ភ្នំពេញ ៖ មជ្ឈមណ្ឌលសំចតសង្គមកិច្ចរាជធានីភ្នំពេញ ដែលមានលោកស្រី មុំ ចាន់ដានី ជាប្រធាននោះ ដែលមជ្ឈដ្ឋានទូទៅស្គាល់ថាមជ្ឈមណ្ឌលព្រៃស្ពឺ បានយកសពបុរសម្នាក់ទៅបូជានៅវត្តឬស្សីសាញ់ ដោយមិនបានប្រាប់សាច់ញាតិឲ្យដឹងឡើយ បានបង្កឱ្យមានការភ្ញាក់ផ្អើលដល់សាច់ញាតិ។ មណ្ឌលនេះ គឺជាក្តីសង្ឃឹមមួយ របស់អ្នកមានបញ្ហាផ្នែកសតិ ចុះឥឡូវសង្ឃឹមយ៉ាងម៉េចកើត បើបណ្តោយទុកឲ្យអ្នកជំងឺឈឺរហូតដល់ស្លាប់ ទើបបញ្ជូនទៅមន្ទីរពេទ្យ ហើយបានស្លាប់រួចយកសពទៅដុតឆេះខ្ទេច ហាក់ដូចជាក្នុងន័យបំបាត់ភស្តុតាង។
បុរសម្នាក់ត្រូវ ក្រុមគ្រួសារអះអាងថា មានសតិមិនគ្រប់ ហើយបានយកផ្ញើនៅមណ្ឌលសំចតសង្គមកិច្ចរាជធានីភ្នំពេញ ។ ក្រោយធ្លាក់ខ្លួនឈឺរហូតស្លាប់ ត្រូវបានលោកស្រី មុំ ចាន់ដានី ប្រធានមណ្ឌល ឲ្យបុគ្គលិកយកសពទៅកាន់ឈាបនដ្ឋានបូជា ដោយមិនបានផ្តល់ដំណឹងដល់ក្រុមគ្រួសារសព ឬជម្រាបទៅនគរបាលមូលដ្ឋានឲ្យចុះទៅពិនិត្យសាកសពនោះទេ ។ ធ្វើឲ្យក្រុមគ្រួសារសពកើតទុកមិនសុខចិត្តប្តឹងនគរបាលខណ្ឌពោធិ៍សែនជ័យ ឲ្យជួយស្រាវជ្រាវរកមូលហេតុបណ្តាលឲ្យកូន ប្អូន ពួកគាត់ ស្លាប់។
ហេតុការណ៍នេះ មានការភ្ញាក់ផ្អើល នៅម៉ោងជាង៥ល្ងាចថ្ងៃទី២១ ខែឧសភា ឆ្នាំ២០១៩ នៅមជ្ឈមណ្ឌលសំចតសង្គមកិច្ចរាជធានីភ្នំពេញ ដែលមានទីតាំងស្ថិត នៅក្នុងភូមិស្រែជម្រៅ សង្កាត់ចោមចៅ២ ខណ្ឌពោធិ៍សែនជ័យ រាជធានីភ្នំពេញ។
បើយោងតាម ក្រុមគ្រួសារសព បានឲ្យដឹងថា បុរសដែលស្លាប់នោះឈ្មោះ នួន រដ្ឋា អាយុ២៧ឆ្នាំ មានទីលំនៅភូមិឫស្សី សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ។
ក្រុមគ្រួសារបានរៀបរាប់ ប្រាប់នគរបាលបន្តថា ដោយសារជនរងគ្រោះ មានសតិមិនគ្រប់ កាលពី១ឆ្នាំមុនក្រុមគ្រួសារ បានសម្រេចយកជនរងគ្រោះទៅផ្ញើមណ្ឌលសំចតសង្គមកិច្ច រាជធានីភ្នំពេញ ដែលមានទីតាំងនៅភូមិស្រែជម្រៅ សង្កាត់ចោមចៅ២ ខណ្ឌពោធិ៍សែនជ័យ ។
លុះដល់ប៉ុន្មានខែចុងក្រោយនេះ ពួកគាត់ទទួលដំណឹងថា ជនរងគ្រោះធ្លាក់ខ្លួនឈឺ ហើយគ្រូពេទ្យប្រចាំនៅមណ្ឌលបានព្យាបាល ប៉ុន្តែមិនធូស្បើយនោះទេ គឺកាន់តែធ្ងន់ធ្ងរ ។ ក្រោយមកមុនកើតហេតុភ្ញាក់ផ្អើលលោកស្រីប្រធាមនមណ្ឌលបានឲ្យបញ្ជូនទៅកាន់មន្ទីរពេទ្យបង្អែកពោធិ៍ចិនតុង លុះពេលបញ្ជូនទៅដល់គ្រូពេទ្យនៅទីនោះបានប្រាប់ថា ជនរងគ្រោះស្លាប់បាត់ទៅហើយ រួចក៏ដឹកសពយកទៅតម្កល់នៅឈាបនដ្ឋានវត្តឫស្សីសាញ់ សង្កាត់ព្រៃស ខណ្ឌដង្កោ រាជធានីភ្នំពេញ ។
រួចមិនបានទៅប្រាប់ក្រុមគ្រួសារនៃសពនោះ ឬក៏ជម្រាបទៅនគរបាលមូលដ្ឋានឲ្យចុះទៅពិនិត្យសាកសព និងមានការឯកភាព ពីក្រុមគ្រួសារសព ទើបអាចបូជាបាន ប៉ុន្តែមិនត្រឹមតែមិនបានជម្រាបនគរបាលនោះទេ ថែមទាំងមិនសហការជាមួយនគរបាលថែមទៀត ក្រោយក្រុមគ្រួសារសព ប្តឹងនគរបាលបានចុះទៅគ្នា២ទៅ៣នាក់ ដើម្បីសួរនាំមូលហេតុ បែរខាងមណ្ឌលចោទប្រកាន់ថា នគរបាលទៅរករឿង និងឡោមព័ទ្ធ ទីតាំងមណ្ឌលទៀតផង ដោយសារមិនមានការសហការពីមណ្ឌលបែបនេះ នគរបាលក៏នាំគ្នា ទៅវត្តឫស្សីសាញ់ ជួបក្រុមគ្រួសារសព។
មន្ត្រីនគរបាល ដែលចុះទៅពិនិត្យហេតុការណ៍នេះ បាននិយាយថា ទោះបីជាមានលិខិតបញ្ជាក់មន្ទីរពេទ្យថា ជនរងគ្រោះដោយសារជំងឺក៏ដោយ ក៏ត្រូវតែជូនដំណឹងទៅនគរបាលឲ្យពិនិត្យសាកសពត្រឹមត្រូវ រួចហើយទាល់តែមានការឯកភាពពីក្រុមគ្រួសារសព ទើបអាចបូជា ត្រូវបូជាដោយស្ងាត់ៗ បែបនេះទេ គឺវាខុសនីតិវិធីហើយ ៕ ដោយ៖បញ្ញាស័ក្តិ