ខេត្តព្រះសីហនុ ៖ រដ្ឋបាលខេត្តព្រះសីហនុ បានប្រារព្ធពិធីរំលឹក ទិវាជាតិ នៃការចងចាំ ថ្ងៃ២០ឧសភា ដោយបាននិមន្តព្រះសង្ឃរាប់បាត្រ បង្សុកូល និងគោរព្ធវិញ្ញាណក្ខ៏ន្ធ ជូនដល់ជនរងគ្រោះ ដែលបានស្លាប់ក្នុងរបបប្រលយ័ពូជសាសន៍ប៉ុល ពត។
ពិធីនេះរៀបចំនៅសាលាខេត្តព្រះសីហនុ កាលពីព្រឹកថ្ងៃចន្ទ ទី២០ ខែឧសភា ឆ្នាំ២០១៩ ដោយមានព្រះសង្ឃ ប្រជាពលរដ្ឋ មន្ត្រីរាជការ និងកងកម្លាំងប្រដាប់អាវុធទាំងបីស្ថាប័នចូលរួមច្រើនកុះករ។
នាឱកាសនោះដែរ លោក យន្ត មីន អភិបាលខេត្តព្រះសីហនុ បានអំពាវនាវឲ្យប្រជាពលរដ្ឋខ្មែរទាំងអស់ ត្រូវចូលរួមថែរក្សាសន្តិភាព និងសិទ្ធិសេរីភាព ដែលកម្ពុជា កំពុងមានពេញលេញដូចសព្វថ្ងៃនេះ ឲ្យបានគង់វង្សថឹតថេរយូរអង្វែងជានិរន្តរទៅថ្ងៃអនាគត។
លោកបន្តថា ជារៀងរាល់ឆ្នាំនៅថ្ងៃ២០ ឧសភា រាជរដ្ឋាភិបាលកម្ពុជា បានកំណត់ជាថ្ងៃទិវាជាតិ នៃការចងចាំចំពោះរបបប្រល័យពូជសាសន៍ កម្ពុជាប្រជាធិបតេយ្យដែលបានកាប់សម្លាប់ប្រជាជនខ្មែរស្លូតត្រង់អស់រាប់លាននាក់។
លោកអភិបាលឲ្យដឹងបន្ត ការប្រារព្ធពិធីរំលឹកទិវាជាតិ នៃការចងចាំថ្ងៃ២០ឧសភានេះ ក៏ជាសាររំលឹក និងត្រូវរួមគ្នាទប់ស្កាត់មិនឲ្យរបបប្រល័យពូជសាសន៍ប៉ុលពត មិនឲ្យកើតមានជាថ្មីទៀត នៅកម្ពុជាទៀតទេ។
លោក យន្ត មីន ឲ្យដឹងដូច្នេះ រួចបញ្ជាក់ថា គោលដៅចម្បង នៃការប្រារព្ធទិវាចងចាំជារៀងរាល់ឆ្នាំ របស់រដ្ឋាភិបាលជាបន្តបន្ទាប់មកនេះ ដើម្បីរំឭកពីការឈឺចាប់ជាប្រវត្តិសាស្ត្រ ចន្លោះឆ្នាំ១៩៧៥ ដល់ឆ្នាំ១៩៧៩ នៃរបបប្រល័យពូជសាសន៍ ប៉ុល ពត នេះ សម្រាប់ប្រជាពលរដ្ឋមានវ័យចំណាស់ ធ្លាប់បានឆ្លងកាត់ពីអតីតកាល ត្រូវបានពួកអាវខ្មៅ វាយធ្វើបាប កាប់សម្លាប់ បង្អត់អាហារ ធ្វើទារុណកម្ម និងរំលោភបំពានលើសិទ្ធិសេរីភាពរបស់ប្រជាពលរដ្ឋគ្រប់បែបយ៉ាង ។
ផ្តើមពីបញ្ហានេះ លោក យន្ត មីន អភិបាលខេត្តព្រះសីហនុ ថ្លែងចាត់ទុកការប្រារព្ធទិវាជាតិ នៃការចងចាំនេអ ដើម្បីសម្តែងនូវការឈឺចាប់ខ្លោចផ្សា ចំពោះសោកនាថកម្ម ដែលប្រជាជនកម្ពុជា ស្លូតត្រង់រាប់លាននាក់ ត្រូវបានកាប់សម្លាប់យ៉ាងអយុត្តិធម៌ ក្រោមរបបប្រល័យពូជសាសន៍ខ្មែរក្រហម ប៉ុល ពត ដ៏ខ្មៅងងឹត។
លោកអភិបាលបន្តថា ការឈឺចាប់នៅក្នុងចិត្ត របស់បងប្អូនប្រជាពរដ្ឋខ្មែរ ដែលឆ្លងកាត់របបខ្មែរក្រហម ប៉ុលពត ទោះបីរបបនេះបានដួលរលំជិត ៤០ឆ្នាំមកហើយក្តី ក៏ប៉ុន្តែប្រជាពលរដ្ឋខ្មែរ ដែលឆ្លងកាត់របបនោះ នៅតែចងចាំមិនអាចបំភ្លេចបានទេ អំពីការព្រាត់ប្រាស់ អត់ឃ្លាន ការបាត់បង់ប្តីប្រពន្ធ កូន បងប្អូន ឪពុក ម្តាយ និងសាច់ញាតិជាទីស្រឡាញ់ របស់ខ្លួន ដែលបានឃ្លាតចាកឆ្ងាយគ្នា គ្មានថ្ងៃជួបទៀតទេ៕ ដែន សីមា