ខេត្តព្រះសីហនុ៖ តំណាងប្រជាពលរដ្ឋសហគមន៍មានទំនាស់ដីធ្លី ប្រចាំខេត្តព្រះសីហនុ លោក យូ វាសនា បានឲ្យដឹងថា នៅព្រឹកថ្ងៃអង្គារ ទី២១ ខែឧសភា ឆ្នាំ២០១៩នេះ ប្រជាពលរដ្ឋចំនួន ១០សហគមន៍ រស់នៅខេត្តព្រះសីហនុ មានគ្នាសរុបប្រមាណ ៣០០នាក់ នឹងមកជួបជុំគ្នា នៅពីមុខបរិវេណសាលាខេត្តព្រះសីហនុ។
លោក យូ វាសនា បន្តថា គោលបំណង នៃការប្រមូលផ្តុំរបស់ប្រជាពលរដ្ឋទាំង ១០សហគមន៍នេះ ប្រយោជន៍ដើម្បីធ្វេីការតស៊ូមតិ និងសំណូមពរដល់លោក យន្ត មីន អភិបាល នៃគណៈអភិបាលខេត្តព្រះសីហនុ ឲ្យជួយពន្លឿនការដោះស្រាយវិវាទដីធ្លី ជាពិសេសស្នើឲ្យជួយពន្លឿនចេញបណ្ណ័កម្មសិទ្ធិដីធ្លី ជូនប្រជាពលរដ្ឋទាំង ១០សហគមន៍ ឲ្យមានសុវត្ថិភាពដីធ្លីឲ្យបានឆាប់។
ជាងនេះទៀត ប្រជាពលរដ្ឋទាំង ១០សហគមន៍ ក៏នឹងយកឱកាសជួបជុំគ្នានោះ សំណូមពរដល់សម្តេចតេជោអគ្គមហាសេនាបតី តេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ឲ្យជួយអន្តរាគមន៍ចេញប្លង់កម្មសិទ្ធិដី និងដោះស្រាយទំនាស់ដីធ្លីជូនពួកគាត់ឲ្យបានឆាប់ផងដែរ។
ទាក់ទិនបញ្ហានេះ តំណាងប្រជាពលរដ្ឋមានទំនាស់ដីធ្លីទាំង ១០សហគមន៍ បានរអ៊ូរទាំថា សកម្មភាពចុះអនុវត្តការងារ របស់មន្ត្រីជំនាញ រដ្ឋបាលខេត្តព្រះសីហនុនាពេលកន្លងមក ហាក់មានការយឺតយ៉ាវក្នុងការចេញប័ណ្ណកាន់កាប់ដីធ្លី ជូនប្រជាពលរដ្ឋពួកគាត់ ដោយអូសបន្លាយពេលយូរឆ្នាំមកហើយនោះ..៕ ដែន សីមា
