ខេត្តព្រះសីហនុ៖ នៅព្រឹកថ្ងៃទី២១ ខែឧសភា ឆ្នាំ២០១៩នេះ តំណាងប្រជាពលរដ្ឋសហគមន៍មានទំនាស់ដីធ្លីចំនួន ៨សហគមន៍ ស្ថិតក្នុងចំណោម ១៣សហគមន៍ នាខេត្តព្រះសីហនុ បានមកជួបជុំគ្នា នៅពីមុខបរិវេណសាលាខេត្តព្រះសីហនុ ដើម្បីស្នើជួបលោកអភិបាលខេត្តព្រះសីហនុ ឲ្យជួយដោះស្រាយវិវាទដីធ្លីជូនពួកគាត់។
តំណាងសហគមន៍បន្តថា គោលបំណង នៃការជួបជុំរបស់ប្រជាពលរដ្ឋទាំង ៨សហគមន៍នាឱកាសនេះ ដើម្បីធ្វេីការតស៊ូមតិ និងសំណូមពរដល់លោក យន្ត មីន អភិបាល នៃគណៈអភិបាលខេត្តព្រះសីហនុ ឲ្យជួយពន្លឿនការដោះស្រាយវិវាទដីធ្លី ជាពិសេសស្នើឲ្យជួយពន្លឿនសកម្មភាពចុះវាស់ក្បាលដី និងឈានទៅចេញបណ្ណ័កម្មសិទ្ធិដីធ្លី ជូនប្រជាពលរដ្ឋពួកគាត់ ឲ្យមានសុវត្ថិភាពឲ្យបានឆាប់។
បន្ថែមលើនេះ តំណាងប្រជាពលរដ្ឋទាំង ៨សហគមន៍ ក៏បានយកឱកាសជួបជុំគ្នានៅព្រឹកនេះ លើកជាសំណូមពរដល់ សម្តេចតេជោអគ្គមហាសេនាបតី តេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ឲ្យជួយអន្តរាគមន៍ដោះស្រាយទំនាស់ដីធ្លី, ជួយពន្លឿនចុះវាស់វែងក្បាលដី និងជួយពន្លឿនចេញប្លង់កម្មសិទ្ធិដីធ្លី ជូនពួកគាត់ប្រើប្រាស់ឲ្យបានឆាប់ ដោយអនុគ្រោះ។
តំណាងប្រជាពលរដ្ឋមានទំនាស់ដីធ្លីទាំង ៨សហគមន៍ បានរអ៊ូរទាំ និងរិះគន់ សកម្មភាពចុះអនុវត្តការងារ របស់មន្ត្រីជំនាញ នៃរដ្ឋបាលខេត្តព្រះសីហនុ ថាហាក់មានការយឺតយ៉ាវ និងអូសបន្លាយពេលយូរឆ្នាំមកហើយ នៅឡើយគ្មានដំណោះស្រាយទៀត។
យ៉ាងណាក៏ដោយចុះ នៅព្រឹកថ្ងៃទី២១ ខែឧសភា ឆ្នាំ២០១៩នេះ មន្ត្រីរដ្ឋបាលខេត្តព្រះសីហនុ បានចេញមកជួប និងអនុញ្ញាតិឲ្យតំណាងប្រជាពលរដ្ឋ ៨សហគមន៍ ចូលជួប ដើម្បីរកដំណោះស្រាយ ប៉ុន្តែចំពោះលទ្ធផលបែបណានោះ នៅមិនទាន់ដឹងទេ ព្រោះកំពុងជួបប្រជុំពិភាក្សាគ្នាមិនទាន់ចប់នៅឡើយ៕ ដែន សីមា
