ភ្នំពេញ ៖ លោករដ្ឋមន្ត្រីក្រសួងព័ត៌មាន បានប្រកាសជាសាធារណៈនៅលើបណ្ដាញសង្គមទូទៅដើម្បីឱ្យមន្ត្រី របស់ខ្លួនបានដឹង និងភ្ញាក់ខ្លួន ពាក់ព័ន្ធនឹងករណីដែលមន្ត្រីមួយចំនួន ចំណុះឲ្យក្រសួងព័ត៌មានមិនដែលមកធ្វើការ គឺចាំដល់ខែបើកលុយតែម្ដង ដោយលោករដ្ឋមន្ត្រី ដាក់បទបញ្ជាយ៉ាងម៉ឹងម៉ាត់ សូមឱ្យអគ្គនាយកដ្ឋានទាំងអស់ ចំណុះឲ្យក្រសួងព័ត៌មាន ផ្ញើឈ្មោះនិងរូបថត ចំពោះមន្ត្រីណាដែលមិនមកធ្វើការ ចាំតែដល់ថ្ងៃមកបើកប្រាក់ខែ ។
លោករដ្ឋមន្ត្រីបានបញ្ជាក់បន្ថែមចុងក្រោយថា នៅពេលបានឈ្មោះនិងរូបថតមន្ត្រីទាំងនោះហើយ លោកនឹងយកមកបង្ហោះនៅលើបណ្ដាញសង្គមតែម្ដងដើម្បីឱ្យមជ្ឈដ្ឋានទូទៅស្គាល់មុខស្គាល់មាត់។
រដ្ឋមន្ត្រីក្រសួងព័ត៌មាន លោក ខៀវកាញារីទ្ធបានថ្លែងតាមរយៈ facebook នៅថ្ងៃទី ២១ ខែឧសភានេះថា ” ក្រោយពីមានការរអ៊ូរទាំរបស់មន្ត្រីកក្រសួងព័ត៌មាន ក្រសួងព័ត៌មានសុំអោយគ្រប់អគ្គនាយកដ្ឋានបញ្ជូនឈ្មោះ និងរូបថតមន្ត្រីណាខ្លះ ដែលមានតែឈ្មោះ តែបេីកប្រាក់ខែ ដើម្បីរួមចំណែកអភិបាលកិច្ចល្អ របស់រាជរដ្ឋាភិបាល ដេីម្បីខ្ញុំបង្ហោះរូបអ្នកដែលសុីលេីកម្លាំងមន្ត្រីក្រសួង”៕ ដោយ៖កូឡាប
