ក្រុមហ៊ុនអាមេរិច Google បានបិទលែងអោយក្រុមហ៊ុន Huawei របស់ចិនធ្វើបច្ចុប្បន្នភាព (Update) លើប្រព័ន្ធប្រតិបត្តិការ Andriod របស់ខ្លួន។ ដូច្នេះមានន័យថា អ្នកប្រើប្រាស់ទូរស័ព្ទរបស់ក្រុមហ៊ុន Huawei នឹងមិនអាចប្រើប្រាស់កម្មវិធីសំខាន់ៗរបស់ Google បានទៀតទេ ដូចជាកម្មវិធី Youtube ជាដើម។
វិធានការរបស់ Google លើ Huawei នេះកើតឡើង ក្រោយពេលរដ្ឋបាលលោកដូណាល់ ត្រាំ បានដាក់បញ្ជូលក្រុមហ៊ុន Huawei ចូលក្នុងបញ្ជីខ្មៅ ដែលក្រុមហ៊ុនអាមេរិចទាំងអស់មិនអាចធ្វើជំនួញជាមួយបានឡើយ ប្រសិនជាពួកគេមិនមានអាជ្ញាប័ណ្ណ។
នៅក្នុងសេចក្តីប្រកាស Google បានថ្លែងថា “ខ្លួនបានអនុវត្តទៅតាមការដាក់បញ្ជា”។
អ្នកប្រើប្រាស់ទូរស័ព្ទរបស់ Huawei ពីមុនៗនឹងអាចធ្វើការ update កម្មវិធីរបស់ពួកគេបាន ប៉ុន្តែនៅចុងឆ្នាំនេះ Google នឹងបញ្ចេញកំណែថ្មីនៃប្រព័ន្ធ Android ដូច្នេះអ្នកប្រើប្រាស់របស់ Huawei នឹងមិនមានកម្មវិធីរបស់ Google នោះទេ ដូចជា Youtube, Gmail, Maps និងកម្មវិធីសំខាន់ជាច្រើនទៀត ៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC