កំពង់ចាម ៖ នារីម្នាក់ជាគ្រូបង្រៀនភាសាកូរ៉េម្នាក់ ត្រូវបានគេប្រទះឃើញដេកស្លាប់ នៅវេលាម៉ោង ៧ និង៣០នាទីព្រឹកថ្ងៃទី២១ ខែឧសភា ឆ្នាំ២០១៩នេះ នៅចំណុចសាលាបឋមសិក្សាហ៊ុន ណេង ភូមិបឹងដែង ឃុំព្រែកកក់ ស្រុកស្ទឹងត្រង់ ខេត្តកំពង់ចាម។
ករណីឃាតកម្មមួយបង្កឡើងដោយជនសង្ស័យមិនស្គាល់អត្តញ្ញាណ បានធ្វើសកម្មភាពវាយជន រងគ្រោះប្រុស-ស្រីពីរនាក់ បណ្តាលឲ្យស្លាប់ម្នាក់នៅនឹងកន្លែងកើតហេតុ ឯម្នាក់ទៀតរងរបួសធ្ងន់ កំពុងសង្គ្រោះនៅមន្ទីរពេទ្យ បង្កការភ្ញាក់ផ្អើលយ៉ាងខ្លាំងនៅទីតាំងកន្លែងកើតហេតុ។
ប្រភពព័ត៌មានបានឲ្យដឹងថា ជនរងគ្រោះទី១-ឈ្មោះ ហ៊ី ធាវីន ភេទស្រី អាយុ២៤ឆ្នាំ (ស្លាប់នៅនឹងកន្លែងកើតហេតុ) មានទីលំនៅ ស្ថិតនៅក្នុងភូមិអណ្តូងច្រោស ឃុំក្រឡា ស្រុកកំពង់សៀម ខេត្តកំពង់ចាម ជាគ្រូបង្រៀនភាសាកូរ៉េ នៅសាលាបឋមសិក្សាហ៊ុនណេងស្ទឹងត្រង់ សាកសពនារីជាគ្រូភាសាកូរ៉េ ស្ថានភាពបែកក្បាល ពាក់អាវ តែខោត្រូវគេសម្រាតចេញទាំងអស់។
ចំណែកជនរងគ្រោះម្នាក់ទៀត ឈ្មោះ ម៉ៅ សុខមិញ ភេទប្រុស អាយុ២១ឆ្នាំ រស់នៅភូមិព្រែកចាក់ ឃុំព្រែកចាក់ ស្រុកស្ទឹងត្រង់ រងរបួសធ្ងន់ កំពុងសង្គ្រោះបន្ទាន់នៅមន្ទីរពេទ្យ។ ចំពោះអំពើឃាតកម្មខាងលើនេះ សមត្ថកិច្ចកំពុងដាក់ការសង្ស័យជាជំហានដំបូងថា ផ្តើមពីរឿងស្នេហាត្រីកោណ។
ខណ:ពេលនេះ សមត្ថកិច្ច កំពុងហ៊ុមព័ទ្ធកន្លែងកើតហេតុ ដើម្បីប្រមូលវត្ថុតាង និងស្រាវជ្រាវ តាមចាប់ជនសង្ស័យ យកមកផ្តន្ទាទោសតាមផ្លូវច្បាប់ ៕ ដោយ ៖ កូឡាប
