួយច្បាប់ផ្ញើជូន លោក សេង ហួលាង ចៅសង្កាត់កោះរ៉ុងបច្ចុប្បន្ន និងផ្ញើជូនប្រជាពលរដ្ឋទាំង ៤២គ្រួសារ ដោយបានបដិសេធដែរថា រូបលោកក៏មិនទទួលស្គាល់លិខិតស្នើសុំកាន់កាប់ប្រើប្រាស់ដីចំការចាស់ និងលិខិតផ្ទេរសិទ្ធិ របស់ ឈ្មោះ សុខ ប៊ុន ដែលបានទិញពីឈ្មោះ ម៉ា ទី ជាប្រជាពលរដ្ឋ រស់នៅភូមិព្រែកស្វាយ សង្កាត់កោះរ៉ុង ក្រុងព្រះសីហនុ ខេត្តព្រះសីហនុ ដែលមានទំហំផ្ទៃដីខុសពីការពិតខាងលើនេះទេ។
ដោយឡែក លោក សេង ហួលាង ចៅសង្កាត់កោះរ៉ុងបច្ចុប្បន្ន កាលពីថ្ងៃទី១៧ ខែឧសភា ឆ្នាំ២០១៩ កបានឲ្យដឹងថា រូបលោកនឹងដាក់លុខិតជូនថ្នាក់ដឹកនាំរដ្ឋបាលខេត្តព្រះសីហនុ និងក្រុមការងារថ្នាក់ជាតិ នៃក្រសួងរៀបចំដែនដីនគរូបនីយកម្ម និងសំណង់ ឲ្យជួយរកដំណោះស្រាយលើបញ្ហាដីធ្លី ជូនប្រជាពលរដ្ឋទាំង ៤២គ្រួសារ ដើម្បីផ្តល់យុត្តិធ៌មជូនពួកគាត់។
ជាងនេះ លោក សេង ហួលាង ចៅសង្កាត់កោះរ៉ុង បានប្រកាសគាំទ្រ និងទទួលស្គាល់ការកាន់កាប់ដីធ្លី របស់ប្រជាពលរដ្ឋទាំង ៤២គ្រួសារ ថាបានរស់នៅភូមិព្រែកស្វាយ សង្កាត់កោះរ៉ុង ក្រុងព្រះសីហនុពិតប្រាកដមែន។ ចំណែករាល់ឯកសារ របស់លោកឧកញ៉ា សុខ ប៊ុន ដែលអះអាងថា មានដីរហូតដល់ជាង ៥រយហិចតានៅលើសង្កាយកោះរ៉ុងនោះ គឺលោកបដិសេធមិនទទួលស្គាល់ទេ។ ប៉ុន្តែលោកទទួលស្គាល់ថា លោក សុខ ប៊ុន មានដីត្រឹមតែ ៥ហិចតា និង ២៥អាតែប៉ុណ្ណោះ។
គួររំលឹកថា លោកឧកញ៉ា សុខ ប៊ុន អគ្គនាយក្រុមហ៊ុន សុខ ប៊ុន គ្រុប កាលពីថ្ងៃទី ១៨ ខែកក្កដា ឆ្នាំ២០១៥ ត្រូវបានតុលាការសាលាដំបូងរាជធានីភ្នំពេញ ចាប់ដាក់គុកម្តងរួចមកហើយពីបទហិង្សាដោយចេតនាមានស្ថានទម្ងន់ទោសដោយសារលោក សុខ ប៊ុន និងអង្គរក្សបានវាយទាត់ធាក់ទៅលើអតីតពិធីការិនីទូរទស្សន៍ CTN គឺកញ្ញាឯក សុជាតា នៅក្នុងភោជនីយដ្ឋានមួយកន្លែងក្នុង រាជធានីភ្នំពេញ៕ ដោយ ៖ ដែន សីមា