(ភ្នំពេញ) ៖ សម្តេចពិជ័យសេនា ទៀ បាញ់ បានថ្លែងថា កម្ពុជាអាចរក្សាសន្តិភាព បានគង់វង្ស និងបន្តអភិវឌ្ឍលើគ្រប់វិស័យ ដើម្បីសម្រួលដល់ការរស់នៅរបស់ប្រជាពលរដ្ឋ ឱ្យកាន់តែរុងរឿងបន្ថែមទៀត ហើយបងប្អូនកុំជាប់ពាក់ព័ន្ធនឹងអំពើល្មើសច្បាប់ផ្សេងៗ ជាពិសេសការចូលរួមប៉ុនប៉ងផ្តួលរំលំ រាជរដ្ឋាភិបាល។
សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានថ្លែងសារតាមរយៈហ្វេសប៊ុក នៅថ្ងៃទី១៨ ខែឧសភា ឆ្នាំ២០១៩នេះថា ៖ “ខ្ញុំយល់ច្បាស់អំពីទុក្ខលំបាកវេទនារបស់ប្រជាជនដែលកំពុងរងនូវភាពអត់ឃ្លានដោយសារសង្គ្រាម។ ខ្ញុំសង្ឃឹមថា សង្គ្រាមនៅតាមបណ្តាប្រទេសនានានឹងត្រូវបានបញ្ចប់ក្នុងពេលឆាប់ៗខាងមុខ ដើម្បីឱ្យប្រជាពលរដ្ឋគ្រប់រូប អាចទទួលបាននូវជីវិតដែលពោរពេញដោយសុខសន្តិភាព”។
សម្តេចពិជ័យសេនា បានថ្លែងបន្តទៀតថា ” ខ្ញុំក៏កាន់តែសង្ឃឹមថា កម្ពុជាអាចរក្សាសន្តិភាពរបស់ខ្លួនបានគង់វង្ស និងបន្តអភិវឌ្ឍលើគ្រប់វិស័យ ដើម្បីសម្រួលដល់ការរស់នៅរបស់ប្រជាពលរដ្ឋឱ្យកាន់តែរុងរឿងបន្ថែមទៀត”។
សម្តេចទៀ បាញ់ ក៏សូមបងប្អូនប្រជាពលរដ្ឋទាំងអស់ មេត្តាប្រុងប្រយ័ត្នចំពោះការបោកប្រាស់ របស់ជនខិលខូចមួយចំនួន ដែលអាចធ្វើឱ្យបងប្អូនជាប់ពាក់ព័ន្ធនឹងអំពើល្មើសច្បាប់ផ្សេងៗ ជាពិសេសការចូលរួមប៉ុនប៉ងផ្តួលរំលំ រាជរដ្ឋាភិបាលស្របច្បាប់ដែលកើតចេញពីការបោះឆ្នោត ៕ ដោយ ៖ កូឡាប