ស្ថាបនិករបស់ក្រុមហ៊ុនអេឡិចត្រូនិចយក្ស Huawei គឺលោក Ren Zhengfei បាននិយាយថា ក្រុមហ៊ុនរបស់លោកបានត្រៀមខ្លួនរួចរាល់ហើយក្នុងការដោះស្រាយពីសម្ពាធរបស់អាមេរិច ហើយខ្លួននឹងធ្វើការកាត់បន្ថយការពឹងពាក់លើគ្រឿងរបស់អាមេរិច ។
ការប្រកាសរបស់ស្ថាបនិករូបនោះ កើតឡើងក្រោយពេល ប្រធានាធិបតីអាមេរិចបានប្រកាសបិទទីផ្សាររបស់ក្រុមហ៊ុន Huawei នៅអាមេរិចកាលពីថ្ងៃពុធសប្តាហ៍មុន និងដាក់បញ្ជូលក្រុមហ៊ុនចូលក្នុងបញ្ជី ដែលដាក់កំហិតក្រុមហ៊ុនអាមេរិចទាំងអស់មិនឲ្យលក់អ្វីៗឡើយទៅអោយក្រុមហ៊ុននោះ ក្រោយមានជម្លោះពាណិជ្ជកម្មជាមួយនឹងទីក្រុងប៉េងកាំង។
ប្រធានរបស់ Huawei បានថ្លែងប្រាប់អ្នកសារពត៌មានជប៉ុននៅថ្ងៃអាទិត្យដូច្នេះថា “ពួកយើងបានត្រៀមខ្លួនរួចរាល់ហើយសម្រាប់បញ្ហានេះ”។
លោកបញ្ជាក់ថា Huawei នឹងនៅតែបន្តអភិវឌ្ឍន៍ធាតុផ្សំរបស់ខ្លួន ដើម្បីកាត់បន្ថយការពឹងពាក់លើអ្នកផ្គត់ផ្គង់បរទេស។ Huawei គឺជាក្រុមហ៊ុនដែលមានបច្ចេកវិទ្យា 5G ឈានមុខគេ ប៉ុន្តែក្រុមហ៊ុននេះនៅតែពឹងផ្អែកទៅលើអ្នកផ្គត់ផ្គង់បរទេស។
ក្រុមហ៊ុនបានទិញវត្ថុធាតុផ្សំដែលមានតម្លៃជាទឹកប្រាក់ប្រមាណ ៦៧ពាន់លានដុល្លាជារៀងរាល់ឆ្នាំ ដោយក្នុងនោះបានចំណាយ ១១ពាន់លានដុល្លាដើម្បីទិញវត្ថុធាតុផ្សំពីអ្នកផ្គត់ផ្គង់អាមេរិច។ នេះបើតាមទិន្នន័យរបស់សារពត៌មានជំនួញ Nikkei។
សូមបញ្ជាក់ថា ការបិទខ្ទប់ផលិតផលរបស់ Huawei នៅក្នុងទីផ្សារអាមេរិច ដោយសារអាមេរិចសំដែងការព្រួយបារម្ភពីបញ្ហាសន្តិសុខជាតិ។ អាមេរិចក៏បានបញ្ចុះបញ្ចូលឲ្យសម្ព័ន្ធមិត្តឈប់ប្រើប្រាស់ផលិតផល Huawei ផងដែរ៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia