ម្ចាស់ និងអ្នកគ្រប់គ្រងអាគារមួយខ្នងនៅកូរ៉េខាងត្បូង ដែលត្រូវភ្លើងឆាបឆេះ បណ្តាលឲ្យមនុស្សស្លាប់ក្នុងភ្លើងចំនួន ២៩នាក់ ត្រូវបានចាប់ខ្លួន និងចោទប្រកាន់ពីបទឃាតកម្ម។ នេះបើតាមការបញ្ជាក់របស់មន្ត្រីប៉ូលីសកូរ៉េខាងត្បូង កាលពីថ្ងៃម្សិលមិញនេះ។
កាលពីសប្តាហ៏មុន ភ្លើងបានលេបត្របាក់អាគារកំពស់ ៨ជាន់នៅក្នុងទីក្រុង Jecheon ភាគខាងជើងខេត្ត North Chungcheong ដែលអគ្គិភ័យនេះគឺជាហេតុការណ៏ដ៏អាក្រក់បំផុតនៅក្នុងប្រទេសកូរ៉េខាងត្បូងក្នុងរយៈពេល ៨ឆ្នាំចុងក្រោយនេះ។
ម្ចាស់អាគារ ដែលត្រូវបានគេស្គាល់ត្រឹមត្រកូលថា Lee ត្រូវបានចោទប្រកាន់ពីបទរំលោភស្តងដាសុវត្ថិភាពអគ្គិភ័យ និងការប្រព្រឹត្តអំពើឃាតកម្ម ដោយធ្វេសប្រហែស។ ចំនែកអ្នកគ្រប់គ្រងវិញ ដែលគេស្គាល់ថាឈ្មោះ Kim ត្រូវបានចោទប្រកាន់ពីបទឃាតកម្មដោយអចេតនា។
ប៉ូលីសកូរ៉េខាងត្បូងកំពុងស្វែងរកដីការចាប់ខ្លួនបន្ថែមទៀតដើម្បីបន្ថែមរយៈពេលនៃការឃុំខ្លួនរបស់អ្នកទាំងពីរនាក់នោះ៕