កំពង់ស្ពឺ ៖ បុរសម្នាក់ស្លាប់ភ្លាមៗ បន្ទាប់ពីបើកម៉ូតូបុករថយន្ដដែលខូចនៅលើផ្លូវជាតិលេខ៥១ ស្ថិតនៅត្រង់ចំណុច ភូមិប៉ាលហាល ឃុំចាន់សែន ស្រុកឧដុង្គ កាលពីថ្ងៃសៅរ៍ ទី ១៨ ខែឧសភា ឆ្នាំ២០១៩ វេលាម៉ោង២០និង០០នាទី ចន្លោះគីឡូម៉ែត្រ(18-19) ។
ស្នងការដ្ឋាននគរបាលខេត្តកំពង់ស្ពឺ បានឲ្យដឹងថា ករណីគ្រោះថ្នាក់នេះ មានម៉ូតូ០១គ្រឿង ម៉ាកហុងដា C125 ពណ៌ខ្មៅ ពាក់ស្លាកលេខ កំពង់ស្ពឺ 1B. 8528 បើកបរ ដោយឈ្មោះ សុត ធឿន ភេទប្រុស អាយុ 44ឆ្នាំ រស់នៅភូមិជ្រៃក្រាំងខ្នុរ ឃុំដំណាក់រាំង ស្រុកឧដុង្គ ធ្វើដំណើរក្នុងទិសដៅ ពីជើងទៅត្បូង លុះមកដល់ចំណុចខាងលើបានជិះទៅបុកផ្នែកខាងក្រោយរថយន្ត ម៉ាក ហ៊ីយ៉ានដាយ ពណ៌ស ពាក់ផ្លាកលេខ ភ្នំពេញ 3C.0210 ដែលកំពុងឈប់ជួសជុល (រថយន្តខូច)នៅលើចិញ្ចើមផ្លូវខាងលិច ក្នុងទិសដៅស្របទិសគ្នា ដោយមានដាក់មែកឈើ កេះឡាំង កង់រថយន្ត ជាសញ្ញាពីខាងក្រោយរថយន្ត ចម្ងាយ២៥ម៉ែត្រ ព្រមទាំងមានបើកភ្លើងស៊ីញ៉ូសុំផ្លូវ ដែលមានអ្នកបើកបរឈ្មោះ អ៊ឹម អុន ភេទប្រុស អាយុ ៤០ឆ្នាំ រស់នៅភូមិស្រះធុល ឃុំយុទ្ធសាមគ្គី ស្រុកឧដុង្គ។
តាមការបញ្ជាក់ពីជំនាញចរាចរណ៍ឲ្យដឹងថា មូលហេតុគឺអ្នកបើកម៉ូតូបាត់ម្ចាស់ការមើលមិនឃើញសញ្ញា ដែលដាក់នៅពីក្រោយរថយន្ដគេចជ្រុលចង្កូតទៅបុកគូថរថយន្ដតែម្ដង រថយន្តតាមការពិនិត្យ គឺបានចតនៅលើថ្នល់អែមចិញ្ចើមផ្លូវដីក្រហម ។
បច្ចុប្បន្នវត្ថុតាងរថយន្តនិងម៉ូតូ សមត្ថកិច្ចយករក្សាទុកនៅអធិការដ្ឋាននគរបាលស្រុកឧដុង្គ ដើម្បីចាត់ការតាមនីតិវិធីច្បាប់ ៕
