ខេត្តស្វាយរៀង ៖ នាយឧត្តមសេនីយ៍សន្តិបណ្ឌិត នេត សាវឿន និងលោក ម៉ែន វិបុល អភិបាលខេត្តស្វាយរៀងជួបសំណេះសំណាលសួរសុខទុក្ខនិវត្តន៍ជន ជនពិការ និងជនបាត់បង់សមត្ថភាពការងារ ជាអតីតមន្ត្រីនគរបាលជាតិ នៃស្នងការដ្ឋាននគរបាលខេត្តស្វាយរៀង ។
នាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិព្រឹកថ្ងៃទី១៨ ខែឧសភា ឆ្នាំ២០១៩នេះ បានថ្លែងថា អតីតយុទ្ធជននគរបាលជាតិបានរួមចំណែកយ៉ាងធំធេងក្នុងការថែរក្សាសន្តិភាព សន្តិសុខសណ្តាប់ធ្នាប់សង្គមហើយមន្ត្រីនគរបាលបច្ចុប្បន្នគប្បីយកគំរូតាមពួកគាត់ដែលជាបុគ្គលមានបទពិសោធន៍ច្រើនក្នុងកិច្ចការងារនគរបាលនេះ ។
នាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ បានមានប្រសាសន៍ ដូច្នេះក្នុងឱកាសដែលលោកនិងលោក ម៉ែន វិបុល អភិបាលខេត្តស្វាយរៀងបានអញ្ជើញជាអធិបតីនៅក្នុងពិធីជួបសំណេះសំណាលសួរសុខទុក្ខនិវត្តន៍ជន ជនពិការ និងជនបាត់បង់សមត្ថភាពការងារ ជាអតីតមន្ត្រីនគរបាលជាតិ នៃស្នងការដ្ឋាននគរបាលខេត្តស្វាយរៀង ។
អញ្ជើញចូលរួមក្នុងពិធីនេះមាន គណៈប្រតិភូនៃអគ្គស្នងការនគរបាលជាតិ អ្នកតំណាងរាស្ត្រខេត្តព្រៃវែង លោកកស្នងការ ស្នងការរង នាយការិយាល័យ អធិការ លោកនាយប៉ុស្ត៍រដ្ឋបាលទូទាំងខេត្ត និងនិវត្តន៍ជន ជនពិការនិងជនបាត់បងសមត្ថភាពការងារ នៃស្នងការនគរបាលខេត្តស្វាយរៀងសរុបវត្តមានចំនួន៨៩៣នាក់។
លោកនាយឧត្តមសេនីយ៍បានបញ្ជាក់ថា នគរបាលកម្ពុជាបានបង្កើតឡើងអស់រយៈពេល៧៤ឆ្នាំមកហើយ(១៦ឧសភា ១៩៤៥-១៦ឧសភា២០១៩) ហើយប្រទេសជាតិមានសុខសន្តិភាព និងការអភិវឌ្ឍនាពេលបច្ចុប្បន្ននេះ គឺជាការរួមចំណែកយ៉ាងខ្លាំងពីបងប្អូន ដែលជាអតីតមន្ត្រីនគរបាល ដូច្នេះមន្ត្រីនគរបាលទាំងអស់គ្នាត្រូវទទួលយកការអប់រំពីពួកគាត់លើកិច្ចការងារថែរក្សាសន្តិសុខ សណ្តាប់ធ្នាប់សាធារណៈនិងការថែរក្សាសន្តិភាពជូនប្រជាជន និងប្រទេសជាតិ។
បន្ទាប់ពីការអានរបាយការណ៍សង្ខេបរបស់លលោកឧត្តមសេនីទោស្នងការនគរបាលខេត្តអំពីសភាពការ និងកិច្ចប្រតិបត្តការណ៍រក្សាសន្តិសុខ សណ្តាប់ធ្នាប់សង្គម រយះពេល៣ខែ នៃត្រីមាសទី១ ឆ្នាំ២០១៩ របស់កងកម្លាំងនគរបាលទូទាំងខេត្តស្វាយរៀង លោក ម៉ែន វិបុល អភិបាលខេត្តបានមានប្រសាសន៍ថ្លែងនូវការអរគុណយ៉ាងជ្រាលជ្រៅ ចំពោះវត្តមានរបស់លោកនាយ ឧត្ដមសេនីយ៍សន្តិបណ្ឌិត អគ្គស្នងការនគរបាលជាតិ និងគណៈប្រតិភូអមដំណើរដែលបានចំណាយពេលវេលាដ៏មានតម្លៃ ក្នុងកាយវិការបង្ហាញឲ្យឃើញយ៉ាងច្បាស់នូវការយក ចិត្តទុកដាក់របស់រាជរដ្ឋាភិបាល ក្រសួងមហាផ្ទៃ ក៏ដូចជាអគ្គស្នងការដ្ឋាននគរបាលជាតិ ចំពោះសុខទុក្ខរបស់បងប្អូននិវត្តន៍ជន ជនពិការ និងជនបាត់បង់សមត្ថភាពការងារជាអតីតមន្ត្រីនគរបាលជាតិទាំងអស់នៅក្នុងខេត្តស្វាយរៀង។
លោកអភិបាលខេត្តបានបន្តថា ពិធីនេះរឹតតែបានបង្ហាញឲ្យឃើញពីការយកចិត្តទុក្ខដាក់របស់រាជរដ្ឋាភិបាលកម្ពុជា ដែលមានសម្ដេចតេជោនាយករដ្ឋមន្ត្រី ក្រសួងមហាផ្ទៃ និងអគ្គស្នងការដ្ឋាននគរបាលជាតិមិនដែលបំភ្លេច និងនៅតែចងចាំជានិច្ច នូវគុណបំណាច់ និងស្នាដៃដ៏ធំធេងរបស់បងប្អូនដែលធ្លាប់បានចូលរួមទាំងក្នុងបុព្វហេតុ រំដោះប្រទេសជាតិ និងប្រជាជនឲ្យមានសុខសន្តិភាព និងការការពារថែរក្សាសន្តិភាពឲ្យបានគង់វង្សដែលជាមូលដ្ឋានគ្រឹះក្នុងកិច្ចការអភិវឌ្ឍជាតិឲ្យមានការរីកចម្រើនលើគ្រប់វិស័យជាមួយ និងសន្តិសុខសុវត្ថិភាពល្អប្រសើររហូតដល់សព្វថ្ងៃនេះ ៕ ដោយ ៖ វ៉ៃកូ