ភ្នំពេញ៖ គណៈកម្មាធិការជាតិរៀបចំការបោះឆ្នោត(គ.ជ.ប) បានប្រកាសថា គិតត្រឹមថ្ងៃទី២៦ ខែធ្នូ ឆ្នាំ២០១៧នេះ ក្នុងដំណាក់កាលបិទផ្សាយបញ្ជីបោះឆ្នោតដំបូងក្រុមប្រឹក្សាឃុំសង្កាត់ ពុំបានទទួលពាក្យបណ្តឹងជំទាស់ឡើយ ប៉ុន្តែទទួលបណ្តឹងតវ៉ាចំនួន៥១ បណ្តឹង។
យោងតាមសេចក្តីប្រកាសព័ត៌មានសេចក្ដីប្រកាសព័ត៌មាន លេខ ២៩២ ស្ដីពីការដាក់ ការទទួល និងការដោះស្រាយពាក្យបណ្ដឹងនៅ កបឃ.ស ទាក់ទងនឹងការបិទផ្សាយបញ្ជីបោះឆ្នោតដំបូង បានបញ្ជាក់ថា បណ្តឹងតវ៉ាទាំង៥១រួមមាន៖ បណ្តឹងតវ៉ាសុំកែតម្រូវទិន្នន័យក្នុងបញ្ជីបោះឆ្នោត មានចំនួន១២បណ្តឹងក្នុងនោះ ខេត្តបន្ទាយមានជ័យ១បណ្តឹង យល់ព្រមតាមពាក្យបណ្តឹង ខេត្តកំពត១បណ្តឹង យល់ព្រមតាមពាក្យបណ្តឹង និងរាជធានីភ្នំពេញ១បណ្តឹង យល់ព្រមតាមពាក្យបណ្តឹង ខេត្តកំពង់ស្ពឺ៧បណ្ដឹង យល់ព្រមតាមពាក្យបណ្តឹង និងខេត្តឧត្តរមានជ័យ២បណ្តឹង យល់ព្រមតាមពាក្យបណ្តឹង។ បណ្តឹងតវ៉ាសុំរក្សាទុកឈ្មោះក្នុងបញ្ជីបោះឆ្នោតមាន៣៩បណ្តឹង រួមមាន៖ ខេត្តពោធិ៍សាត់ ៣៨បណ្តឹង យល់ព្រមតាមពាក្យបណ្តឹង និងខេត្តតាកែវ១បណ្តឹង យល់ព្រមតាមពាក្យបណ្តឹង។
គ.ជ.ប បានបញ្ជាក់ថា ក្នុងដំណាក់កាលចុះឈ្មោះបោះឆ្នោតដែលបានកន្លងផុតទៅ ក្រុមប្រឹក្សាឃុំសង្កាត់ និងគណៈកម្មាធិការជាតិរៀបចំការបោះឆ្នោតបានទទួលពាក្យបណ្តឹងចំនួន២បណ្តឹង ដែលជាប្រភេទបណ្តឹងសុំឲ្យធ្វើការផាកពិន័យ។ បណ្តឹងទាំង២នោះ មាន ១បណ្តឹងផ្សះផ្សាមិនសះជា និង១បណ្តឹងទៀត ធ្វើលិខិតជូនដំណឹង៕ ដោយ៖បញ្ញាស័ក្តិ
