ខេត្តព្រះសីហនុ៖ អភិបាល នៃគណៈអភិបាលខេត្តព្រះសីហនុ លោក យន្ត មីន មានប្រសាសន៍ថា នៅឆ្នាំ ២០២០ ដែលរដ្ឋបាលខេត្តនេះ នឹងដល់វេនធ្វើជាម្ចាស់ផ្ទះរៀបចំពិធីបុណ្យសមុទ្រ រដ្ឋបាលខេត្តនេះ គ្រោងនឹងជ្រើសយកទីតាំងឆ្នេរអូរត្រេះ ដើម្បីរៀបចំធ្វើជាកន្លែងរៀបចំពិធីបុណ្យ ព្រោះតំបន់នេះមានផ្ទៃដីធំទូលាយ។
អភិបាលខេត្តព្រះសីហនុ បញ្ជាក់ឲ្យដឹងដូច្នេះ កាលពីរសៀលថ្ងៃទី១៨ ខែឧសភា ឆ្នាំ២០១៩នេះ ក្នុងពេលដឹកនាំមន្ត្រីក្រោមឱវាទ ចុះពិនិត្យទីតាំងឆ្នេរអូរត្រេះ និងឆ្នេរមួយចំនួនទៀត។
នាឱកាសនោះដែរ លោក យន្ត មីន អភិបាលខេត្តព្រះសីហនុ បញ្ជាក់ថា ពិធីបុណ្យសមុទ្រលើកក្រោយ នៅឆ្នាំ២០២០ ដែលខេត្តព្រះសីហនុ ទទួលរៀបចំធ្វើជាម្ចាស់ផ្ទះ បន្ទាប់ពីខេត្តកំពត រដ្ឋបាលខេត្តនេះ មានគម្រោងជ្រើសយកទីតាំងឆ្នេរអូរត្រេះ ធ្វើជាកន្លែងប្រារព្ធពិធីបុណ្យសមុទ្រ ព្រោះដោយសារតែតំបន់នេះ មានអនាម័យបរិស្ថានល្អ ហើយមានផ្ទៃដីធំទូលាយ៕ ដែន សីមា
